Chituam ngam i chih chiang in Sap pau in dare to be different a kichi a, huai in a gen omzia tuh midangte’ omlouhdan, thilchiin louhdan ahihkeileh gamtat-khohei louhdan a om ngamna, huai bel hangsanna genna ahi. Huchi ahihleh tuailai chituam ngam i chih chiang in bang genna ahi nawn leuleu dia le? Tuailai chituam ngam i chih nawn chiang in tuailai khat a tuailai pihte gamtat-khohei leh thilchiinte uh, abiktak in thil hoihloute chiinglou a, lawmte lak apan kikoihtuam (hihlou ding a hangsantak a pang ngam), chituamtak a om ngam chih gennadan ahi. Tua ahihleh, i-kiim i-kiang a mite leh i lawm leh vualte’n hiai khovel nopsaknate leh diktatlouhna toh a hinkhua uh zang mahle uh, ei Khristian tuailai kichite’n tuate bang a i hinkhua zang lou a, siangthoutak a hinkhua zang ngam a i om chiang in Khristian tuailai chituam ngam a kichi hi. Jesu Khrist nung zuihna ah nungzui muanhuai leh diktat hih theihna ding in chituam ngamna kul mahmah hi. Tua mah bang ding a Pathian in eite hon sap mah i hi uh chih leng theih ding in a poimoh hi.
Tulai i gamsung dinmun leh saptuam sung mahmah i et chiang in tuailai diktatna gum leh Pathian deihdan toh kituakloute apan kihemkhe ngam ding tuailai kitasam mahmah hi. Daniel leh Paul bang a melma mai a leng Pathian thukhun palsat lou a ding ngam leh huai tungtawn a i kiim-le-kiang a mite’n khalam mitvakna neihloh hialna ding ua chituamtak a hangsan ngam tuailai hih i tup ding ahi. Huchi ahihleh bangchidan a ei tuailaite chituam ngam hithei ding? Huai ding a i vanzat poimoh dingte tuh thuumna leh Laisiangthou hong hipah mai hi. Thuumna leh Laisiangthou a kibulphuh mi himhim in khemna a dou zou ding a, Pathian deihdan bang in siangthou hinkhua a zangthei ding hi. Pathian toh kizopna naipen lah thuumna ahi ngal a. Khemna leh mangbatna palsuah theihna ding in thuum gige ding ahi. Thumna in i hih peuhmah ah haksatna hong tungtheite hon daal sak thei hi. Tua baan ah thupukna khatpeuh i lak ma in, ei mahmah leh i thupukna lak dingte Pathian mai a thumna a lat masak ding ahi. Tua hileh i thumnate tungtawn in Pathian in honpi ding hi (Matt 26:41; Eph 6:18; Luke 6:12-16; Pau 19:21; Jer 29:12). Himahleh i theih ding a hoih khat, tuailai chituam hi ding a panla a kal i suanlai in, khemna leh lungkiatna in i kalsuanna peuh ah hon zui ding hi. Nungkik utna lungtang leh Pathian ginlelhna leh bang ziak a Pathian kiang a ka thumnate limsak a omlou a de aw i chih vungvung hun hong tun chiang in, Laisiangthou phen in sim le khamuanna thu kipahhuaitak mun tampi ah muhtheih in om ding hi. Laisiangthou pen khemna a pat a kivenna ding a galvan hoihtak ahi. I thumna awte Pathian in a za gige a, amah Pathian bangkim thei in a hun a hun in hon pi ding hi. Haksatna i tuah ding leng a hon phal ngei a, himahleh huaite a hong tun chiang in a hon nuse tuankei ding. Haksatna i chih pen Pathian in a misiamte toh kinaihna ding a vanzatte lak a khat ahi. Tua ziak in Pathian mah muang kawm a a deihdan lampi i zuih chiang in aman hon humbit gige ding a, a hon vualzou sak zel ding hi. Amah lah Pathian bangkim hihthei leh amah a ding a a haksa omlou ahi ngal a. Huaiziak in Amah khut muanhuai ah bangkim kem sak le haksatna tawpkhawk i tuah chiang in leng aman hon pi gige ding hi. (Jer 29:11; Isai 30:20-21; Sam 46:7; 1Kor 10:13; Luke 18:27).
Tuailai chituam hihtheihna ding a a poimoh thumna leh Laisiangthou baan ah, ei mimaltak a i hih dingdan poimoh dangte tuh hangsanna, tua baan ah mahni kithununna, i dinmun kivelchetna leh Pathian ah muanna neih ding chihte ahi. I chihtakna suah a, diktatna zong a, i kiim i kiang a omte sukha baan ding a hangsanna i neih poimoh hi. Huchi a thilchiin hoihloute tawpsan ngam a, sap a i om bang a chituam ngam leh Pathian gam i keklet theihna ding in hangsanna Pa kiang a nget ding ahi. Laisiangthou in lah i taksap peuhmah “mi tengteng kiang a itlou leh tailou a pepa Pathian (Jak1:5)” kiang ah ngen le piak in i om ding uh chi’n hon khamuan ngal a.
Khristian tuailai chituam ngam i chih chiang in midangte toh i kalsuan khawmna peuh ah a chituam pen hih sawm teitei hiam ahihkeileh a tallangpen a om ding chihna hi pahpah lou hi. Tanchinhoih gum ngamloute lak a gum ngam a, khelhna a kibualte lak a kibual lou ngam a, diktatloute lak a diktat ngam leh i kalsuanna peuh ah Pathian deihdan toh kituak a om ngam genna ahi zaw hi. Tua mah bang in i thupi “Khristian Tuailai Chituam ngam” kichi pen Pathian deihdan toh kituak a chituam ngam chih genna ahi.
Aw…! i lak uah kua a hiam thutak a muanhuai,
Thutak gum a ding diing Toupa lam a pang?
Thutak gumngam leh Pathian deihdan toh kituak Khristian tuailai chituam ngam hi ding in kuateng i manta uale? Lawmman manpha lah van ah Jesu Krist toh i kituah chiang a sang ding i hi ngal ua. Khristian tuailai chituam ngam hih ding naak huphulh huai louh hita ven chia! Thutak gum-a ding di’n Toupa’n nang leh kei hon sam!