Kum 2021 a kha nihna February hon musak nawn i biak Pathian min in simtute itna chibai kon buk hi. Tutung in ‘Ngaihdamna a hamphathuaidan’ saulou in kikum ni.

Jesu’n mite kiang a a thugen thupi, lungmuanhuai, lamdang leh kipahhuai mahmah tuh, ‘Na khelhnate uh ngaihdam ahita’ chih ahi. Ngaihdamna in thil thupitak ahihthei a a lehlam ah ngaihdam louhna in leng thil ahihthei: a thilhihtheihdan uh bel kibang lou ding hi. Mi kuahiam i ngaihdam kei leh ei-le-ei lung nuamlou in lungsim damlouhna kineih loh hi. Ngaihdamna tuh eimahmah lungsim tawldam a omtheihna ding a lampi omsun ahi. Huaiziak in na hinkhua paitou zel ding a na lungsim a tawldam theihna ding in na tung a kuahiam khat in na lungsim nasak a sepkhelh bawlkhelh a neih tak leh leng na ngaidam mai diam? Ngaidam theilou a i om lebel eimah lungsim gim a, khial a i ngoh pen in hon lehzoh dimdem in lungsim leh ngaihtuahna hon liamsak behlap hi. Bangziak a ngaidam ding, thil hihkhial in tuh a khelh man a muh ding ahi i chi maithei.

I tung a khialte i ngaihdamna ding ziakte:

1. Eite leng ngaihdam i hihtak ziak in (Kol. 2:13-14).

2. Toupa’n hon ngaihdam ziak in i ngaidam ding ahi (Kol.3:13).

3. Ngaihdamna in hunlui a kisiatna, kikhensate hon kilemsak nawn hi (Gen.50:17).

4. Ngaihdamna tuh itna lampi a hi (Luk 7:47).

5. Hihdamna a poimoh mahmah, himahleh ngaihdamna masa lou in hihdamna omtheilou hi (Luk 5:17-26).

6. Pathian in phuba la ding leh ki haza tuah ding a chikei a, ngaidam a ki-ittuah un hon chi hi (Lev.19:18).

John McArthur in, ‘Khristian hinkhua ah thildang tengteng sang a poimoh pen tuh ngaihdamna ahi – en midang i ngaihdamna leh Pathian in eite hon ngaihdamna’ chi’n a na gen hi. Khristian hinkhua a ngaihdam a omna tuh hamphatna bulpi leh thupi penpen ahi. Pathian in i hun paisa, pailel leh hong tung zel ding ah leng honngaidam ahi chih theihchetna kinei pah hi. Amah toh kizopna chidam, zalentak a kithuah a om ding in i khelhna, gitlouhna leh mohtan theihna tengteng a kipan hontan ding in a tapa Jesu Khrist hon sawl hi. Sawltak Paul in a gen bang in: i sik-le-tang in, ‘Amah Khrist a noute hinna nak ahi; Pathian in Khrist i pilna, i diktatna, i sianthouna leh i tatna hiding in a bawlta hi’ (1 Kor. 1:30). Thupi in lamdang lua! Hamsia a kipan setan thuneihna leh zuau a khemna te a pan hon tankhia hi (Gal. 3:13). Setan in Adam leh Evi khem a lungbuaisak in khovel ah sihna tun in Pathian toh kizopna tansak hi. Himahleh Jesu Khrist tungtawn a kizopnawn theihna honbawlsak in hinkhua manpha sem a zangtheidin khelhman pia in hon ngaidam ta hi. Khelhman bat tengteng Jesu’n pekhinta a ‘TA’ hihna tangte i hita, Khrist toh gouluahkhawm ding hita i hi. Unau, tuabang hamphatna tang thei din Toupan hon vualzawl hen.