DORCAS Corner
Miss Liankhoman, Dorcas Coordinator Dorcas Corner ah Dorka pawl toh kisai anuai a thute i kizasak hi. 1. Tukum Dorka Pawl thupi “Na omdan uleh Khrist tanchinhoih kituaksak photphot un” (Phil 1:27), chih toh khateng adia thupi khennenna khochih ah hon kikhak a mukhalou hiam adeihbeh hiam i omleh Dorcas Hall ah lak theih ding hi. 2. Thanlon Division Dorka Pawl in February 10-12 sung Khawmpi leh Seminar kithuah EBCC Phaitong ah nei ding ua, Singngat Division Dorka Pawl in February 16-19, sung Khawmpi leh Chialpi kithuah EBCC Lungchin ah nei ding uh, thumna in phawkpih ni. 3. September 7-10, 2017 sung Dorka Khawmpilian 41na Gospel Centenary Hall New Lamka ah neih kisawm hi. Tutung khawmpi ah kidemna bangmah ki omsaklou ding a Division/Field te Phatna La (Special No.) kipe ding hi. Hun tamzaw Seminar in kizang ding a, Counseling lunggulh leh utte a ding in Counseling om zel ding hi. Hiai khawmpi hun toh kiphukha ding a program tuam na bawl lou ding in i kingen hi. 4. DORCED toh kisai in anuai a thute i taklang ding:
i. DORCED Project naupang chawmna a i panlaknate uh Antangpham man a 15% ban ah  Divison, Field, Tualsung leh mimal phatuam ngaite khateng a hong pan ban uah a kallak a hon thohtute ziak in tukum 2017 in naupang chawmtuak tampi lak ah mi 140 vel mah i chawmthei nawn  hi.
ii. Final exam a 80% Marks mute gift piak ding toh kisai: Kum 2016 final exam a 80% tunglam mark mute kipahman piak ding kichi a kitheikim naikei mahleh, tutan a kitheidan in DORCED naupang 20vel in 80%tunglam mark mu uhi. Hiai kipahman mi khat ah Rs. 1,000/- piak ding kichipen a sum omsa omlou a zontawm zel ahihman in tukum in hiai gift ding toh kisai anuai a ten hon thoh khawm uhi:
a. Lamka South Division Dorka pawl in Rs.11,500/-hon thoh uhi. Amau Dorcas Calendar neu amau tante zuak a sum suah in DORCED panpihna ding in hon pia uhi.
b. EBCC Zion Dorka Pawl in Rs. 5,000/- hon pia uhi.
c. Nu Zoram Tonsing in Rs. 3,000/- hon pia hi. Aman kumlui in DORCED Project panpihna kha teng a Rs.1,000/- hon piak zel pen tukum apan in Rs.1,500/-hon peta hi.
d. Mrs Lalthangmawi w/o Upa Lalsuonglien, EBCC Mumbai in DORCED naupangte deihsakna ziak in Sweet packet 2 hon pia hi. DORCED Project nuai a i naupang chawmte awlmohna nei a i phawk siausiau ziak un i kipak hi. Hiai bang a i pankhawm siausiau ziak ua Dorka Pawl in naupang laisim nuam mahmah amau neihsa a sim zoulou bangzah hiamte panpih kha thei i hihman in Antangpham phamtute, sum tang a pangte leh avan a pangte tengteng tung ah kipahthu i gen hi. Kuapeuhmah in DORCED ading in chiklai peuh in huhna aneulua leh lianlau chih omlou in piak theih gige ahi.  A tamsem pethei leh semthei zel ding in Pathian in hon vualzawl chiat hen. YOUTH Corner
Rev. N Pumsuanmung, Youth Coordinator Tutung Youth Corner ah tukum 2017 BYF thupi leh a khennenna i taklang ding
Thupi: “Thutak leh diktatna a kilamtou Tuailai” (Paunakte 14:34)
CHILDREN Corner
Rv. B. Chinkhengoupau, Child Coordinator A PAINA DING LAMPI AH:
Paunakte 22:6 in “Naupangte a pai nading lampi ah chiil lechin, a teek dong a zong tua nuse lou ding hi” a chi hi. Hih Laisiangthou chang bel a thang mahmah leh kuapeuh in etlouh a i gen theih khat ahi. A khiatna leh a gennop zong thei mahmah i hihlai in a zuih haksa sa chiat hi in i kithei uhi. Tampi genlou in, “A paina ding lampi” chih thuvual in a gennop nu-le-pa leh sinsaktute ading in saulou a taklat ka ut hi. Sappau ah “in the way he SHOULD go” (KJV) a chi sese hi. Tua in a gennop bel; naupang chih a paina ding lampi Toupa’n a geel om hi. Nu-le-pa leh sinsaktute’n ei deihna lamlam a naupangte pi ding chihna hilou ahi. Tua naupang’ adia Toupa’ deihlam zonkhiat a, tua lampi-a zuithei dia chil ding chihna hizaw hi. Naupangte’ deihlam a chil ding zong a chikei a, nu-le-pa te deihlam a chil ding zong a chikei hi. A paina ding lampi a chil ding a chi hi; Toupa’n tua naupang’ paina ding lampi a geelkholhsa om ahi chih Laisiangthou’ hon sinsak hi in i mu hi. Tuabang a kichil lou-a, mihing’ deihteel lampi a i kichil leh bel; naupang hong pichin a sepna hoihtak a sep hang in lungkimna leh khamuanna taktak ngah theilou kha ding hi. Gingtute ading in bel; kam hoihtak neih pen lohchinna ahi masa kei a, Toupa’ hon geelsak lampi zuih pen lohchinna diktak hizaw hi. Naupangte a paina ding lampi uah chil a pi thei ding in Toupa’n simtute hon vualzawl hen!