NAUPANG LEH SINGNOU
Latin America gam a singkung chikhat Socratea exorrihza (the Walking Palm tree) kichite nisa kidoh hoihna lam zuan in a omna suanthei zel uh hi in kigen hi. Singkung mahni a kikhin thei omsun ahi. Singnou (tree sapling) suan zoh ahih chiang in leikawm ah zung kai a, kituan vialvial thei nawnlou ding in i suanna mun ah kiptak in ding hi. A nuailam ah a zung thuklut deuhdeuh a kibulphuh kip deuhdeuh hi, a tunglam ah a kahiangte khanglian deuhdeuh a huihkhua lianpi huapsuak zou hi. A kahiang leh a nahte huihsia-hisiate hang in a langlang ah muut in om mahleh a phung kikhin ngeilou a, a omna mun mah ah dingkip hi. Singkung a langlang ah kituan chih na thei ngei hia?

Tuabang deuh in, naupangte zong zung a kaihna munmun uah kiptak a kibulphuh ding uh ahihman in a neulai uh/ zung thukpi a kaih ma ua Toupa’ bawlsa leihoih leh leikip ah nu-le-pa leh sinsaktute’n i suan kiphamoh hi.

Tua ban ah, singkung a upat ma a azungte’n tui a muh dan zir in zung kai uh hi. Tui dai chikchik a a muh pah leh bel zungthukpi kailou uh hi in kigen hi. Tuamah bang in, naupangte zong Pathian thutak i hilhdan a dai leh Thutak ah zung thukpi kaithei lou ding uhi. Mohpuakna ei a ahihmah bang in, zung thukpi kai thei dia naupangte sinsak kul hi. Kisakkholhna tellou a sinsakna bel sinsakna dai ahi. Nu-le-pa hi in sinsaktute hitaleh kisakkholhna hoihtak neih zel poimoh lua hi.

Khrist Jesu ah zungkai naupangte khovel hiipna leh dawimangpa’ khemnate’n mut pai zoulou ding hi. 