Laisiangthou Pansan: Kilakna 2:18-29

I. THAIATIRA KHAWPI LEH SAPTUAM

A. A Khawpi
“Thaiatira” khiatna ‘thillat’ ahihkeileh ‘kipumpiak’ ahi. Hiai khawpi, Pergamos khawpi’ sim-suah-lam mel 37 a gamla a om ahi. Tulai in Turkey gam a Akhisar kichi khawpi ahi. Hiai khawpi Kua’n bang hun a saat ahia chih a kithei kei. Hun paisa ah hiai khawpi Zab lui pang a leihoihna mun khawta neuchik Pelopia chih in a om chih bel a kithei hi. Himahleh Jesu Khrist pian ma kum 300 ding in ahihleh Grikmite tenna mun ahong hita a, Thaiatira chih a khek in a om hi. Laisiangthou siam khenkhat in hiai khawpi Persia kumpi a zoh khit nung a Grikmi Alexander thupi in Grikmite tenna dia a saat ahi a chi uh.
Kilakna laibu a kimu bang a Thaiatira saptuam kiang a lai khak ahih lai in Rom kumpi lamlian poimoh tak in a tot khak, leihoihna mun leh haichi chinna mun gahsuah tak ahi. Khawpi lianlaw lou himahleh sumdawnna mun poimoh tak ahi. Hiai khawpi ah sumsinna tuam tuam tamtak a om hi. Huai sumsinnate ahihleh sangbawlna (bakery) sumeng, samul puan, beelvel, sing a nasep, puanmalngat, savun leh adang dangte ahi ua, a biiktak in puan sandup a minthang pen ahi.

B. A Saptuam
Laisiangthou ah Thaiatira khawpi a tanchin hoih kigenna thu leh saptuam akiphuhna thu a kimu kei. Kilakna laibu simlouh Thaiatira khua kigenna omsun ahihleh Nasepte 16:14-15 ahi a hiai bang ahi: “Huan, a min Lidia, puan sandup zuak, Thaiatira khawmi, Pathian bia numei khat in ka thu a za a; Paul’ thugen zui ding in Toupa’n a lungtang a hihvakta hi. Amah leh a inkuanpihte’n baptisma a tan khit un, ‘Toupa a ginom a n’on seh uhleh ka inn ah hong tung un’ chi in, a hon ngen a, a hon khou hi.”
Hiai ah Thaiatira khawmi, puan sandup zuak numei khat Lidia kichi leh a inkuanpihte’n Paul tanchin hoih gen gingta in baptisma a tang uh chih i mu hi. Hiai apan in khristian a hong suah nung un Lidia leh a inkuanpihte’n a kipatna khua uh Thaiatira khawpi a tanchin hoih va gen ua, tua apan saptuam hong dingkhia hiding a gintak ahi. Kilakna laikhak ahihlai in Lidia dam nawn lou leng ahi maithei hi. Hiai saptuam lian lua kei mahleh Jesu Khrist in lai a khakte lak a khat dia a telkhiat leh saptuam sagihte kiang a laikhak teng lak a leng laikhak saupen ahih in Jesu Khrist in hiai saptuam a ngaipoimoh mahmah chih a kilang hi.

II. JESU KHRIST AMAH A KIGENNA (Tang 18)
A. Pathian’ Tapa
Thaiatira saptuam kiang ah Jesu Khrist in ‘Pathian Tapa’ ka hi chi in kipulak hi. Hiai Kilakna laibu sung a “Pathian Tapa” kichi thumal a kigen masakna pen ahi. Jesu’n “Pathian Tapa” ka hi a kichih bang a gen nopna ahia? Ei mihingte a pa leh tapa i om bang a Pathian Tapa kichi ahi kei. Pathian in zi nei in tapa a nei kei. Pathian in Mari kipolhpih in tapa Jesu a nei kei hi. Jesu Pathian Tapa ahihna ahihleh Amah Pathian ahi a, A Pathian ahihna bei tuan lou in mihing in ahong piang chihna ahi zaw: “A tung in thu a om a, thu tuh Pathian kiang ah a om a, thu tuh Pathian ahi . . . Thu tuh sa ahong suak a, i kiang uah ahong teeng hi” (Johan 1:1,14).
Thaiatira saptuam kiang a Pathian Tapa hi a Jesu A kigenna in “Keimah tuh Pathian ka hi a, bangkim ka thei a, bangkim tung ah thu ka nei a, bangkim ka hihthei hi. Thaiatira saptuam noute tung a leng thunei leh thilhihthei leh na tung ua thukhentu leng ka hi” a chihna ahi.

B. Meikuang Bang Mit Nei
Jesu Khrist in Meikuang Bang Mit Nei a akigen in Aman a mite pawlam kilatdante, hihna ki-imnate leh kilimbawlnate muh paisuak theihna a nei chih a gen hi. Amah mit muh ah kuamah a kiselgu thei kei a, aman a mite hihna diktak kichian tak a mu in a thei suak vek hi. Huchi in, na tungtang uh ka gen ding teng leng na hihna diktak mah uh ahi a, huaiziakin, ngaikhawk in limsak un a chih a gen hi.

C. Sumsan Nawttet Bang Khe Nei
Jesu Khrist in Sumsan Nawttet Bang Khe nei a akigen in Aman khelhna leh thu/thil diklou (Injustice) totmaat (trample) theihna leh hiai thil chiingmite gawt theihna a nei chih a gen hi. Jesu Khrist a siangthou a, aman khelhna leh diklou peuhmah ngai thei lou in hua hi. Khelhnate leh diklouhnate aman a mohpaih a hiai thil hoihlou hihte a kisik kei uh leh a tung uah thukhen in amaute a gawt ding chih a gen hi.

KINGAIHTUAH IN KIVEEL NI
Tuni in gingtu kichite leh gingloumite ahih keileh saptuam leh khawvel in kilamdanna kichian tak nei lou hileng kilawm hi. Kilamdanna kichian tak omlouhnate lak a khat ahihleh khelhna poisaklouhna leh khelhna hih zongsatna ahi a, neek-le-dawn ah, sum-le-paai muhna leh piakna ah, neih-le-lam neihna ah leh saptuam, khawtaang leh politiks vaai ah a kilang kholdiak hi. Hiai bang a gingtute leh saptuamte a kiakniamna ziak Jesu Khrist Pathian ahi a, a siangthou a, bangkim a thei a, bangkim tung ah thu a nei a, bangkim a hih thei a, mi chih a thilhih bang bang a pe ding a thukhenpa leh kisik loute thunun dingpa ahi chih phawkna taksap ziak ahi.
Hiai thutak phawklouhna in i gamtat ah a hon zaautat sak a, khelhna leh dikna chih leng khen thei nawn lou khop in eimah nopsakna ding leh letna ding leh thupina ding delhna in gingtute leh saptuamte’ sia-le-pha theihna a mialsak zouta hi. Huai ziak in, gingtute leh saptuam in Thaiatira saptuam kiang a Jesu Khrist in Amah a kipulaknate ngaihtuah thak in Amah a siangthou bang in eimah leh eimah leng kihihsiangthou leng chiin i kichial hi (I Johan 3:3).