Mihing adia lampi dik a kilawm a om a, himahleh huai tawpna sihna lampite ahi. (Pau. 14:12; 16:25)
A zahngaihna itna nou ngiingei ziak in tuni tan dam leh bittak a hon pi in hipi leng nuai ah kum 2021 a kha sagihna mel hon musak i biak Pathian leh Toupa Jesu Khrist min in chibai aw!
Leitung a inkip neilou khualzin lampai bang a mihingte’n damsung hinkhua i zattouh lai in lampi dik, hinna lampi zui a pai in i kithei hia? Ahihkeileh dik hileh kilawm lah a tawpna sihna lampi tawn kha maimah ding a kisa in i om hiam chih mi malmalte’n eimah lampi totchiat enchian in kivelpha le uthuai mahmah hi. Eimah hoihsakdan a hinkhua zang a Pathian deihdan pel a hinkhua zat hoihpen bang a ngaihtuahna nei in nang-le-nang kithuzoh in na om hia? Pathian in na hong piankhiatma a kipan nang hinkhua ding a a na sehkholh lampi tawnkhalou a nang lunggel leh lungsim lemtheihna zang a na deihtelna lampi mah tawn a pai lellel hikha nilouh na hizaw hia? Lunggeel vengveng mah dih, a taktak a zaw “Mahni” lampi i chih zaw lian a gamlapi pai ngaiselou, muntuam leh lamtuam va naih ngailou a ei hoihsakdan zuisuk pah geih hilel – lampi khat peuhpeuh in bel tupna mun khat hon tun veve hiven. I Laisiangthou tangtel in, ‘Mihing adia lampi dik a kilawm a om a..’ chi hi. Lampi dik a kilawm lel hilou, ‘A dik lampi’ Pathian mitmuh a dik, hinna lampi bel a omsa leh om gige ahi. Lampi nih zuih ding om a tuate:
1) Mihing lampi tuh manthatna lampi ahi: ‘Kong kawchik ah lut un; manthatna a paina kong a za a, alam leng a lian a, huai a lut leng a tam mahmah uhi’ (Matt.7:13). I niteng khosakna ah in-le-lou hoih, nek-le-dawn limzaw deuh, silh-le-ten kilawm leh changkang, damtheihna, siangthouna leh a dangdangte kiningching leh hahdamtak a om ding mihingte lunggulh pipen a hi chile’ng kigen khial lou ding hi. Hiai pen hoihzaw ding ahi chi in eimah hoihsakdan leh ngaihdan mah paipih in alanglang a diang in kikhosa hi. Pathian mitmuh ah bang a chi dia aw chih ngaihtuahna om manlou in kei, kou inkuan ading a kithaman, punna leh summuh theihna ahih nakleh kim-le-pam leng en manlou a huai pompomte kihi maizen hi! A polam et a zaw kilawm mahmah, kam a chu Pathian vualzawlna ahi chih bang nuamsak thoh himahleh khang khat leng daihlou a hong om chiang in gen ding vang mahmah hi. Salam a kiakniamna, vangsiatna mihing mitmuh a hong omhial chiang a mualphouhuai leh zumhuai i sak kia hilou in a poi mahmah tuh khalam hinkhua Pathian toh kigamla phetlou a tangtawn a kikhen a om khak ding lauhuai petmah hi. Lamlian, lampi nuam, mihing deihdan lampi in siatna hon tun a Pathian toh hon kikhensak in, khalam sihna leh i kha ading a hamsiatna thupi suaksak ahihman in i lampi zuihlel enpha thak ni. Laisiangthou in, ‘Na lampi tengteng ah amah thei inla, huchi in aman na lampite a pitang ding hi’ chi hi (Pau. 3:6).
2) Pathian lampi bel hinna lampi ahi: ‘Hinna a paina kong a kawchik a alam a neu hi, a tawnte tawmchik a hi uh’ (Matt.7:14). I leitung khualzin hun tomchik sung Jesu Khrist tungtawn a gingtute’n lampi kawchik pilvangtak a zui a hinkhua zang ding a Pathian in a hon lamette i hi. Kuamah mangthang lou a tangtawn hinna mihingte’n a tan ding uh Pathian tup-le-ngim ahi. Jesu’n tua lampi kawchik tawn theite tuh mi pilvang leh taimatak a zongte kia ahi uh chi’n a gen hi. Huan Jesu mah in mihingte’n amau hoihsak bang lampi toh kilehbulh geih lampi hichi’n a na gen hi, “Keimah lampi, thutak leh hinna ka hi; keimah a pailou kuamah Pa kiang a tung kei” a chi hi (Jn.14:6). I septheih zahzah semthei ding a hun hoih leh damna manpha hon piak lai in amah toh ton a hinkhua zangkhawm ding in i hinna luikhe thakthak le’ng i chi hi. Zingchiang gentaklouh, denmah chiang a i hinna bangchi ding ahia chih i theihlouh lai in, lawm-le-vual leh mihinpih khenkhatte bang in hon ngailou ua nelhsiah a i om in leng lei leh van bawl Tungnungpen Pathian Tapa ei nasep bangkim a hong kikum ut a amah toh ton helhel ding a niteng a hon chial hamphathuai sa in zui tettet ni aw! Jakob in, “Zingchiang a bang hong om ding ahia chih na theikei uhi. Na hinna uh bang ahia? Mei sawtlou kal a hong dawk a, mang nawn lel bang na hi uhi. Huchi in ‘Toupa’n pha a sakleh i dam dia, hiai hiam, huai hiam i hih ding’ na chih ding uh ahi” chi hi (Jakob 4:14-15). Hun hoih ni hoih mu a i dam lai in Khrist toh ton a kituak ding a mansa a om akul hi. Ei mihingte’n a dik lampi i paina ding kichian i theihlouh lai in hon siamtu Pathian in a siamsa mihingte hon thei in i lampi tot ding adik leh tang thei mahmah hi (Sam 100:3). Pathian in hiai khovel a haihuaitak a mawk vakthap maimai ding a ei kia hon koih hilou in khovel miallak a vak tangkhesak ding in a hon sam hi. Tua vak tuh lampi kawchik ah Toupa toh ton a vakkhiaksak theih ahi.
Tuni leh niteng a deihtelna chiimtak toh i tel ding lampi, ‘Hinna lampi leh Manthatna lampi’ khat zaw samsam hi gige ahi. Hinna lampi in Jesu Khrist tungtawn a khelhna ngaidam in tatna nasep hong sem a Pa kiang zottheihna lampi ahon bawlsak hi. Manthatna lampi in bel siatna, lungkhamna ban ah Pathian toh Tangtawn a kikhenna leh khalam sihna tanpha hon tun ding hi. Huaiziak in i lampi zuih sui in ki-enpha thak ni. Sihna lampi zui a i kitheihleh lunghei in hinna lampi zuithei ding in Pathian Khasiangthou in hon makaih chiat hen.