Inkuan tampite hipi ziak a sihna in it-le-ngaihte khen a lungkham leh thawmhautak a a omlai un, i hoih tuan ziak hilou, i kikep zoh ziak hituan samlou, Pathian hehpihna ziak kia in nang leh kei tuni’n chidam a om in June kha melmuthei a hon pilai ziak in i kipak mahmah a, na vek un i Toupa Jesu Khrist min manpha in itna chibai kon buk hi.

Inkuan hoih bukim a kina ngei hetlou a khosa khawm gige om khollou ding hi. A ki-it chiatchiat te thil banghiam ziak a ngaihdan kibatlouh hun om in kilung noplou hun om tham hi. Inkuan sung a tengkhawmmite khat-le-khat kitanauna chidam, kilainatna leh kihehpihna a omtheihna dia poimoh leh a loutheilou tuh ngaihdamna ahi. Tuabang a inkuan chidam i bawltheihna ding in i dinmun, khosakna, nek-le-tak, silh-le-ten leh damtheihna bangkim ngaihtuahna a haksatna leh buaina hong tun hun chiang in ahun leh mun ban ah a thu zil in buaina te genkhawm a sukveng pahpah ding ahi. Haksa sim mah leh hiai hun tak ah ngaihdamna pen a tak a zatkhiak tuh maban hinkhua ah i nupakal, tate toh kal, teekpi-teekpu toh kal leh sanggamte toh i khosak khawm zelna ding a, lampi dik leh vualzawlna hon tuntu hi ding ahi. Midang in i tung a hihkhelh a neih leh a ngaidam tu hih ding leh ei hihkhelhna ah leng ngaihdam a i om ding a poimoh tuaktuak hi. Huaiziak in nu hiam, pa hiam, ta hiam in i tung a thil hihkhelh a neih leh ngaihdam ding a hi, a khelhna pen lian in neu taleh. ‘Ka tung ua khialte ka ngaihdam bang un’ chia i thumna pen a tak a zang hipah ding i hi. Huan Pathian in Khrist a hon ngaihdamna mimaltak a tangta i hih ngal in, a loutheilou a Pathian thupiak i zuihna leng hong hipah ahi (Eph. 4:32).

Ngaihdamna tuh kuadang a ding hilou in, ‘NANG LEH KEI’ a ding ahi. Hehna leh thangpaihna lungsim a kipan a suahtaktheih na omsun ahi. Kuahiam tung a lungkimlou, heh a lungtang natna i neihchiang in hon hehsaktute ‘amah’ hiam ‘amau’ hi hihkhial zaw chi in eimah kidiksak in amau huatna toh i lungsim na tuntun zezen sek hi. Huchih hunchiang in mahni leh mahni kihehpih kawm a i hihding tuh amau ic hihte mah ngaidam ding a lungsim a thupukna bawl masak gige ding ahi. A diak in mahni dikna a hihchiang in ngaihdam haksa kisa diak hi. Ngaihdamna inkuansung mite toh i bawl theihna ding in:

1. Tup tintenna neihding ahi: ‘Tupna a om leh lampi om’ chih paunak poimoh tak ahi. Nna khat peuhpeuh i sep ding chiang in lungsim a tupna neih masak kul hi. Tua tupna dungzui in hiai dotnate kidong mah dih: Bang a ka theih ut? Hiai thil toh kisai in bang ka tuak dia? A dawnna duhthusam muhtheihna ding in i kisakkhawl masak ding ahi. Tup tinten dia i deih tuh ngaihdam ding chi ut i hi. Nu hiam, pa hiam, sanggamte hiam a kua hitaleh i insung a member khatpeuh in hon hehsak khak chiang in, a thu lian in neu taleh leng ngaihdam ding chihpen ei lungtang a tup tinten a i neihna ah semkhethei ding i hi. Bible in, ‘Min na tung ua a hih uh na deih bangzel un mi tung ah leng hih sam un’ a chi hi (Luke 6:31). Midang tung a thil i hihkhelh khak chiang in a hon ngaihdam uh ut lou kuamah omlou i hihbang in enleng mi ngaihdam ding i tup a hih dungzui in ngaidam thei ding hang a, eileng ngaihdam a omding chihna a hi.

2. Kihoupih teitei sawm ding: Inkuan khat a tengkhawmte duh leh deihte kibang gige lou in thil houchik khawng a ngaihdan kikalh hun om theitham hi. Huchih hunchiang in dik kisalua in i kiselpih pen nu hiam, pa hiam, ta hiam, pi-le-pute hiam kuapeuh hitaleh houpih nawn ding utlou a mahni ommun a hehna toh lungsim kochik tak a hun zatkhak theih ahi. Himahleh awl a ngaihtuah a lungsim niamlak masak ding ngaihtuah a i kilung noplouhpihpen houpih masa teitei ding in pan lathei zel leng huai ah ngaihdamna hinkhua haksa hetlou a sepkhiak theih ding hi. Sam 133 ah, ‘Ngai in unaute kituak diamdiam a omkhawm a nak hoih in a nuam mahmah hi’ chi hi. Kamdam a kihoupih dialdial a omkhawm pen anuam lel hilou in Tangtawn a hinna ding Toupa vualzawlna i tantheihna hi sawnsawn lai hi. Inkuan sung a kingaihdamna a om chiang in lungsim chidam in khalam kipina thuksem omthei hi. Tuaban ah lunggimna tawmsak in lauhthawngna beisak a, kingaihsiatnate omlou in kilainatna leh lungsim tawng ah khamuanna hon tun hi. Toupa toh ton a inkuan chidam bawlthei ding leh khat-le-khat kingaidamtuah ding in a Khasiangthou in hon ompih chiat hen.