TOUPA’ GEELSA LAMPI
February issue ah “naupang apaina ding lampi ah chiil ding ahi” chih thu i gelh a, tuni in tua lampi toh kisai saulou gelhbeh ka lunggulh hi.
Toupa’n naupangte adia LAMPI asehsa lou siah lampi dik dang omlou hi. Setan in lampi tuamtuam hon kawkmuh zel a, khovel mit toh i et chiang in lunglut huai thei mahmah hi. “Na tanu/tapa zaw ball peek a talent ahi a, pro-footballer di’n chiil ngeingei in” “Nanga zaw laisiam tungtuan hiven, IAS di’n chiil in” “Graduate phot leh”…. Hibang lampite bel Laisiangthou a Toupa’n LAMPI a genpen hikha lou in tua LAMPI zui a i totkhak ding munte hizaw hi. Tuabang munte bel lampi dang tawn a zong tuntheih ahihman in Setan in naupangte’ zuih ding Lampi, Laisiangthou in a gen pen, zuisak lou a tuabang munte a tun uh poisa lou hi.

Nang poi nasa hia?
Thutak kimchiang pansan in Setan in nu-le-pa leh sinsaktute hon khem nilouh hi. A LAMPI pen buaipih manlou a, a khawlmunte mitsuan leh lunggulh ngoingoih a hon koih det sawm ahihdan theihchet kulta hi. Toupa Pathian in a zuih ding uh lampi bawlsa nei ahihleh tua mah i zuih sak ding hilou hiam?
Ahihleh, naupangte adia Toupa’n lampi abawlsa bang ahia? A dawnna di’n Laisiangthou mah zang ni- Jesu’n a dawng a, a kiang ah: Keimah tua LAMPI, tua thutak leh tua hinna kahi. Kei hon tawn louin kuamah Pa kiang a tung thei kei. (Johan 14: 6 BI). Naupangte adia LAMPI zuih ding omsun tuh Khrist Jesu ahi.

Lai a sim theih a poimoh masa kei a; Jesu Khrist a neih a poimoh masa zaw hi. Sappau a pau theih a poimoh masa kei a; Jesu Khrist a houpih theih a poimoh masa zaw hi. Tua Lampi theihlouh ziak a zuisaklou te bel vangtah ahi ua; thei nazenpi a zuisakloute bel “khovel mi” hilel uhi.

Tuni in naupangte i chiil dan enthak ni. Leitung ah lohching dia chiil masa i hi hia; Khrist Jesu a hinna nei masa dia? Lei gou luah dia chiil i hi hia; van gou luah dia chiil? 