Khathak damtak a hon pikai nawn i biak Pathian leh Toupa Jesu Khrist min manpha in Dorcas’ Corner ngainatak a simtute itna chibai konbuk hi.
A tung a thulu hong kitaklang bang in Dorka pawl in project lian mahmah nih i neihte Naupang laisimte chawmna leh puankhui sinna toh kisai report tomkim in kon bawl .
DORCAS’ CHILDREN EDUCATION DEVELOPMENT (DORCED)/NAUPANG CHAWM:
Hiai project kum – 2013 a i na patkhiak uh, nna poimoh tak leh lunglut huai pi ahi. Pathian in genthei leh tasamzawte lam a baanzak a amau panpihthei ding a vualzawlna thupitak hon pia in, gah kipahhuai taktak tampi hon muhsakte ziak in Amah kia kiang ah thupina leh pahtawina i pia hi. Chawmna toh kisaiin kipatchil a pan a rule kibawl dung zuiin a laisimna uh kumtawp examna a hong fail khate a kumnawn chawmna pen tawpsak a hi uhi. Huan khenkhatte mimal lemtanlouhna nei a laklohtak a school kaizom lou a tawp bang leng a kallak ah a na om theizel hi. Tuaban ah khenkhat i zoudawn lam a schoolte a kai, a mau school a kaitheihna tan zou a Lamka Ebenezer a hong ki admit ta, a omna sa division a leng a min uh katkhaklouh, hiailam a lah record omzel athuah a omkha chihbang leng omthei zel hi. Division 6 a kipan in naupang class II – XII tan kichawm hi.
I. Award Piakdan:
Kum– 2017 a pan in High School chiangte kumtawp exam a 85% muzoute kipahpihna incentive cash award Rs 1000/- zel piak ding chih CDSC thupukna ahih toh kiton in tukum 2019 in Ebenezer a kai mi nih in tua award sangthei ua, piakkhiakna leh amaute thumsakna Director (SD) in 9 June,2019 in Dorcas’ Mini Auditorium ah nei hi. Singngat Division apan mi khat in sangthei a DS makaih in amau lemtan hun in a na pekhia uhi.
Tukum 2019 in Class X-12 & Class XII-5 Board exam i neih teng in hon pass vek uhi. Amaute i kipahpih petmah a Pathian min i phat hi. CDSC 88th Meeting thupukna dungzui in kipahpihna thilpiak in Incentive cash award piakkhiak ding hiai bang a bawl ahi a, a sepsuahna leng 22nd June, 2019 in kineita hi.
1. Class X - Rs 1500/- 2. Class XII - Rs 2500/- 3. Subject letter mark - Rs 1000/ per subject 5. Class XI sim ding Ebenezer a kaite uniform khuisak. Kum thak-2020 chiang a Board exam maituah ding Class X mi 13 & Class XII – 4 kinei hi. Thumpih chiat ni.
II. Dorcas’ Tailoring Project (DOTPROJ):
Hiai project kum 2017 a i na patkhiak a hi. A lunglut huai leh nektak zonna ching project khat a hi hi. Kipattung in mi thum lel in sin uh a, a maute lak a khat tun instructor in pang a, a dang nihte leng Graduate khinta hi. Graduate-te kiang ah a sinkhiak uh dungzui a nektak zonna ding geelsak in puankhui khawl leina ding in Rs 10000/- grant a piak a hi. Tulel in puankhui sin mi 8 kinei hi. Sintute a tamzaw in khuisiamta ua, amaute kumthak a graduate thei ding a hita uh. Kuapeuhmah puankhui ding neite’n amau kiang a order theih a hi. Design na deihdandan uh hon khuisak thei ding uh. Numei van kia hilou pasal khekor leh kameej leng a khuithei uh chih leng i kitheisak kawm hi.
Hiai bang project poimoh mahmahte tungtawn a Pathian in Heutute phasakpihna a hon sepsak ziak in i kipak petmah hi. Amaute ading a sumlepai itlou a, hihtheih zahzah a khateng a mimal, pawlpi hi in local BDF, DBDF kuapeuhmahte tung ah Pathian min in kipahthu kon gen hi. Kuahiam in kei hiai project a pangkha nailou ka hi, kei leng ka pang ut chi i om zenzenleh chiklai peuh in nou omna local BDF tungtawn bang, ahihkeileh Dorcas’ Hall direct a leng phal bangbang piak a pan theih gige a hi chih leng i kizasak hi. Huan a pangsaten leng behlap theih gige ahi. Naupang chawmtuak tampi omlai, puankhui ut a lunglut mahmah, amau a lah kisakhe khezou lou sinsak tuak tampi omlai hi. Toupa’n a tamthei pen sem a, semzom thei zel ding in hon makaih chiat hen.
BAWLDIKNA
Khalui August issue a khawmpi report ah 28-30 November,2019 hong kigelhkha demdom a, 28-30 June, 2019 chih hizaw ding ahi. Pilvan zohlouh leh hihkhelh khakna ah simtute’n na ngaihsiam uh kon ngen hi.