Tukum a ding a kha giatna August kha damtak a hon pitung nawn i Hondampa Toupa Jesu Khrist min in Dorcas’ Corner simtu tengteng itna chibai kon buk hi. Thumnate dawng zelpa Pathian in Dorka pawlte a Division wise hi in Local ah hita leh i nasepnate hon makaih a, eimah hih zohna chiangchiang semthei a i om zelman in Amin i phat hi.

Tutung in Mizoram Division Baptist Dorcas’ Fellowship Committee-te deihsakna tang in, Mizoram DBDF Khawmpi 38na Khawkawn a om 28-30 November,2019 zang ding a hon chial uh damtak in ka va zangthei a report tamlou a tangpi kon bawl hi.

Mizoram division sung ah khua sawm om hi. Khawmpi a hoh zah mi 130 vel kipha hi. Khawmpi sung in thu leh la a kidemna om hi. Nute phur thei mahmah in kitaitehna ah siam taktak in hon lakkhia uhi. Kisakkholhna ding a hun tampi piak poimoh a hihna ah Nute kipiakzohnate thupi sa in manpha ka sa hi. Huan a manpha nawn diak ka sak tuh khopi lam toh a kibatlouhna, khopi a khawmpi i neih chiang in a neideuh toh neilou deuhte leng kuan leh pai gari a kitai in Biakin tung, kikhop tawp chiang a inlam khuveng a kidelh zel hiven. Tua mun a hihleh khawmpi hohte khotualte’n honna zintun ua, zinpi chih bang kinei in, kho tuamtuam inn khat a kitung khawm inchin, kikhawm kuan leh pai bangleng kiton dialdial a nuam petmah hi. Gingtu khat-le-khat, kho tuamtuam a hohkhawmte salam leh khalam a kichimatna khangsak mahmah hi.

Hiai khawmpi ah CDSC Vice President Nu T Nianggou leng hong kihel thei a vualnuam tuam mahmah hi. Thugenna hun nga lak ah aman hun khat hong zang thei a, Pathian kha kithuahpihna toh lamzangtak in khawmpi hun zoh ahi. THUPINA TENGTENG TOUPA’N TANGTA HEN!

DORCED HUHNA HONG LUTTE:

1. Mizoram Division Baptist Dorcas’ Fellowship= Rs 5000/-

2. EBC Mimbung, Vengpi BDF= Rs 3000/-

3. EBC Singngat, BDF= Rs 6000/-

Toupa’n aleh tampi in hon vualzawl zel hen aw.