Laisiangthou Pansan: Kilakna 2:12-17

T.12: Huan Pergamom khua a saptuamte angel kiang ah hichibang in gelh in: Namsau hiamtak hiamtuah nei in hiai thilte a gen hi:
T.13: Na tenna leh Setan mangtutphah omna leng ka thei hi; ka min kiptak in na lenden a, Setan tenna mun a ka palai ginom, Antipas thah a a omlai in leng na ginna na tawpsan tuankei hi.
T.14: Himahleh demna zek kon nei, huailai a mi khenkhat Balaam sinsakna zuite na ompih ziak in, Israel tate ma a kipukna koih ding leh milimte kiang a kithoihna thilte ne ding leh kingaihna khelhna hih ding in aman tuh Balak a thuhilh hi.
T.15: Huchi bangmah in Nikolpawlte sinsakna zui, mi khenkhat mah na ompih hi.
T.16: Huai ziak in, kisik in; huchilou in zaw na kiang ah ka hong pah dia, amau ka kam a namsau in ka dou ding hi.
T.17: Saptuamte kiang a Kha thugen bil nei peuh in za uhen. A vualzoupa kiang ah manna selguk ka pe ding, huan suangpek ka pe dia, huai suang tung ah min thak, a neipa chih louh ngal theih louh a kigelh a chi, chi in.

I. PERGAMOS KHAWPI LEH SAPTUAM
A. A Khawpi
Pergamos khawpi Pergamom khawpi leng a kichi a, a min khiatna ahihleh “Kiteeng” (married) ahi. Asia Minor mal-tum lam a om, Rom kumpi gamkhen (province) Mysia munpi (capital) ahi. Kum 25 sang a tamzaw Rom kumpi in tutphah a neih ziak in khawpi poimoh mahmah ahi. Pergamos khawpi Smarna mallam mel 45 vel a gamla leh Aegean tuipi apan mel 20 vel a gamla a om ahi. Tu hun a Turkey gam a Bergama khawta in a huamkhak mun khat ah a om hi. Neih leh lam a hausa leh sabiak limsak mahmah khawpi ahi. B.C. 29 in Rom khawpi leh a kumpipa Augustus zahtakna in Rom Kumpipa biakin masapen lam ahi. Hiai ban ah milim pathiante: Zeus, Aphrodite leh Ascelepios biakinte leng a om hi. Huai hun a laibu gelhmite’n, “Asia gambub (province) a khawpi tengteng a milim pathian tengteng gawmkhawm sang in Pergamos khawmite’n milim pathian tamzaw a nei uh” a chi uhi. Ascelepios ahihleh damsakna (healing) pathian ahi a, gul lim tawn a biak ahi. Damna lunggulh in damlou tamtak hiai pathian be ding in Pergamos ah ahong paikhawm zel uh. Pergamos khawpi Setan mangtutphah omna, amah ukkhum khawpi leng ahilai hi: “Na tenna leh Setan mangtutphah omna leng ka thei hi” (Kilakna 2:13).
Laisinna leh siamna lam ah Pergamos khawpi a minthang mahmah a, laibu tuamtuam 200,000 nei university khat a om hi. Savun laipuan kibawlna masapen ahi a, damdawi lam sintheihna skul leng a om hi. Damdawi lam siam mi khat Galen kichi hiai khawpi a piang ahi a, aman damdawi lam toh kisai laibu khat a gelh “Anatomical Procedures” kichi tumlam gamte leh suahlam lailung gamte’n kum 1600 sung laibu zatpen in a nei uhi.

B. A Saptuam
Nasepte laibu ah Pergamos saptuam kiphuhkhiatna thu a genkha kei. Himahleh Nasepte 19:10 a Dr. Luke in Sawltak Paul in Asia gam teng ah tanchin hoih a gen chih a gelh hi. Hiai thu apan Thukhun Thak Laisiangthou siam tamtak in Ephesa khua a Paul in tanchin a gen hun a, Pergamos khawpi a leng tanchin hoih va gen a saptuam va phut hi ding in a gingta uh. Hiai ngaihdan thil hithei mah ahi a, ahikei chihna ding leng a om tuankei.

II. JESU KHRIST AMAH LEH AMAH A KIGENNA (T.12)
“Namsau Hiamtak Hiamtuah Nei in hiai thilte a gen hi” Pergamos saptuam kiang a “Namsau Hiamtak Hiamtuah Nei” a kigen in Jesu Khrist Amah leh Amah A kipulak hi. Kilakna 1:16 ah Sawltak Johan in Jesu Khrist kam apan namsau hiamtuah a suakkhia chih a gen a, hiai thu in namsau hiamtuah kichi Jesu Khrist’ (Pathian) kam apan thupawt genna ahi chih a kichiansak hi. Namsau Hiamtuah in a sutna mun tung leh nuai thuuktak ahih keileh vei leh tak zaatak, a aat tuak theih bang in, Jesu Khrist kam apan thupawt in thilhihtheihna thupitak a nei chih a gen hi. Namsau hiamtuah bang a Jesu Khrist’ thugen akizatna mipawl leh a kizatdan nih a om a, huaite ahihleh:
1. Ginglou Kisikloute Tung a Thukhenna Mulkimhuai Tak a Tunna
Kilakna 19:15 ah hiai thu kigen hi: “A (Jesu Khrist) kam akipan in namte a satna ding, namsau hiam khat ahong suakkhia hi: amau tung ah sikchiang in vai a hawm dia: Pathian Bangkim-hihthei hehna lauhuaina uain sukna a chil hi”. Pergamos khawpi Setan mangtutphah omna (Setan in a ukkhum) khawpi mun ahi a, huai bel mi tamtak in milim pathiante leh Rom kumpipa lim tawn in Setan mah leng a bia uh chihna ahi. Jesu Khrist in Setan leh milim pathian bemite leh mihing pathian a nei a bemite a dou gige a, a kisik kei uleh a tung uah Jesu Khrist in thukhenna mulkimhuaitak a tun ding hi.

2. Mihing Hinkhua Kikhekna
Hebrute 4:12 ah hiai thu a kigen hi: “Pathian thu a hing a, thil a hihthei a, namsau hiamtuah bangchibang sang in a hiamzaw, hinna leh kha, guhlawi leh guhngek tuamkhen hel khop in a sunthei a, lungtang a ngaihtuah leh tupte a theipah thei hi.” Pathian’ thu tuh Namsau hiamtuah bang ahi a, mihing pawlam saptuam peel in a sunglam a ngaihtuahna, a phawkna leh a deihtelna tanpha lawngkha thei khop in thilhihtheihna a nei hi. Mikhial hih kiphawkna, khelhnate kisikna, Jesu Khrist gintakna leh Amah thumang ding a kipiakna a neisak thei hi. Hiai bang a Pathian’ thu in thilhihthei ahihna a kilatnate lak a khat ahihleh Nasepte bung 2 a kigen Pentikos ni a sawltak Peter in Pathian’ thu a gen in mihing 3000 a khelhna uh kisiksak a Jesu Khrist gintaksakna ah ahi.

KIVEELNA DING
Namsau hiamtak hiamtuah bang a Pathian’ thu a tunna ding bangchibang mipawl na hi hiam? Thukhenna mulkimhuaitak a tunna ding ginglou leh khelhna kisiik tumlou mipawl lak mi na hi hia; ahih keileh hinkhua kikhekna ding mipawl lak a mi na hi zaw hia? Pathian’ thu in thilhihtheihna thupitak nei mahleh Pathian hon deih leh lamet bang a i hinkhua a khektheihna ding in eimah mimal in gingta a i saan (accept) poimoh hi. Pathian in mimal chih kiang a A hon piak deihteltheihna kalh in bangmah ahon hihlui (forced) ngeikei hi. Eimah deihtelna zang a Amah leh a thu zui dia i kipiak chiang kia in Aman A thu zang in i hinkhua A deihlam in A hon kheksak ding hi.
Buhchithehpa gentehna thei gige in. Buhchi hoih kitheh mahleh a tukna lei zil in gahsuah leh gahsuahlou a om hi. Nang leh kei lungtang buhchi hoih, Pathian’ thu kiakna lei ahi. Na deihteltheihna zang a na thupukna zil in Pathian’ thu in nangmah ah nna sem ding hi.