Pathian in kha thak damtak in hon musak nawn a kipak mahmah in a min i phat hi. Dorcas’ Corner it leh ngaina a simtute tengteng i Toupa Jesu Khrist min manpha suang in chibai kon buk hi. Pathian in ei mihingte a vualzawlna lam chituamtuam in hon pia hi. Huaite muanhuaitak a kem ding in hon muang a mohpuakna hon pia hi. Huan Pathian in hoihna hiam hauhsakna bukim neite hiam enlou in Aman mohpuakna apiak bangbang muanhuaitak a kemdia kipiate zong zaw hi. Laisiangthou ah Talent gentehna thu in, chiangtak in ei gingtute a hon kepsak vualzawlna hunte, sum leh hauhsaknate muanhuaitak in i kemna hiam chih khatveitei hon dong ding ahih dan honhilh hi (Matthai 25:14-25). Hiai a gentehna thu ah Pathian in thil thum toh kisaibik a hon gente i en ding:

1. Hun (Time): Pathian in a hon thilpiak manpha mahmahte lak a khat tuh ‘HUN’ ahi. Laisiangthouin, ‘Nite hoihlou ahihman in, aman pia in hun lem leizel un’ (Eph.5:16 BI) chi in honhilh hi. Tuaban ah ‘Ka damsung nite uh simdan hon hilh in pilna lungtang ka neih loh hialna ding un’ a chinawn hi (Sam 90:12). Pathian in hun zalentak honpiak michih in nikhat a dakkal 24 kibang a i neih chiat i zatna ah amah hoihsakdan leh amasa a koih in manpha in i zang hia, ahih keileh Pathian masa sak ding chih sang a ei deih dandan a i hunte zek i hi hiam chih kivel tuak mahmah hi.

2. Siambiik (Talent): Pathian in a siamsa mihingte pianken siamna biik leh khalam thilpiak a hon pechiat hi. Tuate Amah min thupina ding leh a gam nasepna ah muanhuaitak a zangding in hon deih hi. Peter laikhak, ‘Michih in, Pathian’ hehpihna nam tuamtuam kemmi bang in Kha’ thawnpiak a ngah khempeuh, midangte’ nasepsakna ding in muanhuaitak in zang hen’ (1 Peter 4:10) ana chi hi. Nang leh ken tuni’n bangchi’n Pathian hon piak talent i zang a chih velpha thak ni.

3. Hauhsakna (Treasure): Sumlepai, neihlelam, niikten-puansilh tan in Pathian in vualzawlna hon piakte muanhuaitak a kem siam ding in mohpuakna hon guan hi. Tuabang a Amah lungtuak a i kep keileh tunung chiang a taankha ding i hi chi’n Laisiangthou in hon hilh hi. Mi tampite’n i niteng khosakna a sumlepai kiningching i neih theihlouh nakna leh Pathian deihna bang i tun zohlouh nakna bel a hon thilpiak gah masate tung a muanhuai ding Laisiangthou honhilh bang a muanhuai zohlouh ziak ahi (Pau.3:9-10; Mal.3:8-11).

Unau tuni in Toupan nang hihtheihna toh kikhom a vualzawlna hun, talent leh hauhsakna honpiakte na kepna ah, ‘Sikha hoih leh muanhuai, na hihhoih hi, tawmchik tung ah na muanhuai, tampi tung ah kon omsak ding; na pu kipahna ah lut in’ a hon chi diam?

DORCED HUHNA HONG LUT ZEL
1. EBCC NE Tangnuam BDF in a sum a kidon thoh leh meh ding bal a hon khakte uh sumsuah in = Rs 1550/-
2. Nu Vanlalruati EBCC Bethel Baptist Church = Rs 2500/-

Toupa’n pethei zel ding in tamzaw sem in vualzawl zel hen.