Tulai in Tuailaite lak ah, kim-le-pam apan nawkna leh kaihna nidang lai a om ngeilou tanpha ahong tam mahmah hi. Tuailai tampite a vom lah hilou, angou lah hilou, sat lah sa vetlou, vot lah vot vetlou in lum pelhpulh in a om uhi. Huchihlai in Tuailai nungak leh tangval Pathian lam a pang a, Khrist a dia chituam ngam tampite ziak in Pathian min ka phat hi. Tuni in Khrist adia hattak leh hangtak a i kalsuan theihna ding leh Khrist adia i chituam ngam nading a poimoh i sak khenkhatte kikum leng i chi hi.

I. Hihna kitheihchetna:

1. Kha a Hinna (Live in the Spirit): Hotdam i hih lai a Khrist tungtawn a hamphatna i tante theihchet ding ahi. Khrist nungzui i hihtheihna ding a poimoh masapen tuh pianthakna (hihna leh dinmun kikhekna) ahi. Khrist toh a sihna a kilhlup khawm, vuikhawm, leh Khrist toh hinna thak a kaihthoh khawm hita i hi chih theihchet ngeingei ding ahi. Tua in khelhna nna semnawnlou ding a, misi toh kibang a omna a gen a, hinna thak ah bel Khrist toh hingkhawm i hihdan a hon muchian sak mahmah hi (Rom. 6:6,11). Khrist Jesu a Hinna Kha dan in khelhna leh sihna akipan hon suakta sakta ahihman in sadan a om ding in sa lak ah bat i nei nawn kei a, pumpi thilhihte Kha a hihlum zel a hing ding a siamthak hita i hi. (Rom. 8:2; Gal. 5:16). Laisiangthou in, “Kha ah om un, huan sa-utna tuh na hih tangtung kei ding uhi” a chi hi (Rom 8:17).

2. Thutak a Hinna (Live in the Truth): Thutak a hinna chih i hinkhua leh omdan, kampau leh tatdan a Khrist hangsan tak a gupngamna ahi. I taksa leh pumpi tung a khelhna vai hawmsak nawn hetlouh ding ahi. I pumpi hiangte zong khelhna vanzat ding a piak phal nawn louh ding, himahleh Pathian dikna vanzat ding a piak ding hita ahi(Rom.6:12-18). I pianthak ma a, sahiangte nitna lak leh tatlekna kiang a sikha dia i piak pen tawpsan a, siangthou nading a dikna kiang a sikha ding a i piak ding hita ahi. Jesu Khrist in thutak a hing ding leh Amah a zungkai leh lamtouha om a, ginna a kip leh muanhuai ding ban ah kipahthu genna a hausa ding in Toupan a hon deih hi (Jh. 8:31-32; Kol. 2:4-11; Efs. 4:13-16).

II. Khrist adia hattak leh hangtak a kalsuan a hingngam mikhenkhatte:

1. Pathian vaukholhna chiamnuih bawl a simmohte palzut a thudik leh diktatna a dingngam Noa a om hi.

2. Khovel pilna leh hauhsakna leh ama nopsakna chiangtan lel a omna apan Ginna a hangsantak a kalsuanngam Abraham a om hi.

3. Tuailai a guk a numei pasal kal khelhna hih zeuhzeuh siam mahmah tampi a omlai in Joseph Pathian ading in hangsantak in a pangngam hi.

4. Tuailai khovel thupina leh minthanna delh a taisia tampi a omlai in tuate nusia a Khrist ziak a a mite toh hihgentheih telzaw Mosi a om hi.

5. Tuailai a tamzaw chihdandan hoih himailou hia? chia khovel pilna in a hipmang tampi aomlai in a neih uh Pathian min a hangsangtak-a ding ngam Joshua leh Caleb-te a om uhi.

6. Tuailai ginna zuausan a milim bia a kun sang a meikuang a haltum telzaw, milem be dia thupiak nialngam Hanania (Shadrak), Mishael (Meshak) leh Azaria (Abednego) a om uhi.

7. Tuailai nek leh dawn a buaisia tamtak a omlai a atuam a om ngam Daniel a na om hi.

8. Nungak tampi Jesu mel suhem leh mi sesak tampi a omlai in Jesu ziak a gensiatna leh daina thuak leng poisalou a hangsantak a kalsuan ngam Mari a om hi.

9. Kumpi nasepna a chihtakna tamsam a khovelmitak a om tampi a omlai un, sorkal nasem Pathian leh amite adia a phattuamngai Nehemia a om hi.

10. A gilpi leltak uh buaipih a nei thugenmi tamtak a omlai in Khrist adia bangkim tanngap a, a sihna leh a hinna a Jesu pahtawi Sawltak minthang Paul a na om hi.

III. Hattak leh hangtak a kalsuanna adia hon dalthei khenkhatte:

Jesu Khrist nungzuihna ah lamet louhpipi, lametlouhna lamlam ah demna leh haksatna tampi tuahkhak theih ahi. Christian hinkhua kichi kimawlna phual hilou in kidouna phual (sa deihna leh kha deihna) a omna toh kibang ahi akichi hi. Gingtute tuh Khrist sepaihte i hi ua, melmapa Diabol toh khalam a kidou te i hi uhi (I Pet 5:8-10; Efs 6:11-17).

1. Khrist ziak a huat a omna ziak a lunglelhna: Jesun vantung a a kahtouh dek in a nungzuite kiang ah mangpha khakna in hiai a gen hi, “Khovel in a hon huat leh hiai chiamteh un, Noute a hon huat ma in kei a hon ho khinta uh ahi..” a chi hi. Chihtaktak a na pan nop leh gensiatna leh engbawlna na thuak tham tham ding hi. Na lawm hoih pen leng na taan maithei himahleh Jesu lawm hoihpen nei na hi chih na mangngilhlouh ding ahi.

2. Khovel toh kituak lem ding a zolna: Mosi leh Aron ten Faro mai a a tuah bangbang uh tuak thei gige i hi. Melma pan ama gamgi kual ah kilawm tak in honzol gige hi. Khovel dan bang in omkei un, khovel it kei un chih ahi. Himahleh melma in khovel toh kilem ding in a hon zol gige hi. (I Jn.2:15-17; Ro.12:1-2). Kuaman tounih nna semkop theilou ding i hi.

3. Diklou tak a demna leh ngohna ziak a lungkiakna: Dikloutak a demna leh ngohna tuah theih ahi. A diklou a demna ahih lai teng poi kei a himahleh, adik a hihkhak ding lauhuai mahmah ahi. Pathian thu in “Thil hoihlou hihte ziak in kihih lungkham nuamdah inla, dikloutak a hihte leng eng ken..” a chi hi.(Sam 37:1-3). Joseph in ahinkhua ah diklou tak a ngohna a na tuak hi.

4. Valnou duhgawlnate a zolna: Tuailai hun a zolna mi tengteng in a tuah uh zek zatkhelhna ahi. Hon it leh hon ngai mahmah apan hiam, nang na deih leh nangaih mahmah apan hong tung thei ahihman in dou a haksa mahmah hi. Laisiangthou in, “Himahleh valnou duhgawlnate khawng taisan inla, lungtang siangthou a Toupa lou peuhmahte lak a diktatnate, ginnate, itnate, lametnate delh in” chi’n a hon hilh hi.

IV. Khrist adia hattak leh hangtak a i kalsuan nading a poimohte:

1. Biakna lam ah: Tulel a tuailaite tunung a saptuam heutu leh makai ding i hi. Khangthakten biakna i limsak mahmah ding uh ahi. Bang ziak a biakin kai tawm deudeuh i hia? Biakinn ngaihnatna leh lunggulhna i neih ngeingei ding ahi (Sam 84:1-12). Laisiangthou sim leh thumna i hinpih ding uh ahi.

2. Laisimna lam ah: Tuailaite a tangpi in laisim laite i hi deuh vek uhi. Pathian pilna bul ahi. I gam leh nam i kiakniamna pen uh laisimna lam toh kisai ahi. “Amah hihlungkim mi kiang ah Pathian in pilna leh, theihna leh nuamsakna a pe ngal a:” Laisiangthou in a chi hi. Mitaima khutten vai a hawm Paunak in a chi (Eklj. 2:26; Paunakte 12:24)

3. Nasepna zonna ah: Nasepna zonna ah i hihna kimangngilh mailou in diktatna leh siangthouna delh mahmah leng uthuai i sa mahmah hi. Nasepna himhim aniam lua leh asang lua a omkei a chihtakna leh ginomna a poimohpen ahi. I sepna peuh a ginom leh muanhuai in sem le’ng Khrist adia theihpihtu muanhuai hithei ding i hi.

4. Khotang vai ah: Tuailaiten khotang vai ah poimohna lianpi i nei uhi. Khotang a sia i chih chiang in huai khotang a kibual tuailaite genna ahi deuh hi. Bangchi bang in khotang ah kipiakna (contribution) na nei a, ahoih lam ah maw aselam ah?

5. Kiteenna ah (Numei pasal kal ah): Kiteenna Pathian phuhkhiak ahi a aman a namkip, hoih asak mahmah zahtak ding a chih ahi. Himahleh tulaiin tuailaite lak ah kitenna thangbawl in a ommun mahmah a poi i sa hi. Kitengzual in kikhenpah, huchiloute leng hiai bang khelhna a kibual tampi om kha thei ahi.

6. Nek leh dawn ah: Nek-le-dawn thilchin zongzat hoihlou (khamtheih/drugs chi himhim) toh kisai tuailaiten hangsantak a i palngam ding ua hoih ahi. Pathian in nek ding leh neklouh ding thu a gamgi kichiantak a na khung khin ahi. Valnou duhgawlnate taisan un chih ahi.

7. Kicheina leh omdan (Dress & Fashion): I silh leh i teen in ihihna gen kha mahmah hi. Kizepna ah a leklua leh a tuantual lua chih om thei tuaktuak hi. I sam leh i mai i buaipih tuk in thildang khat buaipih leng bang a chi dia? Mobile phone zatdan ah leng pilvanna ding tampi om hi.

Conclusion: Khrist adia hattak leh hangtak a i kalsuantheihna i kim leh kiang a i kisukkhakpihte leh i hun zatdan in thu pomah mah ding ahi. Khrist in a thuzoh sang a, Mobile phone in a thuzoh, TV in a thuzoh , Computer in a thuzoh, Internet in a thuzoh, khamtheih in a thuzoh leh nungak/tangval in a thuzoh tampi omthei ahihman in, eimah mimal dinmun chiat kisuithak in Khrist thuzohna nuai ah kipelut thak chiat ni.