Munchih mualchih a ka tuailaipihte tuni chiang dong hon pi i Toupa leh Hondampa Jesu Khrist min in Chibai ka hon buk hi. Tulai khovel hong se hiaihiai hia ahih keileh ei a mite se hiaihiai theihzoh vuallouh ding hileh kilawm in siatna niteng a tanchin zak in om ta hi. Tuate tengteng a vek in gen kim thei kei mah leng lungsim a om khenkhat hiai ah ka hon taklang a, tukum pen India in 73rd. Suahtakna (Independence) a lop kum uh ahih toh kiton in ka Tuailai pihte i koltannate apan i suahtak theihna ding in ngaihtuahna ana pethak a kivelna in nei lehang chihna toh tutung Youth Corner ah hiai thu gelh i hi.

Tulai khovel a tuailai tamtakte tuah buaina uleh chouna lian mahmah ahihleh Lunggulhna hattak bei theilou neihna ahi. Tanchinhoih ziak in nakpitak in salam ah leh khosakna lam ah dopkang in i om ua, Toupa min i phat uhi. “Hinkhua kei a ahi; Ka lungtang deihlam in ka omding” (It’s my Life; Listen to my heart) i chi ua, himahleh Pathian tellou in kipahna bukim a om tuan kei hi. Numei pasal kal a nopsakna (Sex), zu-le-sa leh khamtheih (Drugs) a nopsakna ban ah khovel thupina leh minthanna (Fashion) a nopsakna i zong ua, himahleh tuate’n lungkimna ahon pethei kei uhi. Kumpi Solomon in “Amah hihlungkim mi kiang ah Pathian in pilna leh, theihna leh nuamsakna a pe ngala: himahleh mikhial kiang ah, gimthuakna a pia hi” (Eklijiasti 2:26) ana chi hi. Tua bang khantouhna hattak ziak in Thutak theihbuaina ahong om a, “a taktak in thutak kichi omlou ahi, thil tengteng ahun leh amun zil a dikvek/diklou vek thei ahi” chih ngaihdan ahong hat mahmah hi.

Tuabangte kal ah Khristian Tuailaiten, Pathian in ahon siamna san leh Thutak toh kisai a i lungput uh Laisiangthou pansan a i vel chet uh a kul petmah hi. Khovel khantouhna hat in, khovel paidan kikheng lumlet mahleh Pathian leh a thu kikhek ngeilou ahi. Khristian ginna a thampaina leh pomzamna (Liberalism & Pluralism) hong hat mahmah hi. Hiaite khawng ziak mah in Pathian zahlouhna leh a min mawk lohna a hong tam hiaihiai hi. Laisiangthou leh a sung a thute mah theihbuaina leh muanmohna ahong lian hiaihiai ahihman in, Pathian leh a thutak Laisiangthou a kisinsakna dik mah a hangsantak a i kiknawn uh apoimoh mahmah hi. Khovel khantouhna in ahong puaksuahte lak ah khawl vanzat hoih leh changkang taktakten Tuailaite nakpitak in ahon nawkkhata hi. Nidang a i muh leh khoihkhak batlouh thil tampite tuin i khut a tawi in i zang ta uhi. Mitamtakten a innsung a nulepate leh saptuam leh khotang a heutu leh makaite thu sang in a khut ua a tawi uh Mobile a thu kigente (message) i zui zaw khanak uhi. Zu leh khamtheih addict-te i mohsak mahmah lai in; Internet, facebook, Whatsapp leh mobile games-te leng addict theih luat ana hi ahi. Tawi kei ni, zang kei ni i chi kei a, himahleh i zatdan ah i Khristian hihna suklat poimoh i sa uhi. Internet leh social media tungtawn in melma Diabol in tuailai tamtak khelhna a hon pilut thei ahihman in tuate sal apan i suahtak theihna ding in ngaihtuahna Khrist in a thuzoh a poimoh mahmah hi.

Pathian hehpihna ziak in pilna, siamna, melhoihna leh hauhsaknate nei in, nakpitak a dopkang in i om uhi. Huchihlai in tuate hon pepa Pathian bang i loh ua chih hunteng a i kivelna ding ua poimoh ahi. Pathian tellou hinkhua kichi a thawn lel leh a mawkna lel ahi. I tung a Pathian a lungkim keileh mihing kuamah in lungkimna leh kipahna taktak kineitheilou ahi. Khovel khantouhna hat in thupi mahleh a kikheng ngeilou Khrist suangpi kip tung a ding a, khovel in a nawk buailouh Khristian Tuailai Pawl hiding in hanlung chiam thak ni. Laisiangthou in “Na tuailai nite in nang honsiampa leng theigige in, ni hoihloute a hongtun ua kumte a hongnai ua, amaute ah kipahna ka neikei, na chih hun a hong tun nailouh lai in” (Eccl. 12:1) a chih bang in.