Laisiangthou hong pian dan, kilep dan leh a sung thu telsui ding thil haksa mahmah khat ahi. Pathian hatkhiak thutak, khalam thute, a kigelhna masa a a diklou omlou, up ding leh zuih ding a thuneihna sangpen leh a tawp ahi. Laisiangthou bupi seh nih in kikhen hi- Thukhun Lui leh Thukhun Thak. Thukhun Lui ah laibu 39 om a, Thukhun Thak ah laibu 27 om hi. Akigawm in Bu 66 ahi. Hiai Laisiangthou Bu 66 sung ah Bung 1189 om a, Tang 31173 leh thumal 773692 vel om a chiamteh ahi. Hiai Laisiangthou Bu 66te mi tuamtuam 40 vel in Kha Siangthou theihsak leh piak a a gelh uh ahihman in (2 Tim.3:16-17; 2 Pet.1:21) a gelh hun sung kum 1500 vel kivei hi. Mi tuamtuam zang a hun tuam chiat a kigelh himahleh Kha Siangthou piak leh theihsak bangbang a gelh Laisiangthou ahihman in a kikalh omlou in a sungthu luangkhawm vek hi. Hiai tuh thil lamdang mahmah ahi. Khang tangthu bu hiam khovel khangthu a thiltung khenkhat chiamtehna lel ahi kei a, Tangtawn Pathian’ thu hing, thilhihthei, Pathian hatkhiak, kibawlhoihna ding leh diktatna lampi a kichilna dia bukim ahi (2 Tim. 3:16; Heb. 4:12). Tangtawn hinna hon kawkmuhtu leh lampi dik hon hilhtu ahi (Sam 199:105). Huai ziak in, limsak mahmah ding leh niteng a sim a sut ding a manpha Laisiangthou ahi.

THUKHUN LUI:
Thukhun Lui sung a laibute B.C. 1400 apan B.C. 400 kikal a kigelh ahi uhi. Hebru pau zang a kigelh ahi a, mun neuchik ah Aramic pau kizangkha hi. Atangpi in Pathian leh Israel namte kikal kisaina thute ahi uhi. Thukhun Lui laibu 39te khenpi nga in kikhen hi-
1. Pentatuk- Mosi Dan Laibute (Genesis, Eksodas, Levitikas, Nambers, Diuteronomi)
2. Tangthu Bute (Joshua, Vaihawmte, Ruth, 1 Samuel, 2 Samuel, 1 Kumpipate, 2 Kumpipate, 1 Kronikil, 2 Kronikil, Ezra, Nehemiah, Esther)
3. Late (Job, Sam, Paunakte, Eklisiasti, Solomon Late)
4. Zawlnei liante (Isai, Jeremiah, Kahlate, Ezekiel, Daniel)
5. Zawlnei neute (Hosia, Joel, Amos, Obadiah, Jonah, Mika, Nahum, Habakkuk, Zephaniah, Haggai, Zekariah, Malaki)

Mosi Dan laibute ah thilsiam thu kigen masa a, huai zoh in, Pathian toh Israel kikal a thukhun bawlna leh thukhun tate zuih ding Dante piakna kimu hi. Tangthu bute ah Israel nam lohchinna leh lohsapna, vualzohna leh vuallelhna thute kigen hi. Late ah Pathian toh Israel kizopna, Israel nam in Pathian a biak ding leh athu a zuih ding uh ahihdan kigen hi. Zawlnei laibute ah bel Israel namte kisik ding, milim biakna leh diktatlouhnate nusia a thumanna leh chihtakna a kiknawn dia sapna thute kimu hi. Thukhun Lui laibute Laisiangthou ahi a, Pathian hatkhiak thutak ahi.

THUKHUN THAK
Laisiangthou a Thukhun Thak laibute ahihleh A.D. 45 apan A.D. 95 kikal a kigelh ahi. Achil in Greek pau zang in kigelh hi. Eite, mikhialte, sik leh tang a Kros a hongsi Jesu Khrist ahihdan leh huai ginna a san ding ahihdan hon sinsak hi. Huai ban ah, Khristian sinsakna dik piakkhiat ding leh huai pansan a Khristian hindan dik hongpiang ding a tup ahi. Thukhun Thak laibu 27te khenpi nga in kikhen hi-
1. Tanchinhoih Laibute (Matthai, Mark, Luke, Johan)
2. Tangthu bu (Nasepte)
3. Sawltaklian Paul Laikhakte (Romte, 1 Korinthte, 2 Korinthte, Galatiate, Ephesate, Philippite, Kolossate, 1 Thessalonikate, 2 Thessalonikate, 1 Timothi, 2 Timothi, Titas, leh Philemon)
4. Laikhak Tangpite (Hebrute, Jakob, 1 Peter, 2 Peter, 1 Johan, 2 Johan, 3 Johan, Juda)
5. Genkholhna (Kilakna)

Tanchinhoih laibute ah Jesu Khrist tanchin kigelh hi. A hong piandan, a hinkhua, nasepna, sihna leh thohnawnna thute kimtak in kimu hi. Thukhun Lui a thuchiam omsa, hongpai ding, Messia pen Jesu ahi chih chiantak in Tanchinhoih laibute ah kitaklang hi. Nasepte laibu pen Tangthu bu kichi a, huai ah nungzui masate tanchin leh Jerusalem sung leh polam a Jesu Khrist Tangthupha dalhzakna thute kigen hi. Saptuam hong kipat dan leh Saptuam khantouh dan leng muhtheih hi. Sawltaklian Paul laikhakte ah Khristian thugin leh huai thugin hinkhiatpih ding dan kigen hi. Atangpi in Saptuamte leh mimal khenkhat kiang a khak ahi uh. Laikhak tangpite’n Sawltaklian Paul laikhakte bukimsak uhi. Kilakna laibu ah tunung a thiltung dingte genkholhna kimu hi. Thukhun Thak laibute Laisiangthou ahi a, Pathian hatkhiak thutak ahi.

Thukhun Lui leh Thukhun Thak kigawm in Pathian tangtawn thiltup taklang hi. Huai ziak in hiai a nuai a thute kimtak in Laisiangthou ah kimu hi:
1. Pathian hihna leh pianken genchetna
2. Khelhna leh thuman-louhna ziak a thukhenna
3. Ginna leh thumanna tungtawn a vualzawlna
4. Hondampa Toupa leh tatna nna sem dia hong kipumpiakna
5. Hong tung ding Kumpigam leh tangtawn a Khrist leh tatsate thupisakna

Hiai Laisiangthou thutak thukzaw a thei ut leh hinpih utte’n mawk ban sim mai lou a sut detdet poimoh hi. Huai ding in simdan chi nih a om hi- Laibu pansan a sim (Book studies) leh Thupi pansan a sim (Topical Studies). Laisiangthou sung a laibu pumlum khat hiam, Bung bangzah hiam gawm a sim, ahihkeh, bawngkhat (portion) telkhiat a sim tuh Laibu pansan a sim i genna ahi. Huai Laibu/Bung sim ding telkhiak a om pen bang hun a kigelh, kuan kuate kiang a a gelh, chih leh bang deihna a kigelh hi hiam chihte kanchet masak zel ding ahi. Huchi hilou a, mun khat kia, Tang khat kia, mallak a sim in theihkhelhna piangsak nuam mahmah hi. Thumal khat theihsiamna ding in a Tang pumpi leh a omna Bung hiam Laibu pumlum hiam in bang gen ahia chih theihchet masak kul hi (context). Huai ban ah, thupi telkhiak nei a huai pansan a Laisiangthou sim leng manpha mahmah hi. Huai thupi toh kisai Laisiangthou pumpi ah bang zah vei a kigenkha a, bang ziak a kigen ahi ua, bangchi bang in a kigen a, bang lam kawk deuh a kigen ahi ua, chihte kanchian kawm a sim in navakna leh theihsiamna hoihtak hon pe ding hi. Huai tuh thupi pansan nei a simdan ahi.

Ahi a, Laisiangthou i sim chiang in ‘hichibang a sim ding ahi’ chihlam sang mah in leng ei a simtu leh a thutak neitu Pathian kal kizopna poimoh zaw gige hi. Ei a simtu hinna ah bang gen ut nei hiam chih leh tu khovel hun a bang gennop nei hiam chih muhkhiat tum a thumna toh pan ding ahi. Huchibang a i sim theih chiang in Pathian thutak ahihna bangtak a thei leh diktak a zang thei i hong hi ding hi (2 Tim. 2:15). Theihdan dik in hindan dik piangsak hi. Toupa’n tuabang hithei chiat ding in Saptuamte hon ompih hen aw.
Laibu pansante:
1. Gotquestions
2. Holman Bible Study (NKJV Edition)
3. Pathian Laisiangthou
4. The MacArthur Bible Commentary