Lemna Pathian neitu hihna mite kiang a latsak ding
“Lemna bawlte a hampha uh; Pathian’ tate chih ding a hingal ua” Matt.5:9

Pathian hehpihna toh natna hileng hattak nuai ah kepbit a om in December kha mel muthei a i omnawn man in kipahthu i gen hi. Dorcas Corner simtute Toupa Jesu Khrist min in chibai konbuk hi.

I Laisiangthou changtel, “Lemna bawlte a hampha uh” chih khatlekhat kihasuantuahna lel gen hilou in, i niteng hinkhua sun leh zan dakkal chih a tawpni neilou a vakna a hing ding a hamphatna tang ding a sapna ahi. I Toupa Jesu’n tangtung a mipite leh a nungzuite kiang ah Khristian, Khrist nungzuite hihna, midangte toh kibanglou hinkhua zetuam biik a neih dingte uh leh gingtute a dia Pathian gam lamentak a ngakkawm in kipahna thupi a tandingte uh gen hi (Mat.5:3-9). Tuate lak a lemna bawlte tanding ‘Pathian tate chih ding’ ahi. Aziak bel Jesu Khrist tatna tungtawn in lungsim thak piak a om in khelhna sal a kipan suakta in Pathian toh kilemta ahih man un. Ginna tungtawn a Jesu Khrist muangte’n Pathian gam luah ding ua a Tangtawn kipahman uh Pathian ‘TA’ hihna a hi. Tua kipahman a tan uh amaute ading in hamphatna leh kilemna, Jesu Khrist ginna leh muanna genchetna hipah hi. I gennop tuh Pathian lemna bawltu, thuneihna sangpen nei hi a amah toh i kilem leh amah inkuan ah telkha kihita hi.

Lemna bawlte tuh Pathian in khovel khelhna a puksate amah toh kilemding, pikikding a a mizatte ahi uh. Ei Khristian gingtute ginna tungtawn a Pathian muanna toh lemna bawlding a mohpuakna piak a omten khelhna a puksate Pathian toh a kilemkik, a lungtang ua khamuanna a neih nading ua pan lakding ahi. I niteng khosakna ah haksatna, lungngaihnate, natna leh sumlepai giautaunate hongtung in i khosakdan kikhek mahleh Khristiante a thuchiam ah muang in ahatna thagui ah kihihhat ni. Hiai in i kha ading a muanna honpia in, Pathian ah khamuanna leh amah toh kilem a omna banah midangte toh kilemthei ding a hon pi ding ahi (John 16:33; Phil.4:7). Toupan simtute lemna bawl a Pathian ‘TA’ hihna hamphatna tangchiat ding in leh lemna Pathian neitu i hihna midangte kiang a langsak thei ding in honvualzawl hen.

DORCED: Mr Thangremzau Gilgal, Mimbung, Mizoram in Dorced Student Ebenezer Academy ah Class XII passed in, incentive cash award Rs 3500/- sang hi. Dorced in hon chawm a hiaitan tung ka hih man in kipah etsakna in Dorced huhna ding chi in a sum san teng hon pia hi. Toupan maban a sin touh zelna ding ah vualzawl in ompih zel hen aw