Kum 2021 ading a kha thumna tan honpi Pa Pathian leh a Tapa i khelhnate ngaihdam a hihtheihna dia Kros a hong si i Toupa Jesu Khrist min manpha in itna chibai aw! Tutung in ‘Jesu Khrist sisan in khelhnate theihnawnna nulmang in Pathian’ thangpaihna a kipan in hon hondam’ chih saulou in kikum ni.
Rom 5:9-11: Huchi in a sisan a siamtansak a i omkhit nung in, amah ziak in Pathian hehna a kipan hotdam in i om ngei ding uhi. Melma i hihlai abawn a Tapa sihna ziak a Pathian toh Na kitam khin i hih ngal UN tuh, kitam a i omkhit nung un a hinna ziak in hotdam in i omsem ding uhi. Huchi kia leng a hikei a, kitamna tua hon musakpa i Toupa Jesu Khrist ziak in Pathian ah leng i kipak hi.
Khelhna sal a tang, eimah a kitankhethei dia thilhihtheihna himhim neiloute i hihlai in Pathian in khatvei a setden ding in a Tapa Jesu Khrist honsawl in Kros ah sisan luang in tatna hon bawlsak a, khelhna tung ah vualzou hi. Ginna tawn a Jesu sisan ziak in diktansak a i om kia hilou in, Pathian thangpaihna thuak nawn lou ding a Khrist sisan pha a hotdamte i hi. Huaiziak in Pathian melma hinawnlou in a lawmte i hi zawta hi. Khrist sisan luang in i khelhna tengteng silsiang, khelhna nei ngeilou bang a tatkhiak i hi chih gingtate i hihman in manpha a kipahhuai petmah hi.
Jesu Khrist sisan bang ziak a poimoh ahia? Thukhunlui hun a Dan laibute ah, khelhna leh tatlekna tengteng, a khelhdan leh tatlekdan uh zil in kithoihna poimoh hi. Heb.9:22 ah chiang tak in ana gen, ‘Huan dan in sisan a bangkim hihsiangthou a ngiat bang in, sisan suaklou in ngaihdamna himhim a omkei hi’. Hiai ahi Khrist sisan a poimohna, eite mohna a dimte mohlou bang a genkhiakna in a sisan in kithoihna hon bawlsak a, Pathian ngaihdamna i tangta hi. Tua sisan takkhia tungtawn in khelhna tengteng nulmangta hi (Kol.2:14). Himahleh, Heb.10:1-4 ah dan toh kisai hichin a gen, ‘Dan bel thil hoih hong om ding lim kia ahih ziak in, a taktak lohkhiakna neilou in, kumteng a kithoihna ngeingei a latzelte un, a beding a hongpaite bangchi mah in a lungkimsak thei ngeikei hi. Huchi keileh lat tawp thamta lou ding uhia? A bemite khatvei a hihsiangthou pah hileh khelhna kitheihna a neinawn kei ding uhi. Himahleh huai kithoihna ah kumteng in khelhnate theihnawnna a hong om nak hi. Bawngpa leh kelte sisan in khelhnate lamang theivual ahikei hi. Huaiziak in Israelten kum teng in ganta sisan in kithoihna lan mahle uh, a khelhna uh theihnawnna omzel hi. Huchia khelhna a om det leh bel kithoihna bawlpa leh a bawlna pa toh a kizopna uh diklou chihna ahi. Himahleh Jesu Khrist sisan a kithoihna in a piangthakte hinkhua ah khelhnate theihnawnna omlou in a vek sipsip in siangsak amah toh hon kilemsak hi. ‘Khrist, tangtawn Kha ziak a gensiatbei a Pathian kiang a kilan sisan in, Pathian hing nasem ding in na sia-le-pha theihna uh thilhih sisa apan nak hih siangthou natel inchia! (Heb.9:14). ‘A tatleknate uah ka zahngai dia, a khelhnate uleng ka thei gige nawnta kei ding chi in’ (Heb.8:12) chilai hi. Pathian in Khrist a hon ngaihdam leh, i khelhnate aman thei gige nawnlou, ei ngaihdam a om kichipen in i theih gige lebel eilam ah chiang zoulou om himaithei ahi. Kingaihtuah phat mahmah kul ding hi.
Khrist sisan a hihdamna in hamphatna honpiakte: i) Khelhna leh diktatlouhna a Pathian’ thangpaihna lungkimsak a om, ii) Khelhna lungsung a kitheihnawnna nulmangta hi. Khelhna thunuai a om a gitlouhna leh zahlaknate a kipan a suahtaksak in i omta hi. ‘…nou tuma lam in na lungsim uah a melma na hi ua, na thilhih gilou ua amah a kipan a khen a om na hi uhi, himahleh tuin aman amah toh hon kilemsakta hi. A sihna in a pumpi ah amah toh noute a hon kilemsakta hi, ama a siangthou, gensiatbei leh mohsaktheihlouh a a hon dinsak theihna ding in (Kol. 1:21-22). Khrist ginna ziak a Pathian mai ah siangthou, dembei leh pomtak in a hon omsak hi. Pathian toh kilemtheihnawnna ding himhim mihing lam a om lou, melma himah lehang, Aman a tapa Jesu Khrist nang leh kei tang in Kros a si in i khelhna tengteng tatna hon bawlsak ta hi. Pathian ei ah lungkim hizawlou in, a tangtawn thilgeel tangtungsak a Tapa ah lungkim hi. Laphuaktu’n, ‘...Hehpihpa’ sisan ziak a kipahna; Vangnei kisa’ng Pathian’ tate ding in Khrist Toupa’n hon bawlta’ a na chi hi. Eite leng tua tatna honbawlsak Jesu Khrist sisan ziak in i kipak mahmah hi. Simtute Toupa’n hon vualzawl chiat hen.
DORCED HUHNA HONGLUT ZEL
Dorced huhna mimal, pawl min, inkuan leh unau min a pang tampi i omta hi. Amaute khenkhat in khateng a amau kingapzah a pia om, a lom a pialeng om a tuni tan sunzomtou ngitngette ziak in Pathian min in kipahthu i gen hi. Huan Pathian vualzawlna tangtou zel i hihdan phawk in a pethak ding mi hong kibehlap zel a Toupa min i phat hi. Pathian in petute tamsem in hon vualzawl hen.
Tukum a pethakte:
1. Nu Hauzavung Hebron EBCC in Rs 500/- per month January a kipan.
2. Dr. Nengthankham & family Hebron EBCC Rs 1500/-