Hun thak leh kha thak hon musak nawn Pa Pathian min phat in Jesu Khrist min in itna chibai kon buk hi. Tutung in ‘Ngaihdamna Thupuak’ chih thu houlim ni.

Mihing khat-le-khat kal a kitheihsiamlouhna leh hihkhelh om hun in huai toh kisai a nihte kal a kilemna leh kitheihsiam tuahna bawl tuh ngaihdamna chi le tomchik in gentheih hi. A khial papen a khelhna pa’n thukkik utna leh phuba lak utna neilou ding a lungsim kimanna toh thupukna a lak a, a kilempih leh tua leng ngaihdamna hi veve hi. Insak-inkhang toh kal a thil tuamtuamte ziak a kilemlou, kihoulou, kingiktuah sim a om, nupa kal leng huchi mah, nuta, pata unau piangkhawm kal ah leng tuabang om thei tham hi. Ahia a bang thu teng hitaleh kingaihdamna in kikal lemlou tengteng ah kitheihsiamlouhnate mangsak in kitanauna omsak thei hi. Ngaidam chih ziak in a sesate mangngilh chihna hipah kei mahleh a mi nihte ahihkeileh pawl nihte kal a kihoutheihna leh a nuamlou omte phawk gige lou a om theihna ahi.

Jakob leh Esaute unau kal a kingaihdamna: Gen. 32-33:

Jakob in a u Esau upazaw ahihna a behuan khatvei annek in a leikhiaksak a, tuaban ah a vualzawlna tan ding leng a laksuh hi (Gen.25:31; 27: 27-29). A u Esau heh mahmah ahihman in a pa tekta a sih chiang a anau Jakob thah mai ding thusawm nei in a kinem hi. Huai thu ziak in Jakob a pu Laban omna lam Padan-aram gam lam a taisia in huai ah kum tampi a va om a, zi leh tate leh ganhon tampi nei in Pathian in a vualzawl hi. Huchia kiningchingtak a a omlai inleng a u tung a hihkhelh mangngilh lou in lauthawng pipi in a u Esau tuak ding in hong kisa hi.

Jakob kisakkhawldan:

i) Thangkou sawl masa in a pu Laban kiang a mikhual ahih thu gen kawm in a gan neihte gen hi. Esau mah leng Jakob dawn ding a hong pai ahih thu thei. Lauthawng mahmah mai in a om hi.

ii) A ganhonte leh a mite pawl nih kalnei a khen in ama ah paisak hi. Esau a tuah chiang ua gen ding hilh zel hi. Salam ah leng a lungsim amah hihtheihna tan ah kisakhawl in lungtang tawng a ahihkhelhna kisik in Pathian kiang humbitna ngen in a thum hi. Jakob thumna, “Aw ka pa Abraham Pathian, ka pa Isak Pathian, Toupa, Na gam ah leh na tanaute kiang ah painawnta in, k’on hihhoih ding hon chipa, Na sikha tung a hehpihna na muhsak leh thutak tengteng na muhsak lak a, a neupen leng mutak ka hikei. Hiai Jordan lui ka chiang kia toh ka kan a; tuin zaw pawl nih hial ka hong hita uhi. Hehpih in ka u khut a kipan, Esau khut a kipan, hon humbit in. Huchilou inzaw kei leh numei naupang tan in hon that kha ding, chih lau ka hi. Nang kon hihhoih ngeingei dia, na suante tuipi a piaunel, sim zohlouh tanhial a tam bang in ka bawl ding n’on chi ngal a” a chi hi (Gen.32:9-12).

iii) Pathian buanna nei hi: Unau piangkhawm kal a kitheisiamlou, poisak neiloutak a a kalthu uh om a mihing dan a kingaihdam haksa mahmah ding pen Jakob in Pathian toh a kibuanna tungtawn in a min bang kikheng a, Pathian vualzawlna a nget dungzui in tang petmah hi. A min Israel a khek in om a, a Pathian buanna mun min leng ‘Peniel’ a sa hi. Jakob leh Esau a hong kituak ngeitak ua, Jakob ngaihtuahna khenlam ah, a u Esau tai masa in a va pom a, a ngawng a kun a tawp in a kap uhi. Bangzahta in a lungnuam tazen d’uam maw! Jakob sikhate, naupangte leh a zite toh Esau chibai buk in ama ah kun uhi.

Esau in Jakob ganhon a kituahpihte bang chihna hiam chi’n a dong a, Jakob in, “Ka toupa, na hehpihna ka muh theihna ding in ka chi a ahi” a chi hi. Esau in, “Ken leng hau veng e, bawi aw, na neih tengteng nang’ a hihen” a chi hi. Jakob in Pathian mel mu bang ka hi a chi hi. Unau melma a kibawl, thah ding a kivau, hin haksatak a hunsawtpi a zat khit nung ua Pathian ngaihdamna tungtawn a hong kingaidamta ahihman un, lungnem leh aw damtak in hong kihou tiautiauta uhi. Nuam natel in chia! Unaute kituak diamdiam a omkhawm anak hoih in anuam mahmah hi (Sam 133:1) zang dik mahmah uhi.

Joseph in a unaute a ngaidam: (Gen. 42:21-22; 45:3-8; 50:15-21):

Joseph a unauten a zuakmang lai un kum 17 a upa ahi. Aigupta gam a Pharo nuai a thunei lianpen a hih in kum 30 a upa ahi. Jakob leh a tate Kanaan a omlai un kial hong kia a, Aigupta a buh om thu Jakob in hon theih chiang in a tate buh paw ding in sawl hi. Joseph kiang hong tung ua, a hihna bangkim uh hong kigen ua, a sanggampa uh amau theinawn kei mahle uh Joseph inbel ana theilai hi. Hun hong pai zel a atawp in Joseph a kiang uah hong kipuang a, a pa Jakob, Aigupta a pisuk ding vai hon hawm uhi (Gen.45:1-8). Jakob leh a inkuante Aigupta gam a Gosen mun a hun bangtan hiam a hong khosak nung un a tate thugou a siah khit in a kha a khahta hi. A pa uh Jakob a sihtak in Joseph unaute hong lauthawng nawn ua, a hihkhelh uh hong kiphawk thak in Joseph kiang ah khupboh chiat in ngaihdam hon ngen uhi (Gen.50:15-18). Joseph in a unaute ngaidam in a kiang uah, “Lau kei un. Pathian sik a om ka hi ahia? Nou zaw ka tung ah thil gilou hih lungsim na pu ua; himahleh tuni in mi tampi hing leh dam a humbitna dia thil hoih suahsak Pathian lungsim ahizaw hi. Huaiziak in tuin lau kei un Nou leh na ta neu chikchikte uh ka hon vak ding” a chi hi. Hichi in, amau a lungmuan a, kamsiamtak in a houpih hi (Gen. 50:19-21).

Ngaihdamna a om chiang a a thupuak nuam mahmah mimal hinkhua hon khek lamdang thei om hi. Tuate tuh:

1. I langte toh kal leh midangte toh kal ah kitanauna chidam hon tun hi.

2. Mimal lungsim damdawi hoihpen ahi.

3. Midang hon theihpih louh lungkhamna, gimna leh huatnate tawmsak hi.

4. Mahni hihna leh mi manpha hihdan hon kiphawksak hi. Unaute, atung a unau tuaktuakte kingaihdam-ma a ahun zatdan ding uh ngaihtuah mahdih, a lungsim uh tawl in gim mahmah ding uhi. Himahleh a hong kingaihdam chiang un a lungsim uh zangkhai in a tawldam mahmah chih i muthei hi.

Nang leh kei leng tuni in i pianpih sanggam toh kal hiam, insak-inkhang, lawm-le-vualte toh kal a lemlou, lungsim natna om zenzen leh ngaihdam ngen dia kisakhawl in, ngaidamtu hi ding a mansa in Jakob bang a Pathian buanna nei in ngaihdamna thupuak hamphatpih ding in Pathian in hon vualzawl hen.