Ka Tuailaipih tengteng Kumthak Chibai!
Pathian hehpihna, ompihna leh makaihna ziak kia toh kum 2020 haksatna tampi toh zang mualsuah in kumthak 2021 i zuih leh tot ngeilouh kum bul ah i ding a, manglam bang hial hi. Kum paisate ngaih huai e chih vungvung nading om ding in a gintak huai kei hi. Himahleh lam-etna thak toh kipan thak thei ding a hun manpha leh hun kipahhuai hon musak Toupa min phat in Amah Thupina i pia hi.
Tukum bangchi zat ding? Banglam a kalsuan ding? Khovel in bang hon pokhe diam chih i theih louh lai a i mangngilhlouh leh theih dia hoih tuh ‘Pathian in Nang a bang tup nei ahia? Nang bang tum?’ chih kidong le chi i hi.
Thiltup nei a siam na hi:
Mihingten bangziak a siam a om ka hia? Honsiampa’n bang dia hon zang ut a dia aw? i chih dia hoih mahmah ahi. Pathian in lei leh van a mi simseng louh neita a keilou a kisam a kisakna bang ahi peuhmah diam? chih zon khiak kul ahi.
Nang tungtawn a poimoh a sepkhiak ut man a, nang siam khiakna dia na nulehpa a na kitengsak ahi, ahih-ziak in na nulehpa kiten ziak a piang na hiphing kei. Na nulehpa’n hon poimoh ding man ua siam leng na hikei a Pathian in hon poimoh mana hon siam na hi. Nu leh pa poimoh ziak kia a siam hitaleng ta nei louten ta poimoh lou uh ahi kei zel hi. Na hinkhua a Pathian in thiltup khat nei a honsiam ahi, huai thiltup na ngaihtuah in hon siamtu Pathian na dong kha ngei hia? Lung leh ganhing bang a mawk hin maimah na hihleh hon siampa’n hon siam na san sem khalou hikha thei na hih man in ana ki-en thak mah di unau...
Hon deih bikna:
Kuamah nang bangbang a om nai kei a, na mizia, na lungput, na gamtat, na mit hahdan, na kampau, na lunglutna; midangte nang a toh kibang chet a om louhna tak ahi na poimohna. Pathian in hiai mi siamkhe leng a gamtat phakna tantan ah kei hon pahtawi dia ka misiamsa tampite lakah kua ka hihiam chih hon pulak ngeingei ding chia hon lamet i hi. A hon deihbikna theihsuah tum in, a ziak neia siam na hi a, Pathian a pawng gamtat het kei a nang leng khut lehlawi a hon siamkhak zenzen na hi kei hi. Na hinna in hon siamtu a pahtawi ding ahi, nang tungtawn a Amah kipahtawi ut ahi. Amin pahtawi tu na hi hia ahihkeileh a min sesak tu?
Jesu hon poimoh dan:
Van khawpi a mitam in a khamuansak zohlouh khop a hon poimoh na hitel hi. Nang lou a tua khawpi luah utlou a singlamteh a kikhailum hitel ahi. Nang ziak in bangpi na kisalou zong in Toupa’n nang poimoh honsa lua hi, a taktak in bel aman hon poimoh sangtham in en amah i poimoh zaw tham hi.
Hiai thute na sim toh kiton in na lungsim put dingdan bawllem in. Ka damsung leh ka khang omtou zel ding ah bangchin plan ka bawl dia? chi kenla, Pathian in ka damsung leh ka khang paitou zel ah bang tum ahia chih zonkhiak sawmzaw in. Tua hileh na lohchin hun in Toupa adia lohching a hipah dia Pathian in nang a thiltup aneih muhkhiaksak na hidia na kipahna a bukim ding hi. Pathian in hon pompihsa sepkhiak sak a lohchin tum inla, na hih peuhmah Pathian in hon pompih ding in thuzoh mawk tum ken. Midang hihtheih hetlouh a tuam liuliau piaka na om zatkhiak in hon siamtu hon poimohna bik ngahsak in.
Na lohchinna enpha in:
Lohchinna chituamtuam ah na lohching ahimaithei, company a manager te adin, society a leader te adin, politics a nam leh gam khantouhna din, sum bawlna a nei tamzawte phungvuhna din, siamsinna a khovel poi-mohna mu-suah ding in. Kuahiam a thiltup a lohchingsaktu lel na hih a, pahtakhuai leh kizenpi na hihlai in honsiamtu hon siamna san suk buchinsak khalou na hih zenzen inzaw (Gen.6:5,6) Toupa’n mite gitlouh dan thupi leh a lungtang uh gitlouhna lam a ngat ngitnget a theih in a kisik a lunggimna’n a neih loh a chi hi.
Unau simtu it, Toupa’n nang a atup bang hiin na theihpih a? Nang a athiltup sepsuahsak hiin na kithei hia? Zonkhiaksak na tum diam? Hon poimohna zah na na theihpih ngei hia? A kisikna mi na hi maimah diam? Ana kingaihtuah thak inla tukum na kalsuan a bul a pan na hih man in Honsiamtu deihna bang a hinkhua zang ding in pan non lathak diam?