Ephesate 4:32. Huan, kihehpih chiat a lainatna nei in om unla, Pathian in Khrist a a hon ngaihdam bang in, noumau leng kingaidam tuah chiat un.

Ngaihdamna kichi a kigen chiang in huai in a sukkhak nih om gige hi, ngaidamtu leh ngaihdam a ompen. Huai kia leng hilou in hiai nihte’n suahtakna ngah tuaktuak uhi. Hiai omdan bel ngaidamtu in ngaihdam ding a mohpuakna leh ama lam a sepkhiak ding a aneih ahih toh kiton a kuahiam a ngaihdam ut keileh huai utlouhna ah amah leng koltang hi gige mai ahi. Ngaihdamna sepkhiak ding amah lam kipan ding ngaihdam a om penpen in a ngaidam hiam ngaidam lou chih pen a poimoh hinawn lou ahi, ama sep ding a sepkhiak nung a amah huai koltanna apan suakta leh zalen hita suak ahihman in. Huan ngaihdamna dongtu ading in leng zalenna thupitak bawlsak suak ahihman in tawldam in lungmuan huai mahmah suak hi. Ngaihdam a ompen in tua bang a ngaihdam a ngah/muh leh zak toh kiton a suahtakna thupi leh suahtakna lamdang a koltanna a pan zalen ahihman in hampha mahmah a, a hoihlouhna, a leibat leh koltanna apan a ngaihdam ahihtak ziak in, a va khial thei nawn kei hi. Huchi ahihman in hiai nihte’n amau lam chiat a sep ding om bangbang a sepkhiak chiang un suakta tuaktuak uhi.

Pathian in mihingte ama batpih a hon siam, amah toh omkhawm ding a hon sehtuamte himahleh khelhna ziak in hon kikhen sak in Pathian mai a chinglou, sianglou leh a thupina koppih theilou kisuak hi, huchibang ahihlai in Pathian in hon it mahmah a mangthang mai ding a hon phallou ahihman in suahtakna ding, i hinna ding, leh i omkhawm theihna ding in ama lam a sepkhiak ding om bangbang hon semkhia in a tapa tang neihsun hon pia hi. Tua bang ngaihdamna nasepte aban ban in ensuk leng:

1. Thakhengna(Vicarius-substitution): Toupa Jesu Khrist mikhialte sik-le-tang a si ahih genna ahi. Aman khelhna nei hetlou hi napi khelhna a bawl a om in, mikhialte thuak ding tengteng thuak kim sipsip hi. Huaiziak in amah tuh Paikan ankuang luina ding a goh Pathian belamnou chih in om hi (Jh. 1: 29; 2Kor. 5: 21; 1Pet. 2: 24; Heb. 9: 28; Is. 53: 4-6).

2. Tatkhiakna (Redemption): Toupa Jesu Khrist mikhialte tatkhiakna ding a hong si ahi. Hiai tatkhiakna toh kisai in thumal poimoh mahmah bangzah hiam kizang hi.

a. Agorazo: Van zuakna apan thil kilei bang in gingtute khelhna sal hihna apan Toupa Jesu Khrist sihna in hon leikhiakna genna ahi (Matt. 13: 44; Lk. 9: 13; 1Kor. 6: 19-20; 7: 22-23 cf. Gen 41: 57; 42: 5, 7)

b. Exagorazo: Toupa Jesu Khrist in khelhna a pan hon leikhia (agorazo) in dan leh hamsia apan hon suaktasakta (ex-) ahih genna ahi (Gal. 3: 13; 4: 5; Eph. 5: 16).

c. Peripoioumai: Khrist sisan a leisa i hihziak a i bitna ahi. Hotdamna ding in Pathian a mi thum ten amau sep ding chiat sem vek uhi (Nas. 20: 28)

d. Lutroo: Tatkhiakna ding a poimohzah a man piak (ransom) i hihman in koltanna a pat khahkhiak a omta chih genna ahi. Huaiziak in Pathian a ding a suakta ta genna ah (Lk. 24: 21; 1Pet. 1: 18; Titus 2: 4)

3. Kilemkikna (Reconciliation): Khelhna in Pathian leh thilsiam te toh kal a kimelmakna hontut pen Khrist sihna ziak a kilem kiknawnna hontut genna ahi (Kol. 1: 21-22; Rom 5: 10. Jak 4: 4; Eph. 2: 1-9; Is. 59: 1-2). Kilemkikna thumal in a tunkhak poimoh mahmah nih om hi.

a. Provision/objective aspect: Pathian toh kilemna ding sepkhitsa ahihman in ginna a saan dia mansa ahihna genna ahi. San leh sanlouh ding mimal thupukna ah kinga ahi (2Kor. 5: 18-19).

b. Experimental/subjective aspect: Mihingten ginna a i san hunhun a hiai kilemna neihtheih ahi. Hiai pen ginna a i san matan neih theihlouh chihna ahihman in, theihna tan hilou in neihna ahi (2 Kor. 5: 18-19).

4. Thoihdamna (Propitiation): Khelhna ziak in Pathian thangpai mahmah a khelhman kim sipsip a piak a Pathian thangpaihna thoihdam kul hi. Jesu Khrist sihna hiai thangpaihna thoihdamna ding a a man hi a, hiai ziak a Pathian lungkimta hi (Rom 3: 25; 6: 23; Heb. 2: 17; 1Jh. 2: 2; 4: 10; cf. Lev. 4: 35; 10: 17)

5. Ngaihdamna (Forgiveness): Khrist sihna a Pathian lungkimta a mikhialte a ngaihdamna ahi. Hiai a thumal poimoh nih kizangte-

a. Charizomai— Pathian hehpihna a hotdamna (Kol. 2: 13)

b. Aphiemi— Khrist sihna gingtute khelhna khahkhiakna/sawlkhia (Eph. 1:7).

Hiai ngaihdamna in hun paisa-omlel-hongtung ding huamkha mahleh niteng a khelhna apan kihahsiang zel poimoh hi (1Jh. 1:9).

6. Siamtansakna (Justification): Jesu Khrist sihna gingtute Pathian in siamtang-a a puanna (verdict) ahi. Court thumal ahi a hiai ah gensaktu leh puangkhetu a poimoh mahmah hi (Nas. 13: 39; Rom. 3:24; 4: 2, 5-7; 5:1, 9-11; 2 Kor. 5: 19)

7. Ta ding a Pomna(Adoption): Khrist sihna sangtute Pathian innkuan sung mi ding a pomna ahi. Hiai ah thangpaihna ta apan lungkimna ta a kikhekna leh gouluahtu ding a hamphatna tunkha hi (Rom. 8: 14-17, 23; 9: 4; Gal. 4: 5; Eph. 1: 5; 2: 1-3).

KROS A NGAIHDAMNA BANGCHI SAAN DING:

Lungtang tengteng toh zong a san ding ahi (Jer. 29:13). Toupa lungtang enchianpa ahihman in lungsim kheetguk leh kimanlouhna omsung teng Toupa muhtheih hilou hi (1Sam. 16:7). Lungtang tengteng i chih midang ngohsawn louhna leh atawngdeng a deihpenpenna ahi (Gen. 3: 8-13- Adam leh Eve; 1Sam. 15: 1ff cf. Sam. 51: 1ff- Saul leh David). Hiai hi adal thei tampi om a tuate paikhia ngam ding a kipanpih poimoh mahmah hi. Hon dalthei khenkhatte —

1. Khelhna puankhiak utlouh leh khahngam louh, hon ngaidam tu enlou a kim leh kiang a mite’n hon bangchi et/muh ding ua chihte i buaipih tam theilua ua ahi, hiaia bang dinmun a kiding a tu phingphing a kipuan thakthak chihbang i buaina uh khat ahi.

2. Hon ngaihdamna leh tatna a kingak ngam louh, hon ngaidam zou mahmah dia hia, ka khelhnate thupi lua, uang lua kei zaw hizou lou ding hiveng aw

3. Eimah kia ki-en in kimuanngamlouhna, tampitak in a theihkhelh leh lauhthawng hi a kimuthei chuh, a dinmun bang, i hihna bang, hon ngaidamtu sang a tua bangte et/muh theih luat in huai ngaihdamna pen kisang ngamlou sek hi.

4. Maban ding sau ngaihsun luatziak a launa, huai ngaihdamna pen sang bang hileng hiai bang, huai bang ka tawpsan ngai ding, ka tate sungkuante bangchi khosak ding chi in a tung nailou maban ding en lua in sang ngam mahmah lou kitam mahmah hi.

Ngaihdamna i san ngamlouhna uh a ziak a san tampi om lai ding, nang bang ziak a tuni tan a huai ngaihdana a na sang nailou na hi hiam? Pathian in ama lam a sep ding om bangbang sem zouta, zohna hon na bawlsakta, tua zohna na sang diam? Tua ngaihdamna michih a ding a koih a om na sang diam? Bang chi bang khelhna na hih a chi a hong kidong hilou in hiai ngaihdamna ana sang in chia hong kiluikhia hizaw ahi.

Simtu tengteng Toupa’n a deihsakna leh ngaihdamna michih a ding a a koih tangchiat ding in hon vualzawl hen.