Tukha in Zawlnei Joel Laibu sinkhawm leng chi’n k’on telkhia hi. Zawlnei Joel Laibu Thukhun Lui a Zawlnei Neu sawmlehnihte lak a khat ahi. Hiai Laibu ah Pathian nam tel Judahte dinmun, a haksatna uleh maban a Pathian vaihawmna hong tung dingte taklat in om hi. Pathian hehna leh vaihawmna genkhiakna ding in “Toupa Ni” (the Day of the Lord) chih kizang hi. ‘Toupa Ni’ hongtung ding ah Pathian hehna leh gawtna pumpelh ahihtheihna ding in, “Na puan uh hilou in, na lungtang uh botkek unla; Toupa na Pathian lam nga un” chiin Zawlnei Joel in sapna bawl hi.
LAIBU GELHTU LEH HUAI HUN A GAMSUNG DINMUN
Joel Laibu ahihleh Zawlnei Joel gelh ahi (Joel 1:1). Joel min khiakna “Toupa tuh Pathian ahi” chih ahi. Zawlnei Joel min Laisiangthou ah kigen tawm mahmah a, hiai laibu sung ah khatvei (1:1) leh Nasepte laibu ah khatvei (Nas. 12:16) kimu hi. Zawlnei Joel bel Levi suan hilou in, Reuben suan, Bethom khomi, Judea gam a khanglian hi ding a gintak ahi. Hiai Joel Laibu kigelh hun theihchet ahi kei. Kumpi kuamah min hiai Laibu sung a a kigelh louh ziak in a hun thu ah ngaihdan kibang vek lou hi. Huchihlai in, Joel in Zawlnei nna a sep hunsung bel B.C. 835-796 kikal vel hi dia gintak ahi. A sung a thumal kizangte leh thiltung kigente pansan in Zawlnei Hosia leh Zawlnei Amos hunlai vel mah hi dia gintak ahi. Sepaih thahatna zang in Tura, Sidon leh Philistiate’n Israel nopneh gige uhi (3:2ff). Khokeu nasatak om ziak leh Khauhon in singteh-louhing omsun a nekgaih ziak in Judah gam ah nek leh tak lam ah haksatna thupitak tung hi (1:7-20). Zawlnei Joel in hiai haksatna pen Pathian vaihawmna ahi, achih ban ah, hongtung ding ‘Toupa Ni’ chiang a Pathian vaihawmna hiai sang a aksazaw tham lai ding ahi, chi hi. Huai ziak in, Zawlnei in kisik a Pathian kiang zuan ding in sapna bawl hi (2:13). ‘TOUPA NI’ ‘Toupa Ni’ thumal Laisiangthou a Thukhun Lui bute ah 19 vei kimu hi. A kizom a thiltung banghiam genna ahi kei a, tunung a thiltung ding genna kia leng hi lou in, hun khatpeuh a Pathian hehna leh vaihawmna hongtungte genna a kizang a hizaw hi. Kim leh pam a thiltung lauhuai khenkhatte (2:1-11, 30) bang ‘Toupa Ni’ chi khat a hipah uhi. Huchimah bang in, hun hongtung ding ah thuchiam leh lametna toh kithuah Toupa Ni’ kichi hongtung lai ding hi (1:15; 2:18-3:21). Huai hun chiang in mi tengteng tung ah Pathian Kha sunbuak in om ding a, genkholhna bang, mang muhna bang, leh muhkholhna bang om ding, chih ahi (2:28,29). ‘Toupa Ni’ tungtawn mah in salam vualzawlna bang, gahphatna bang, leh hauhsakna bang hongtung ding a (2:21f;3:16-21), Pathian in a mite toh a thukhun hihkip ding hi. Khenkhat in hiai genkholhna pen Thukhun Thak a Pentecost ni a tangtungta hidan in gen uhi. Bangteng hileh vualzawlna kia hilou in, hongtung ding “Toupa Ni’ chiang in, mikhialte leh Pathian melmate tung ah vaihawmna mulkimhuai mahmah tung ding hi.
ZAWLNEI JOEL THUPUAK
Khauhon in Judah gam a haichi om teng nesia in beisak sipsip hi. Hichi bang keuna Judah gam ah ana tung ngei nailou hi (1:2). Hiai in nek leh tak ah haksatna thupitak tun a, mipi nautang kia hilou in Siampute tanpha adi’n lungkhamna tun hi. Aziak bel, Toupa inn a thillat ding omlou, chih ahi (1:9, 13). Zawlnei Joel in keuna leh taksapna thupitak hongtung pen Pathian hehna leh vaihawmna ahi. Huai ziak in, ‘Toupa Ni’ a manthatna hongtung ding (1:15) pumpelh ahih theihna ding in Siampute’n sai-ip puan silh a kap in (1:13) Pathian inn ah mi tengteng pikhawm uh henla (1:14), mipi tengteng toh anngawl a kap in, puansilh hilou a lungtang botkek in, Toupa lam nga uh hen (2:12,13) chih, Zawlnei Joel thupuak ahi. Huchi bang a mipite’n Toupa lam a ngat ualeh ‘Toupa Ni’ in manthatna hilou in Pathian Kha sunbuak ahi ding a (2:28) Pathian mite vualzawl in om ding uhi (3:16f).
LAIBU SUNGTHU LEH A KILEPDAN
Zawlnei Joel Laibu ah mihingte bitna Pathian khut a om ahihdan taklat in om hi. Pathian deihdan pialsan a mi’n amau hoihsak lampite a zuih chiang un buaina leh haksatna thupitak maituah zel uhi. Huchi bang haksat hun a Pathian mite’ adia lamet ding leh panlak theihna omsun tuh kisikna taktak toh Toupa kiang a kiknawn ahi. Judahte’n lungtang kisik a Toupa kiang lam a ngat ualeh Toupa’n salam vualzawlna (2:18-27) leh khalam vualzawlna (2:28-32) pia in tungding thak ding hi. Zawlnei Joel in siatna a gen Khauhon in gamsung a neksiatna thu ahi (1:4; 2:25). Hiai ganhing pen Khaukhup (locust) genna hi dia gintak ahi. Hiai ganhingte, a tangpi in, kihon zuih uh a, haichi leh loupanou hong pou pantung teng naktak in nese zel uhi. Exo. 10:4 ah hiai ganhingte Pharo leh Aigupta mite gawtna dia Pathian vanzat khat ahihdan kigen hi. Bung khatna ah Khaukhup ziak a nek leh tak a taksapna thupitak hongtung kigen hi (1:1-20). Huchi bang taksapna omlai in, Bung 2:21-27 sung ah Toupa’n nek leh tak kiching pia a gamsung tungding nawn ding ahihdan kimu hi. Bung 2:1-11 ah galdoumi sepaih galhattak hongkuan ding thu kigen a hiai pen Bung khat a Khauhon genna hizaw hia chih khenkhatte gintak dan ahi, himahleh, Bung 2:20 ah Toupa’n huai sepaihhon suchimit ding ahihdan kigen zompah hi. Huai zoh Bung 3:1-21 ah ‘Toupa Ni’ hongtun chiang a namte tung a Toupa’n vaihawm ding ahihdan kigen hi. Hiai thute kikal Bung 2:12-19 ah kisik ding a sapna leh tundingnawn ding thuchiam kimu hi. Salam tundingnawnna kia hilou a khalam vualzawlna kiching, huai tuh bitna, om theihna dia Pathian Kha sunbuak a om ding leng kigen hi. Hiai leng ‘Toupa Ni’ mah a hongtung ding, chih ahi.
LAIBU THUTUN
1. Tulel a ‘Toupa Ni’ hong tung genkhiakna (1:1-20)
1.1 Toupa thu hong tunna (1:1)
1.2 Khauhon ziak a siatgawpna leh taksapna thupi (1:2-12)
1.3 Kisik a Toupa kiang a kik dia sapna (1:13-20)
2. ‘Toupa Ni’ hilhchetna leh kikhekna poimohna (2:1-19)
2.1 Kigalging dia vauna (2:1)
2.2 Sepaihhon hong kuanna (2:2-11)
2.3 Kisik ding a sapna leh tundingnawnna thuchiam (2:12-19)
3. ‘Toupa Ni’ hongtung ding pulakna (2:20-3:21)
3.1 Sepaihhon sukmang ding thuchiam (2:20)
3.2 Nek leh tak tundingnawnna (2:21-27)
3.3 Khalam tunding-nawnna leh Kha sunbuak ding thuchiam (2:28-32)
3.4 Namte tung a Pathian vaihawmna leh A mite tung a vualzawlna (3:1-21)
JOEL LAIBU APAN SIN DING
‘Toupa Ni’ tuh hun paisa ah ana tungkhinta a, tu hun in leng hongtung lellel hi. Pathian bangkim hihthei phalna lou in khovel ah thiltung bangmah om theilou hi. Hun nunung hihtak ziak in Toupa’n a deih masak hilou, himahleh, a phal thiltung deihhuai lou leh mulkimhuai taktak tampi eilak ah leng omta hi. Kisik a Toupa kiang zot hun ahi. Tunung in ‘Toupa Ni’ hongtung lai ding a, huai hun chiang in Pathian in kisik nuam loute leh amah doute tung ah vaihawm in suchimit vek ding hi. Amaute ading in huntawp hita ding a kisikna ding hun nei man nawn lou ding uhi. Tulel a khotang leh nam sung buaina i tuah khenkhatte Toupa hehna leh vaihawmna i tung a hongkia ahi uhi. Huai ziak in, siatgawpna leh manthatna i pumpelh theihna ding in a neupen apan a lianpen tan in, mipite apan makaite tan in, kingaihniamna leh kisikna diktak toh Toupa kiang i zot ding uh ahi (2:13). Toupa’n hon hehpih a hon ngaihdam leh tundingnawn in i om lel ding uhi. Toupa’ ngaihdamna lou in vualzawlna leh bitna i mu ngeikei ding uh.