Kum 2020 hon musak a, a gamna semthei dia hamphatna hon pia i biak Pa Pathian min in Kumthak Chibai! Thumna toh Pathian’ pina lamen in tukum sung BCD sinsaktute nasep dingdan tangpi makaihtu ding in, BCD Year Calendar 2020, heutute’ lemsakpihna toh kibawlkhia hi. Local BCD chih in manphatak a i zatchiat i lamen hi. Kumtawn a septheih ding project thum taklat ahi a, tuate ahihleh –

1) House Visit, 2) Nitaklam Kikhopna leh 3) Local Child Evangelist chihte ahi.

Amasapen “House Visit” kichi khenkhat in i chinsa ahiding a, khenkhat ading in bel thilthak ahikha ding. I sep sawm bel tukum sung a pawlchih sinsaktute’n i pawl a naupangte’ inn khatvei chiat bek vehsuak ding chih ahi. Naupangte’ innveh kichi BCD tup-leh-ngim ah kitaklang kei mahleh, i tup leh ngim sepkhiatna ding a poimoh mahmah ahihman in BCD pumpi in tukum sung naseppi khat in nei lehang i chi hi. Naupangte’ khalam dinmun leh khantouhdan theihna ding in a tenna inn mahmah ua a khosak dan uh leh Nipini skul pawlama a mihinzia uh theihpih poimoh ahih ban ah, i naupangte’n Sandeskul a sinsaktu chihkia hizawlou in a hinkhua ua ding a Lamhilhtu/ Mentor/Role Model a hon muhtheih uh poimoh hi. Sinsaktute ading in tha leh hun tampi senna a hingei ding a, himahleh Khrist Jesu nungzui i hihna a eimah hihtheihna chiang a lamsau zaw, kal tam zaw suanna leng ahi hi.

Nitaklam Kikhopna neih ding chih CEC in ahon bawlsak ahi. Nipini nitaklam dak khat apan in naupangte biakna hun zatpih ding chih ahi. Mun khenkhat ah amun leh ahun kichinlouh ziak in lemtanglou thei hi, himahleh a lemtanna munte ah i pattheih chiat i lamen hi. Sinsaktute ading in kisakkholhna tamsem, tha leh hun tamsem piakbeh kul ding ahihman in, haksatna tuah ding zong a om ngei ding hi. Huchi ahihlai in, naupangte adia manpha mahmah ding ahihman in, Toupa’ min in thumna toh panla a sepsuah sawm chiat ding in ka hon ngen hi.

Local Child Evangelist kichi 2018 a kibawl pan ahi. Tukum sung in zong amaute ading bik in training om ding hi. Amaute a manpha thei pen a i zat chiat i lamen hi. Sinsaktute’n i naupangte lakah counselling poimoh leh buaina tuamdeuh neite amaute kiang a sawl zel ding chih ahi. Tuabang ahihman in, i Local Child Evangelist-te sinsaktute’ nungthuaptu khat ahi uhi. Local Child Evangelist-te’n i mohpuakna thei kawm in kisakkholhna leh kisinna a tamtheilam neih sawm ding ahi. Tua ding in, Saptuam in Evangelist i neihlel Evan. T Damkhothang, Evan. Upa Lianding Guite, Evan. Thangsuanpau-te chiklaipeuh in dottheih ahi uh. Buaina leh haksatna tuamdeuh a omleh zong, Child Coordinator pansan in panpihtu ding zontheih ahi.

I hih khempeuh ah, naupangte Khrist khebul a pi ding leh Khrist batna a khansak ding i tuppi pente ahi gige hi. A gam tungding a liansak semsem ding in Toupa’n vanzat manpha in hon zangchiat hen aw!