Hun nuam leh manpha hon pia a kumkim tan hon zangzou sak i Toupa Jesu Khrist min manpha in Dorcas’ Corner simtute chibai kon buk hi. Dorka pawl, thilhih hoih leh thilpiak a hau i hih dungzui a nasep thupitak i na patkhiak uh DORCED Project ading a theihtawp suah a khateng a pang gige mimal leh pawlpi bangzah hiam omte thupi uh sa in amaute zahna sangpi pia in Toupa min i phat hi. Huan mahni lemtan bang zel a Division-wise hi in local BDF hi taleh i pankhawm siausiau ziak un kipahhuai petmah hi. Pathian in na sennate uh aleh tamsem in hon vualzawl hen. Tangtawn Toupa’n a hon vualzawl bangbang a thilphaltak a i piak ding Amah deih bang ahi (Danp.15:14). Huai ziak in kuapeuhmah in i ut hun peuh a pan theih gige ahi chih leng i kitheisak thakthak hi.

FELICITATION PROGRAMME & GRADUATION DAY

Tukum i Dorced naupang chawmte Class X mi 12 & Class XII mi 5 i neih khakte zoudawn lam leh phaizang a te’n a vek un Board Exam ah hon passed vek ua kipak petmah in Pathian min i phat hi. Hiai ah gah kipahhuaitak i muhna tung a i gen sasa himahleh i pankhawmnate ziak in dinkhawl thei mai ding laiten a laisim uh sunzom thei ua lohchinna hon ngah lai uhi. Toupa’n tam loulou i thohkhawmte tungtawn a nna thupitak hon semkhesak lai ding ahih ziak in i kipak petmah hi. Amaute lohchinna ziak a Pathian kiang a kipahthu genna leh DOTPROJ a puankhui zilsiamta mi nihte graduation programme June 22, 2019 in Dorcas’ Mini Auditorium ah kinei hi. Hiai hun ah kipahpihna thilpiak piakna, certificate piakna, hanthawnna leh amaute adia thumsakna Director (SD) in nei hi.

Dorced huhna honglut zel:
EBCC Mualpi BDF apan Rs. 1,000/- leh
EBCC Thuangtam BDF apan Rs 1000/- hon pia uh.

Toupa’n amaute tam semsem pethei ding in vualzawl zel hen. TOUPAN THIL THUPITAK HON HIHSAK A I KIPAK MAHMAH AHI.