Bible Study | KTZ

    KTZ
    Bible Study

    Amos Laibu

    Tukha in Amos Laibu i sinkhawm ding. Amos Laibu Thukhun Lui a Zawlnei Neu sawmlehnihte lak a khat ahi. Zawlnei Hosea mah bang in Zawlnei Amos kiang a Pathian thu hong tungte Judah a ding hi masa lou in Israel a ding bik a piak ahi (7:15). Amos bel, atung in, Zawlnei hiam Zawlnei tapa hiam leng ahi kei a, Judah gam a khota khat Tekoa khomi, Belam ching leh theipi sing kemtu ahi (7:14). Himahleh, Toupa thupuak gen a Israel gam a hun sawt lou a va om ziak in Toupa thupuaktu ‘Zawlnei’ chih min piak ahi. Zawlnei Amos in namte khelhna genchetna ding in “..tatlekna thumte ziak in, ahi, lite ziak in” chih thumalte zang hi. Tatlekna thumte, lite, chinapi namte tatlekna khat hiam nih hiam lel taklang zel hi. Zawlnei Amos thupuak bel Israel tatleknate ziak a Pathian thukhenna hong tung ding toh kisai ahi a, Israel in kisik a Toupa a zon leh hing ding ahihdan leng Zawlnei Amos in genlang hi.

    LAIBU GELHTU LEH HUAI HUN A GAMSUNG DINMUN
    Amos Laibu ahihleh Zawlnei Amos gelh ahi (Amos 1:1). Amah nasep leh nekzonna ziak in Laisiangthou sut khenkhatte’n hiai Laibu a gelh lai a Amos in panpihtu kuahiam nei hiding in muangmoh uhi. Amos in Israel gam a Zawlnei nna a sep hun BC 760 vel hi dia gintak ahi a, huai tuh Israel Kumpipa Jeroboam Nihna vaihawm lai (BC 781-753) a zinling ma kum nih in, chih ahi (1:1; ref. Zek. 14:5). Huai hunlai in Judah gam ah Kumpipa in Uzziah pang hi (BC 792-740). Zawlnei Amos nasep hun toh kituak vel ding mah in Jona (2Kum. 14:25), Hosea (Hos. 1:1), Isai (Is. 1:1), leh Mikah te’n Israel leh Judah gamte ah Zawlnei nna sem uhi. Zawlnei Amos in a thupuak ziak in doudalna tuak a, huaiziak in, Israel ah sawt om man lou in Judah gam ah hong kikpah hi (7:10-17). Huai zoh nung BC 760-753 kikal in hiai Amos Laibu hon gelhkhia hi.

    Kumpipa Jeroboam Nihna vaihawm sung in Israel gamsung galmuangtak in om a nek leh tak leng kiningching mahmah hi. Samari Khopi kulhbang hoihtak a bawl ahih ban ah Kumpipa sepaihte galhat in a ngatna lampeuh uah vualzohna tang uhi. Israel leh Judah kim a gamte galbawl zou dia hatna nei kuamah omlou uhi. Khotang makaite’n mipi maban ding lunghimoh huai bangmah omlou, chi hial uhi (Holman Study Bible- NKJV Edition). Huchih lai in, khalam ah niamkiakna nasetak hong om hi. Kuaman Pathian deihdan zonna leh Pathian nasepna hun in zang lou uh a, Pathian nam tel hihna kisaktheihpih in Pathian thukhenna tuak kha lou ding bang in kingaihtuah uhi. Gentheite simmoh uh a, tasamte nuaisiah in, thudiktak genmi leh mi diktatte muhdah in nekguk ching uhi (4:1;5:10-13). Ngeina bang in biakna leh kikhawmpite ah kaihging kilawm toh thillatte tawi mahle uh Pathian in sang lou in limsak lou ding hi (4:22-23).

    ZAWLNEI AMOS THUPUAK
    Zawlnei Amos in Israel kim a gam 7te tung a Pathian thukhenna hong tung ding a genzoh in a 8na di’n Israel tatleknate leh a tung a thukhenna hong tung dingte gen hi (1:3-2:16). Namte tatlekna thumte, chi zouphet, lite, hon chizom pah hi. A tangpi in number 3 leh 7 tuh bukim genna ahi a, himahleh, hiai a Amos in a 8na leh a lina hon zatna ziak bel namte khelhna leh Israel tatlekna uang khengval ahihdan a gennopna ahi. Polam kilatna ah galmuang leh kiningching bang mahle uh, sunglam (khalam) ah thutakna omlou, gitlouhna leh tatlekna a kidim ahi uh chih taklang nuam ahi. Zawlneite zang a taihilhna a limsaklouh ziak un (7:12-13) Pathian in a kikhawmpite uh a kipahpih kei a, a thillatte uh a sang kei ding a, kaihging kilawmte a ngaikhe kei ding a (bil aphuai), Damaska khokhen ah sal in a paisak zaw ding hi (5:21-27). Huaiziak in, Zawlnei Amos in Israel kiang ah “Toupa zong unla, na hing ding uh,” chi in taihilh hi (4:4,6). Khelhna hua a, hoihna it a, kongpi a vaihawmna kiptak tunding ahihleh sepaihte Pathian in a hon hehpih ding, chi hi (5:14-15).

    Huchi hilou a, Toupa a zon nop kei ualeh Pathian in Israel tung ah tunggikna tungsak ding a, amaute gawt ngeingei ding hi (8:2-3). Huai ni chiang in Biakin a lasakte dahnala ahi ding a, ankuangluinate lungkhamna ahi ding (8:10), Toupa’n gam ah kial a sawl ding a, ann leh tui a kialna hilou in, Toupa thu theihna a kialna (8:11) chih Zawlnei Amos thupuak ahi.

    LAIBU SUNGTHU LEH A KILEPDAN
    Bung 1:1-2 ah pulakna kimu hi. Bung 1:3-2:16 sung ah gam 8te tatleknate leh Pathian vaihawmna a tuah dingte uh kigen a, thumal poimoh ‘Toupa’n hichi in a chi’ hiam ‘Toupa’n a chi’ chih 14vei kigen tuantuan hi. Pathian apan thupawt Amos in hon genkhiak ahihna chetna ahi. Bung 3:1-15 sung ah Israel thuhilhna leh tunggikna hong tung dingte kigen hi. Bung 4:1-13 ah Toupa kiang a kik noplouh ziak a vauhilhna thu kimu hi. Bung 5:1-6:14 ah Israel dinmun taklatna leh kisik dia chialna kimu hi. Bung 7:1-8:3 sung ah Pathian Zawlnei nawlkhin a omna thu leh gawtna hong tung taktak ding ahihdan genna ahi a, Bung 8:4-9:15 sung ah tunggikna leh taksapna- Pathian thu a kialna hong tung ding leh Toupa thukhenna nanung kigen hi. A tawpna ah Pathian in Israel tungdingnawn ngeingei ding ahihthu kigen hi, huai hun tuh Kumsang hun (millennium) genna hiding a gintak ahi.

    LAIBU THUTUN
    1. PULAKNA (1:1-2)- Amos in Israel tungtang a Zion leh Jerusalem apan Toupa thu a muh hun a Israel leh Judah vaihawm Kumpipate min pulak masa hi.

    2. NAMTE TUNG A THUKHENNA (1:3-2:16)
    2.1. Nam 6te tatleknate leh gawtna (2:3-2:3)
    2.2. Judah tatleknate leh gawtna (2:4-5)
    2.3. Israel tatleknate leh gawtna (2:6-16)

    3. ISRAEL VAUHILHNA (3:1-6:14)
    3.1. Tatleknate leh tunggikna (3:1-15)
    3.2. Biakna limsaklouhna (4:1-13)
    3.3. Pathian deihlouh khohei gamtat (5:1-6:14)

    4. THUKHENNA GENKHOLH-NA (7:1-9:10)
    4.1. Khaupe leh meikuang a gawtna (7:1-6)
    4.2. Amos leh a thupuak deihlouhna (7:7-17)
    4.3. Nipi theibawm muhna leh gawtna (8:1-14)
    4.4. Thukhenna nanung (9:1-10)

    5. TUNDINGNAWNNA (9:11-15)- Toupa Pathian in ‘huai ni’ chiang in David bawkta chimsia lamtou in tungding thak ding a, Israel mite amau gam ngei ah bohkhiak a om nawn lou ding in Pathian ngei in phutkip ding hi.

    AMOS LAIBU APAN SIN DING
    1. Biakna leh sahkhua vai ah paidan-ngeina vazuih tanlel in Pathian lungkimna sukha lou hi. Israelte’n galmuang leh kiningching a omlai un lungsim a thutakna [huai tuh lungtang a takna leh kisikna] tellou in thillatte leh kaihging kilawmte zang in Pathian bia uh a (4:4-5), himahleh, huaite Pathian in pom lou in ngaikhenuam lou hi (5:21-24). A kilawmsakna lel a Biakna nasep leh thilpiak kipiate’n Pathian thangpaisak lel ding hi. Pilvang mahmah ni.

    2. Siampu Amaziah in Israel Kumpipa Jeroboam theihpih in Zawlnei Amos taimang ding in vauhilh hi (7:10-12). Dinmun leh mohpuakna i neihte Pathian thu leh amah nasepna daltu ahih ding thil lauhuai mahmah ahi. Pathian thangpaihna thuakzou ding ki omlou hi (7:17).
    3. Mahni hihna leh dinmun kisaktheihpih a Pathian vaihawmna limsak lou mite tuh Humpineikai taisan a Vompi tuakmi bang ahi uh (5:18-20). Haksatna leh buaina pumpelh lou hial ding uhi.
    4. Buaina leh haksatna khatpeuh mipi tung a hong tun chiang in Pathian apan vauhilhna ahi chih thei a mipi kuapeuh in kisik a Pathian kiang zotpah ding ahi, a kikhelma in (4:6-12).