Khovel buaina leh hatsatna tampi kal ah leng Pathian in hon taisan lou in a hon ompihna leh makaihna ziak in aneu-alian ateek-akhang in i ngaklah Khristmas hunbi tung nawnta a Toupa min phat in hong piang a eite khelhna apan hon tan ding Toupa Jesu Khrist min in Chibai.

Tutung Khristmas zatna ding ah bangchi bang in na kisa khol de aw... Kum dang in bangchi bang in na zang jel a? Tukum in bangchi zat sawm a kisa khol a panla na hihiam? Mang pianni lopna ding ah kisakkhol dan lam tuamtuam om a, tuate lak ah Khrist michih lungsung a hong pian theihna ding in i na kisuk siang poimoh mahmah hi. A siangthou Mang Jesu na hinkhua ah hong piang hen na chih leh nang leh nang tua bang a hong pianna ding a na kisuk siang masak ngai ahi. Huai Khrist hongpian theihna dinga kisak kholna i neih lai in bang a i ngaih poimoh pen chih kidot tuak mahmah hi. A Khrist pen hia ahihkeileh hiai hun paulap a party leh nop bawlna tuamtuam te buaipih i hihkhak ding lauhhuai mahmah ahi. Huan i lungsim leh pumpi Jesu Khrist pianna ding a i chei mawi leh i zunthak leh kep siangthou poimoh mahmah ding ahi. Tua bang a kisak kholna i neih chiang in Khristmas i lopna tungtawn in i muh ding leh i piak khiak ding om ding ahi.

I. Khrist pianna ding a lungsim a siangthouna:

Matthai 5:8 Lungsim a siangthoute a hampha uh; Pathian mu ding ahi ngal ua. Pathian in nang leh kei hon tatna ding a lampi hon geelsak a tapa honpiak ni chia i na chiamteh Khristmas hunte hongtun chiang in ah lungsim taksa pumpi a siangthouna poimoh ahi, hong piangpa leng Siangthou ahihman in. Pathian i muh ut leh lungsim siangthouna poimoh ahi. Heb 12:14… huai siangthouna louin kuamah in Toupa a mu kei ding uhi.

II. Ngaih poimoh a kisakkholhna:

Khrist hongpianna vaidawn ding a i kisakkholh lai in bang a de aw i ngaihpoimoh pen, kicheina ding silh leh teen, van thak hia? Inn leh Biakin chei chihte hia? Party leh nop bawlna chihte hia? Sa(Ankuang lui ding) chih te hi hia? Hiaite a sia chi hipahlou in hiai bang khovel nopsakna vai a thilten hon luah dim a i ngaihpoimoh pente ahong hih leh Jesu pian dek lai a Bethlehem khuate i bat khak a Jesu Pianna ding a ei a mun i neih louh khak ding lauhhuai sa mahmah i hi. Laisiangthou in A gam leh a diktatna tuh zong masa jaw un, huchiin huai teng tuh a honpiak behlap ding hi. Matt. 6:33. Hiai bang in i lungsimte a na kisa khol in kongte hong in ‘Aw Khrist tuni’n kou lungsim bawng inn sung ah hong piang nawn in’ chi in thildang bangmah in hon buaisak kei leh i chi mahmah hi.

III. Thilpiak muh leh Piakkhiak in kisakhol ni:

a. Thilpiak imuh:

Hiai bang hun nuam leh kipahhuai hun in a kua kua kideihsakna leh kingaihnatna in thilpiak chituamtuam i kipia ua manpha mahmah. Huchi ahihlai in mi khenkhatte tua bang a thilpiak dongkhalou leh kuaman le a phok khaklouh uh mi tamkhop ki-omsek hi. Huchibang hun in a dongtu na hihleh nuam leh lungkim huai na sa mahmah dia himahleh a kua phok khollouh lam a na om khakleh khasiatna ding tam mahmah ding hi. Himahleh Pathian michih a kibang a thilpiak honpiak thilpiak thupi leh manpha penpen i Toupa leh Hondampa Jesu Khrist ahi. Johan 3:16. Banghanghiam chih leh, Pathian in khovel a it mahmah a, huchin a Tapa tang neihsun a pia hi, huchia kuapeuh amah gingta tuh a manthat louh a, khantawna hinna a neih jawkna ding in. Hiai bang thilpiak sum a lei zoh ding hilou, i hoihna ziak a muh/tan ding hileh tangkha lou lai ding i hih lai a tan kibang a hamphatna hon pia Pathian tung ah kipahthu i gen zaw hi. Thamlou in huai thilpiak i don pen in thil thupi tak hon sepsak in i khelhna saltanna apan in suahtakna thupi, suahtakna lamdang hon bawlsak lai Toupa min phat in om hen. I hamphatna sawnsawn uh hiai ahi “Amah a mite kiang ah a hong a, amah a miten a na kipahpih kei uh. Himahleh, amah kipahpih-a pom, a min gingtate, tengteng Pathian tate suahtheihna a pia; huai mite bel sisan suan ahi kei ua, sa deihna suan leng ahi kei ua, mihing deihna suan leng ahi sam kei ua, Pathian suan ahi jaw uhi” (Johan 1:11-13). Pathian in Ama lampang ah sep ding leh piak ding bangbang hih bukim zouta ahih man in tua thilpiak pen nang na sang kha ta hiam? Sang nailou na hihleh, unau, nang leng tutung a huai thilpiak sangthei ding in ana kisa khol in aw.

b. Thilpiak piakkhiak:

Pathian in a neih sunsun a tapa hon pia a, tua tapa in tangtawn hinna hon pia hi. Nang bang na pethuk dia chih ahi. Kumpi David in Sam ah Sam 116:12 Ka tung a a thilhih hoih tengteng jiakin TOUPA kiang ah bang ahia ka piak thuk sam ding? Unau tutung Khristmas zang ding a kisakkhol lai in Pathian in na tung a hon hihsak mangngilh lou a nang leng kuahiam tunga thil hoih nasep sem thei na hihman in na hihtheih bangbang a midangte tung a na hoih sep leh thilpiak na pe thei diam? Kuahiam tung a na itna leh nahoih sep na taklat in a hinkhua a gen nei mahmah hithei ahi. Na silh na teen lui nang lah na zat nawn louh kuahiam in ana phattuam pih ding na nei mahmah ding? Pathian in zaw a neih sunsun hon pia nang leh ken i neih sunsun le chi khang himahleh i neih val kuahiam in a hamphatpih khakleh tutung Khristmas in tua bang na hoih sem ni. I tuailaipih mi tamtak te silh leh ten ding neilou, nek ding ann hoih le neilou te tung ah, lawm hiai ka Khristmas gift i chi thei hia? Khristmas hun in i lawm i vual lamlian dung a omte, Hospital a om te, Rehab center a om te kiang ah Committee min in Khristmas thilpiak in i zatpih thei diam? Na hih utleh hihtheihna ding a Pathian in hun hon honsak ahi. Lak sang in pia in lukhong a nei zaw. Kuahiam tung ah itna leh awlmohna langsak ni.

Kumdang banglou deuh in tutung Khristmas eimah kia kibuaipih a kicheina leh hunnuam a mawkna a zangbei mai dia kisakhol lou in kua hiam tung a nahoih khat sepna hun a zang ding in kisa khol leng ut huai mahmah mai hi. Tuailai midangte a ding extra mile kal i suah khe thei diam? Laisiangthou Matt. 25:35-40 Ka gil a kial in, nou nek ding non pia ua; ka dang a tak in, dawn ding non pia uh; mikhual ka hih in non zintun ua; vuaktang ka hih in, puan non silhsak uh; ka chi a nat in, ka kiang a na hong jiak un, a chi ding. Huai hun chiang in, mi diktatte’n, Toupa, Chik in ahia gilkial a kon muh ua nek ding kon piak uh? Dangtak a kon muh ua, dawn ding kon piak uh? Chik in ahia mikhual a kon muh ua, kon zintun uh? Vuaktang a kon muh ua, puan kon silhsak uh? Chik in ahia china in hiam suangkulh ah hiam kon muh ua, na kiang a ka hong uh? chi in, a dong ding uh. Huan, Kumpipa’n a kiang uah, Chihtaktak in ka hon hilh ahi, Hiai ka unau neupente lak a mi khat tung a na hih uh tuh, ka tung a hih na hi uh, chi in, a dawng ding.

Kuahiam tung a na hoihsep Pathian in ka tung a hih na hi a chihthei in i tuailai pih kua hiam tunga hiai bang nna hoih tutung Khristmas in a semkhe tu a pang thei din pan la thak ding in i kichial hi. Pathian in hon makaih chiat ta hen.