Michih in it pipi a pelou in, piaklouh theihlouh a ngaihtuah a petuanlou in, a lungtang ua a tup bangzel un pechiat uhen; Pathian in kipaktak a pemite a it hi. Huan Pathian in hehpihna chiteng in na tung uah a vukthei ahi; huchi in nou bangkim ah a hun ngial nei gige in, nasep hoih chiteng ading in na hau thei ding uhi (2Kor. 9:7-8).

Pathian ompihna toh kha kuana September kha tan damtak a muthei a i om man in kipahhuai i sa hi. Dorcas’ Corner simtute tengteng Toupa Jesu Khrist min in chibai kon buk hi.

Laisiangthou in ‘Pia un, huchi in piak in na om ding uh’ a chi hi. Khristiante hun leh neih-le-lam, sum-le-pai i neihte pekhe ding a thilphal dingte i hi. Pathian in duh-aam leh enna toh khosalou a huaite nuaisiah a thilpiak hau a hing ding in hon deih hi. Neihman a piak hilou a phalman a piak hizaw hi. Midang genthei leh haksa zawte panpihna ding in thilpiak tuamtuam- sum-le-pai, nek-le-tak, silh-le-ten, in-le-lou leh adang tampi in i huhthei hi. Sawm-a-khat Pathian in piak ding a chih Khristian gingtute ading in piak teitei ding a hon phut ahi. Tua ban ah saptuam kilawikhawmten thohlawm chituamtuam Pathian gam nasepna ding in i pethei zel hi. Paul in Korinthte kiang ah piaklouh theihlouh a ngaihtuah ziak a petuanlou in , lungtang a tup bangzel a piak ding, Pathian in kipaktak a pemi ahi a it chi’n a na gen hi.

Kipaktak kawm a hehpihna leh itna toh thilpiak tuh Khristian thilpiak in a tuppipen ahi ding ahi. Hehpihna toh thilpiak i chih tuh Pathian in ei suikhiak vuallouh leh theihsiamna khen ah, neihman leh hauhman leng hituanlou in hon hihbuching sakthei zel hi. Amah hon hihhatpa Khrist ah thil tengteng ka hihthei hi (Phil.4:16).

Huai tuh Pathian in vualzawlna sum-le-pai hon piakte hoih a sak bangzel a pungsakthei ahi. Masidonia miten gentheihna leh haksatna tuak mah le uh itna leh hehpihna toh midangte panpihthei uhi. Khristian minpu in tuh sum-le-pai a neihdan zil in piak didan ngaihtuah a himahleh Khristian khalam a thuktak a hinkhua zangten bel Pathian kiang ah a piak ding uh ngen in thum uhi. Pathian in sawm-a-khat kia piak ding poimoh sa hilou in vualzawlna a honpiakte zang a ei tungtawn a a thilhihtheihna thupi i muh ding deih ahi. Hehpihna leh lainatna toh kidim a thilpiak pe ding a lungsim kimanna toh i omchiang in Pathian hoihna leh vualzawlna kichiang tan chih omlou in kidong thei ding hi. Lak sang in piak in lah lukhawng a neizaw ngal a. Thilpiak hehpihna toh pethei ding in Toupan simtute hon vualzawl hen.