Pau. 31:20

Pathian hoihna leh kepbitna ziak in tukum beikuan November kha muthei nawn a i omman in kipahhuai mahmah hi. Dorcas’ Corner simtu tengteng Hondampa Jesu Khrist min in chibai kon buk hi.

Atung a i Bible changtel numei hoih hihna tampite lak a khat ahi. Tua numei hoih in tuh ama’ inkuanpihte kia hilou in midangte panpih ding lungsim ah vomden hi. A lungtup, a thahatna leh a lunggelte ah genthei zawte leh panpih ngaite panpihna khut zankhe ding a Pathian in a niteng hinkhua a atuahkhakte semsuah ding in mansa in om hi. Mahni insung a a pasal, a tate leh inkuante hoihtak a kepna kia ah lungkimhuai huntawk salou in, midang nektak haksa sa a kivak zouloute kep leh panpihna piakding a mohpuak theitel mahmah hi. Genthei leh tasamte a hehpihna leh itna tuh kamsiamtak a genthoh mai hilou in Pathian leh mihing mitmuh a hoih leh kilawm in lainatna toh a tak in semsuah zel hi(Pau.3:27-28). Laisiangthou in, ‘Ka ta deihthohte aw, a thu leltak, a hih kei leh, lei leltak in ki-it kei ni. Nasep thilhih leh thutak in ki-it zaw ni’ (I Jn. 3:18) a chi hi. Numei hoih in itna diktak tuh a thulel leh kam a genthoh lel hilou a, thilhih leh thutak a sepsuah ahi chih theichian hi (IJn. 3:16-18). Pathian hehpihna leh a hehpihna tangte i hihngal leh eite’n leng gentheizawte hehpihna leh lainatna nei a Pathian in vualzawlna honpiakte amaute pia a ahaksatnate uh dawnzangkhai thei dia kipat hunta hi.

La i sakzel bang in, ‘Neih man a piak hilou a, phalman a piak hizaw hi’. Pathian, sa mahmah a hongpai in nang na hauta a gentheite pia in chi a a tuam liauliau a hontheisak khollou ding ahi. Himahleh tu-le-tu a a hon vualzawlnate ngaihtuah lechin tasam a hon koihlou a chidamtak a niteng nasep semthei a honpidan ngaihtuah mahdih, insakte, inkhangte hiam a gamla zawdeuh theihngeite hi chitchiat khol kei mahleh pekheding in na lungsim ah thupukna bawl in semsuah lechin Pathian lung tuahna hizaw ding hi. Pathian vualzawlna donglou kuamah kiomlou ding hi. A hi a deihkhop chih leng omtuanlou a deih a tang toutou utlai ding i hihman in Pathian thupiak i hih teitei ding a chihte semsuah ding in hanchiam thak leng i chi mahmah hi. I gamsung, insung a sanggamte leh tanau laina a zawngte, a tasamte lam a thilphal ding a thu honpia ahi. It pipi hilou a phaltak a piak ding hilai, tuabang a i hihleh Tangtawn Toupan i nasep khempeuh leh khut ngakna khempeuh hon vualzawl lai ding ahi (Danp. 15:10-11). Simtute, a zawngte lam a khut zankhia a, tasamte tamsem a huhthei ding in Toupa’n hon vualzawl hen.

DORCED HUHNA
Unaupa Phungchinthang leh a inkuanten Thanlon apan in mehgah hon khak uh sumsuah in Rs 450/- Dorced huhna ding in hon pia uhi. Toupa’n tamsem in vualzawl hen aw.