Introduction: Khovel a mi lohchingte hinkhua i sut leh amauten a hinkhua uah kibang a neih uh khat om hi. Huaite tuh bang hiam i chih leh tup kichian, kuhkalna, hangsanna leh kimuanngamna chihte ahi hi. Tup kichian neite tuh a tup uh tangtunna ding in akuhkal pah ua, atup uh tangtunna ding ahih nak leh hangsantak in ama ua haksatna om theite phu ngam uhi. Huchibang miten a tup uh tangtun zou in mi lohching hong suak uhi. Tup leh ngim kichi i hinkhua a i tunsawmna mun theihchetna ahi (A goal is a predetermined destination). A tom lam a gen in Lohchinna i chih tuh i hinkhua a i tempaina /lunglutna (Talent) theichian a tua a lungkimna leh kipahna neih na ahi. Mi tengteng lohchin a ut vek ua himahleh mi tawmchikte kian lohchinna a ngah uhi. Huaiziak in lohchinna ding a kalbi poimoh khenkhatte hiai a nuai a bang in kikum leng i chi hi.

1. Tup leh ngim neite lohching uh: Khovel khangthu lumlet, mithupi leh lohching kichiten tup leh ngim (Goal) kichiantak a nei nak uhi. Abraham Lincoln in a neulai in, “Khatveitei America President ka hi ding a Negrote sal apan ka suaktasak ding hi” chiin tupna ana neikhin in bang hun leh ni ding thei kei mahleh tua bang tup leh ngim a neihte tangtun nading in pan naktak in ana la in tua tup leh ngimte hon tangtun petmah hi. Hinkhua a tupnei lou mite tuh vanlaizawl a meipi (cloud) huih in atuahna lamlam a kihei kawikawi, tunna ding kichian neilou toh kibang ahi. Ngimna kichian nei miten a tunna ding uh thei uh ahihman un a lohching zel uhi. Lohchinna ding in tup tinten leh tupguhna neih a poimoh petmah hi. Tup leh ngim kichian neih in hinkhua manohna lam nei in ahonpi in, hinkhua ah kithalawpna a tun hi. Huaimah in maban a thupukna bawl ding a om chiang in leng baihlamtak in thupukna bawlsak thei a, hinkhua ah kimuanngamna a hon pia hi. I lungsim in ka dam sung in hiai hih ka ut chih nei in tupna nei a huai mah paipih theile hoih mahmah ding ahi. Paunak khat in, “Na tup leh ngim (goal) na tuna ding in khatvei in kalkhat suanzel in” a chi hi. Na tup gelhkhia inla, na mazawn ah taak inla, zing leh nitak teng in sim zelzel in. Mi tup leh ngim kichian neite’n a paina ding uh atheih ziak un lohching uhi.

2. Lohchinna ding in i lungput poimoh hi: Thil khatpeuh Pathian kiang leh i muan mahmahte kiang ah i nget chiang in i lungput; huaituh i ginna leh muanngamna a poimoh petmah hi. Huaiziak in i thilhih peuhmah ah kipiak hoihna/ahoihlam kipiakna (optimistic view) leh lohching ngei ding ka hi kichih theihna poimoh hi. Na lungsim a lohching ding a na kigintak leh na lohching ding a, himahleh na lungsim a lohsam ding a na kikoih leh na lohsam ding hi. Aziak bel, lohching ding a lungput hoih neiten a lohchin theihna ding ua thanawp suah in ahihtheih tawp in pan alapah thei uhi. Himahleh lohsap ding lungput nei mi in bel vangthu in kinga a, huai in amah ah thadahna tun in huchiin ahong lohsam petmah hi. A hoihlam ngen kipiakna in innsung, khotang leh saptuam kivaipuakna chidam sak mahmah ahi. Mihingte’n lungput tuamchiat nei i hihman in thu kikup khawmnate ah a selam leh ahoihlam a laktheih ding thu a om gige hi. Huchibang thute aselam a hongsuah dek hun in leng a hoih lam lungput nei in; a hoih ding ngimna ziak ahi chi in lathei le lohching mahmah ding i hi.

3. Lohchinna ding in Kuhkalna leh Chihtakna Poimoh: Lungtang a kilawpna, thanopna leh lunglutna neih lohchinna dia poimoh ahihdan i gen nung in a tawpsan ngeiloute mi lohching ahihdan uh en nawn leng i chi hi. Paunak khat in, “A tawpsante a lohching ngeikei ua, a lohchingte tuh a tawpsan ngeiloute ahi uh,” a chi hi. Thupil dang khat in, “Suangmanpha lei pawtham ah om ngeilou ahihman in, tawpsan ngei ken” a chi hi. Khovel a mi lohchingte tuh mi laisiampente, sumhaupente leh innsung khosa nuamsapente a pan hong kipante ahi hetkei uhi, himahleh mi kuhkal, hangsan leh chitaktak a pang a atawpsan ngeiloute ahizaw uhi. Thomas Alva Edison kichi American Scientist minthang mahmah khat ahi. Lai a siamtheihlouh luat ziak in khathum lel school a kai a kichi hi. Himahleh aman kum 13 veel ahih in science laboratory ah nasem in electric bulb ahon musuah hi. Tua a muhsuahna ding in lunglel lou a kisinna (experiments) 6000 veitak ana zangkhin kichi hi. Lunglelhna kichi himhim a na pianpih khak louh mah in tunitan in mei vaak nuamtak nuai a i khosa uhi. Sir Winston Churchill England Prime Minister ahihnung in khat vei a school kaina lui Harrow Public School a thu a gensak uh leh aman, “Tuailaite aw, tawpsan ngeikei un, tawpsan ngeikei un! Tawpsan ngeikei un, tawpsan ngei mahmah kei un” chih teng kia gen in a thugen zou akichi hi. Lohchinna ding in dohzohna, ngaakzohna, thuakzohna chihte poimoh mahmah hi. Khovel a mi lohching i chihte kuamah a haksa thuaklou omlou ahi. Nuamtak a innsung a tumaimai bangmah sepdi theilou, seplouh dile theilou a omte milohching hingeilou uhi. Taimak mahmah ngai a, kuhkaltak a miten a ngap nawnlouh nung nasan a leng chitaktak a pangten lohchinna mu/ngah uhi.

4. Pathian theite lohching uh: Toupa Pathian nei nam tuh a hampha uhi; Diktatna in nam a tawisang; Honesty is the best policy, i chih chihte uh atak a hinpih Tuailai hileng uthuai i sa mahmah hi. Sum-le-pai zang a miliante biakna leh maipha kizawnna tungtawn a lohchinna pen lohchinna i chingam taktak diam. Pathian tuh lohsapna Pathian hilou in lohchinna Pathian ahi. Huaiziak in a kuitung leh a kip a muanhuai lohchinna tuh mi a Pathian uh theite a hideuh uhi. Khovel a mi lohching thei, mithupi leh NAM (kumpi) hatpen a kigente leng a Pathian uh theichian taktakte ahi uhi. Tanchinhoih khovak mu masa nam leh gam tuh vualzawl in a om hi. Tuailai Joseph in Pathian thei a amah lau ahihman in Pathian in a ompih a, a omna lamlam ah lohchinna leh mavanna a tun hi. Joseph ziak in Aigupta gam in vualzawlna a tang hi. Himahleh Pathian in Joseph a ompih gige lai inleng haksatna a tuah ding phalsak veve hi. Mosi in Tuailai Joshua kiang ah a hinkhua a, a lamzan a, a lohchin theihna ding in Pathian theih a poimoh pen ahi chi in ana hasuan ngitnget hi. Tua hasotna Joshua in a mangngilh kei a melmate zohna ding a a zat kia hilou in a inkuanpihte nasan tua Pathian nasem ding in a thunun zou vek hi. Innkuan lohchingtak ahong suak hi. Daniel leh a lawm mi thumte; Hanania, Mishael leh Azaria-ten a Pathian uh a theih man un hangsantak in kumpi thupiakte nial ngam uhi. Sihtheihna hun tampi ah Pathian in lamdangtak in hunkhe zel a Pathian hing theilou nam leh gamdang ah mi lohching leh gahsuah, zahtaktham ching ahong hi uhi. Laisiangthou in, “mi a Pathian uh theite bel a hat ding ua, thilhih minthangpente a hih ding uhi” (Daniel 11:32b) a chi hi.

Conclusion: Khovel ah mi lohching hihna ding in Pathian phawk a, ama deihdan lampite tawn a, a thupiakte kitatsatlou a zuih leh thumna neih poimoh mahmah hi. Thil khat peuhpeuh i hih ma-in Pathian kiang ah kilankhia in, a panpihna ngen in leh huai thilte i zoh chiang a kipahthugenna in a zuih touh zel poimoh hi. Pathian kiang a i deih teng mawk ngetlou in tup leh ngim leh i poimohte chiangtak a thei in hangsantak in ngen zaw leng manpha mahmah ding hi. Solomon in a mite tung a vaihawm a siamna ding in PILNA poimoh ahihdan thei in Pathian kiang ah pilna a nget leh, Pathian lungkim mahmah ahihman in a nget louh tanpha ama adia poimoh hausakna leh minthannate piak behlap hi. “Amah hih lungkim mi kiang ah Pathian in pilna leh theihna leh nuamsakna a pengal hi” (Ekl. 2:26a) chih a dik mahmah hi. Mi lohching i hihna ding in i thum chiang in ngetdik angai a huai din i poimohpen theih masak a kuul hi.

Toupa’n TUAILAI hinkhua a LOHCHING hi ding in hon vualzawl hen aw!