‘Michih in…, a lungtang ua a tup bang zel un pechiat uheh; Pathian in kipaktak a pemi a hi, a it’ 2 Kor. 9:7.

Dorcas’ Corner ngainatak a a na sim zelzelte i Toupa Jesu Khrist min manpha in chibai kon buk hi. Pathian in vualzawlna lam chi tuamtuam a hon vuk in genthei, tagah leh tasamte lam a banzak sau thei zaw dia hon pi ziak in Amin i phat masa hi. Tutung in thilpiak toh kisai lungsim a omte sau lou kon gelh hi. Khenkhatte khut nasep a nek zong bang, khenkhatte Government a sepna nei bang, khenkhatte mission nna sem bang leh a dangdang nek muhtheihna peuh leh sum-le-pai muh theihna ding lampi zong in eimah hih theih lamlam sem a om in vualzawlna i tante sungkhawm in thilpiak i pekhawm siausiau ua, tuaten nna thupitak sem ahi chih mangngilh ngei kei ni aw. Pathian in septheih na hun leh piakkhiak ding hon piak laisiah thasial lou in lungtang tawng a Amah hon piina dungzui in sem in pia ni, sep theihlouh hun, piak theihlouh hun hong tung kha ding hi. “Na gamsung ua lah a zawngte om gige ding a hihman a, na gam sung ua, na sanggamte uh a zawngte, a tasamte lam a thilphal ding a thu hon pia ka hi” (Dan.15:11). Tangtawn Toupan a na chih bang in, i gamsung, society, saptuam sung leh i insungte uah dik toutouta hi. Mahni Division sung hi in, local chih a Dorka pawl makaih a genthei leh tasamte adia thilpiakte i piak ban ah Headquarter level a Dorced project nihte a na i sep lailai in leng kepngai leh don tuak teng ki don zoulou hi. A hi a, tulel a i kepte leh donte awlmohtak a thilpiakte i piak lai in, Pathian deihna bang leh a lungtunna bang a pia i hi de aw chih hon ngaihtuah sak hi. Meithai nu thilpiak i ngaihtuah ngei hia? “Jesu’n a nungzuite kiang ah, Noute thutak konhilh a hi: Hiai meigong zawngtak in midang tengteng sang in sumbawm ah a khetam zaw. Midang in a hauh let ua pan a pia uh a, aman zaw, a neih zohlouh sasa in, a nuntakna ding teng, a vekpi in a pia hi”, a chi hi (Mark 12: 43-44). Meithainu’n bangkim leh thilteng Pathian a’ a hi chih theichian a hihman in, a ginna tungtawn in a maban hinkhua leng Pathian in pii mahmah ding ahi chih chiang hi.

Hiai a nuai a point-te akipan in bang lungput toh thilpiak pezel i hia chih kivel ni.

1. Thilpiak pia hingal a, it pipi a pia. Lungsim a tup luatna leng omlou, sakhau a omte lak a note neupen pia.

2. Thilpiak piaklouh theihlouh bang a ngai a pia. Mahni lungsim leng sukha zoulou, neihval pia hihthoh.

3. Dinmun – Upa leh Department tuamtuam a Committee member khat hihkhak ziak a pia.

4. Sawm-a-khat pia hingal, a tawm lamlam a hisap a pia, khenkhatten khateng loh a pat kia pia. Khenkhatte upa hih utlouh ziak a pezel pelou zel a mumal lou deuh a pia. Khenkhat thepthupten lah upa hih ut ziak khawng a tomchiksung khawng regular tak a pia.

5. Bazar a sum zattaak louh note sedeuhte thoh sese. Bazar kaizoh a sumzatval omsun kia thoh.

6. Antangpham dia mahni neklouh a man tawmte pia, khenten prize lak nopman a tampipi pia. Khenkhatten anhuan teng a phamlou khatvei thu a a koihna bawm sung dim suk top. Khenkhatte ngial in, a dongte va don hun a kilawm a sakzah uh ana suah thoh uh.

7. Silhleten silh senglouh almirah dimzen a koih in, mi piak chiang a, mahni deih nawnlouhte pekhia zel.

8. Anteh louhing pia hingal a, a vuai nipnep leh a gah tak tata pia zel.

9. Missionary-te vei mahmah a thum pihpih hinapi, a box pen sumnen kholna a zang. Bazar kai chiang a sum zatval lakloh sakte va khumlut zeuh zel.

10. Minhoih leh tallang deuh hih ut ziak a pia.

Toupan Kaina kiang ah a thilpiak toh kisai in, “Hihhoih lechin pahtak na loh kei dia hia?” (Gen.4:7a) a na chi hi. Tuni in eiten leng i thilpiak toh kisai in hihhoih leh pahtak i loh theih nading in Tangtawn Toupa’n Israelte kiang a thupiak a na piak zui ni. “It pipi hilou in, phaltak in pia in. Tua hileh, hiai hang a Tangtawn Toupa na Pathian un, na nasep khempeuh uleh na khut ngakna khempeuh uh hon vualzawl ding ahi” (Danp.15:10). Pathian in vualzawlna hon piakte akipan in Amahmah in ei lungtang sung a thu ahon gen dungzui zel a kipaktak in thilpiak pia ni. Thilpiak tungtawn a Pathian itmite hiding in Toupa’n simtute hon vualzawl chiat hen.

DORCED HUHNA HONG LUTTHAKTE

1. Mrs Thangngaihvung Rs. 1,000/-

2. Mrs Chingkhoman EBC, New Lane Bungmual Rs. 500/-

3. Mrs Mankhodon EBC, New Lane Bungmual Rs. 500/-

4. EBCC G. Mualkawi BDF Rs. 5,000/-

5. DBDF, Singngat Division Rs. 6,000/-

6. EBCC, Mualnuam BDF Rs. 5,000/-

7. Mrs Ngaizaching EBCC Lamphel SAI Takyelpat Rs. 4,000/-

8. EBCC, Khuangkhai BDF Rs. 5,000/-

9. Mrs K Vungman EBCC, Langol, Imphal Division Rs. 50,000/-

Toupan petu tengteng tamsem in hon vualzawl hen!