Laisiangthou Pansan: Kilakna 2:1-7

THUMASA
Tutung in Kilakna 2:1-7 pansan in Ephesa saptuam kiang a laikhak study bawl leng i chi hi. Bible chang kipete mimal in na sim leng deih huai i sa hi.

A. A Khawpi - “Ephesa” thumal khiatna (meaning) Deihhuai (desirable) ahi. Rom lalgam sung a Asia gambub a khawpi lian leh poimoh pente lak a khat ahi. Tuhun a Turkey kichi gam sung a om ahi. Kilakna laibu kigelh ma kum 1200 vel a Grikte phuhkhiat khawpi ahi. Mihing 250,000 vel tenna khawmpi lian mah mah ahi. Long khawlna munpi, kisumdawn tuahna mun poimoh leh khawpi neizou leh hausa leng ahi. Hiai khawpi huai hun a khawvel a thillamdang sagihte lak a simtel ahi. Hiai khawpi ah a minthang mahmah Grikte’ pathiannu (goddess) Artemis’ (Diana leng kichi) biakinn a om hi. Artemis ahihkeileh Diana ahihleh sabetna (hunting), chiphatna (fertility) leh naupianna (birth) pathiannu ahi. A biakinn futbol field nih sang in a sau zaw a, a biakinn kisia tuni tan in muhtheih in a omlai hi. Ephesa khawpi tumlam ah sawltak Johan in Kilakna laibu a gelhna mun Patmos tuikulh a om hi.

B. A Saptuam
Ephesa saptuam sawltak Paul in a phuhkhiat ahi (Nas.19). A Missionari khualzin thumveina a sawltak Paul Ephesa khua a hongtun in thugen siam Apollo’ thugen gingta, baptispa Johan nungzui mi bangzah hiam ana om uhi. Apollo in baptispa Johan’ thutawi leh nasep kia thei leh tangkoupih ahihman in a gingtate’n Jesu Khrist’ hinkhua, A sihna leh A thohnawnna thu a thei kei uh. Sawltak Paul in a kiang uah, “Na gintak chiil ua pan Kha Siangthou na tang uhia?” chia a dot leh amau “Tanglou, Kha Siangthou a om chih zak leng ka za kei uh,” chi’n a dawng uh. Sawltak Paul in Jesu Khrist’ tanchin hoih a hilh khit in amaute’n a gingta ua, Toupa Jesu’ min in baptisma a tang ua, Kha Siangthou a tung uah a hong tungta hi. Mitkhialdawi hihmi tamtak inleng Jesu Khrist a gingta ua, amaute’n a laibute uh a hontawi ua, mi tengteng mitmuh in a haltum uhi. Sawltak Paul in Ephesa saptuam a phuhkhiat apan kum 3 sung ompih in saptuam kem kawm in tanchin hoih a gen zom zel hi (Nas 20:31). Ephesa a sawltak Paul’ nasep lohching mahmah ahi ngei dia, Nas 19:10 ah Dr. Luke in, “Asia gam a om teng Judami leh Grikte’n leng Toupa’ thu a zata uhi” chi’n a gelh hi.

Sawltak Paul in a tangkoupih Jesu Khrist tanchin hoih in pathiannu Artemis ahih keileh Diana biakna leng nakpi tak in a holh kha hi. Dangka siksek a Artemis ahihkeileh Diana lim bawlpa Demetrias in amah bang-a a nekzonpihte samkhawm in Paul’ thugen in a nekzonna uh a hihsiat kia hilou in, pathiannnu Artemis ahihkeileh Diana tanpha hihneu a omloh ding ahi, chia thu gen a fuihsia in kiphinna leh buaina thupitak piang sak hi (Nas 19:25-27). Buaina a ven nung in sawltak Paul in Ephesa nusia in Masidonia gam lam ah a paita hi.

Anung in sawltak Paul in Ephesa saptuam kem ding in Timothi a sawl hi (ITim. 1:3). Khristian martarte tanchin gelhtu Thieleman J. Van in a laibu gelh Martyrs Mirror kichi ah, “Timothi in kum 15 sung Ephesa saptuam a heutu hihna toh a kep nung in gingloute’n Ephesa khua ah suang in a denglum uh” chih leh Philemon’ sikhapa Onesima leng Ephesa khua a suang a denlup ahi chih a kigelh” a chi hi. Timothi nung in sawltak Johan in Ephesa pansan in, Ephesa saptuam leh a kim leh kiang a om saptuamte kem hidia gintak ahi. Saptuam thugousiah ah sawltak Johan in Kilakna laibu a gelh khit in zalenna piak in a om a, Ephesa khua a kiknawn in a damsung ni nanungte hiai khawpi ah a zang, chih a kigelh hi.

II. Ephesa Saptuam Kiang a Thugentu
Ephesa saptuam kiang a thugentu Toupa Jesu Khrist ahi. A thugente gelhkhia a saptuam kiang a khaktu sawltak Johan ahi. (Kil 1:1;17-18; 2:1). Kilakna 2:1 ah anuai a thil nih i mu

A. Ephesa Saptuam Angel
“Angel” kichi Grik thumal angelos ahi. Thukhun Thak siam William F. Arndt leh Wilbur F. Gingrich in Laisiangthou ah angelos tam vei tak a kizang a, a kizatna tampen leh tangpi pen angel genna ahi, a chi uh (A Greek –English Lexicon of the New Testament, s.v. aggelos, pp. 7-8). Himahleh Grikte laigelhte ah “angelos”, mihing genna in a kizang a, Laisiangthou mun tam tak ah mihing thupawtu (human messenger) genna a zat ahi. (Mat 11: 10; Mark 1: 2; Luke 7:24, 27; 9: 52 en in). Kilakna 2:1 a “angel” kichi van angel hilou in, Ephesa saptuam a mihing thupawtu pastor ahihkeileh saptuam upa ahihkeileh zawlnei ahi.

B. Jesu Khrist, Amah A Kigenna
1. A Khut Taklam a Aksi Sagihte Tawi:
“Aksi Sagihte” kichi Saptuam Sagihte’ Angelte genna ahi a (Kil 1:20b), huaite ahihleh pastorte ahihkeileh upate ahihkeileh zawlneite ahi uh. “Tawi” kichi Grik thumal “kraton” ahi a, thunei tak a tawi ahihkeileh kiptak a Len chihna ahi. “Khut taklam a tawi” kichi in thuneihkhumna leh kepbitna a gen hi. Jesu Khrist in “A khut a Aksi sagih tawi” kichi in Jesu Khrist in saptuam pastorte ahihkeileh upate ahih keileh zawlneite tung ah thuneihna bukim A nei a, huan amaute A kembit chih a gen hi. Johan 10: 28-29 ah Jesu’n bangkim Hihthei Pathian’ khut a gingtute kepbit a om ahihna uh hichi’n A gen hi: “A kiang uah tangtawn hinna ka pia, a mangthang ngei kei ding ua, Ka khut apan kuamah in a sutkhe thei kei ding uh. Amaute hon pepa, Ka Pa miteng sang a thupizaw ahi, mi kuamah in ka Pa’ khut apan a sutkhe thei kei ding uh.”

2. Dangkaeng Tuikuang Koihna Sagih Lai a Vialvak
Kilakna laibu sung ah “tuikuang koihna” kichi mun sagih ah a kigen hi (1:12; 13; 20; 2:1, 5; 11:4). “Tuikuang koihna” kichi tuah vial vial theih bawm lianlou sung a kithun sathau a khauzang, a mawng lang khat sathau a kidiah, a mawng lang khat kidekuang meivak (lamp) ahi. Upalamte’n a mukha ding ua, nidang lai deuh in ei lak ah leng phutuan kichi meivak a kizang a, huai dan deuh ahi ding. “Tuikuang koihna Sagih” in Kilakna bung 2 leh 3 a kigen tualsung saptuam sagihte a gen hi (Kil 1:20). Hiai saptuam sagihte khalam a mial hiai khawvel a taang khia (vak khia) khalam vakna (spiritual light) ahi uh. Hiai in saptuam pastorte, upate leh makaite’n niteng hinkhua leh nasep a diktatna leh sianthouna a khawvel mite etton hih ding a gen hi. “Lai a Vialvak” in enkhia a suichian hihna a gen. “Tuikuang koihna sagih lai a vialvak” kichi in saptuam sagihte lak ah Jesu Khrist a om a, a dinmun uh leh a hihna uh thei dia en in a suichian, chih a gen hi.

C. Aksi Sagih leh Tuikuang Koihna Sagih
Tukhun Lui leh Thukhun Thak ah 7 nambar poimoh kigente lak a khat ahi. Nambar 7 a kizatna masapen ahihleh Genesis bung 1 ah ahi. Pathian in vante leh lei a siamna in ni 6 a lut sak a, a ni 7 ni in a khawl hi. Hiai tuni tan a khawvel a nipikal khat a ni 7 a kiom sak kibulphuhna ahi. A ni 7 na Israelte adia ni sehtuam, Sabbath khawlni siangthou ahi (Deut 5:12). Laisiangthou ah thil khatpeuh zoh ahihna ahihkeileh a bukimna toh nambar 7 genzom zel ahi.

Laisiangthou ah nambar sagih 735 vei a kizang a, Kilakna laibu sung ah thil tuamtuam toh kisai in 54 vei zat ahi. Kilakna laibua a kizatna teng a etsak nei a kigen chiang in nambar 7 in bukimna (completeness) ahihkeileh phazah (totality) a kawk hi. Huchi’n aksi 7 leh dangkaeng tuikuang koihna 7 in sawltak Johan in lai a khak tualsung saptuam sagihte huai hun leh a nung a khawvel tawppha a hong om tou ding saptuam tengteng sik leh tang a ding ahihna uh a ensak hi.

Lak Ding Sinlai
1. Paul in gahsuah tak a Ephesa a saptuam a phuhkhiat theihna thuguk ahihleh amah theihna, pilna, hatna leh thilhihtheihna hilou in, Kha Siangthou’ thilhihtheihna in ahi zaw (Nas. 1: 8). Pastorte, Evangelistte, upate leh missionarite’n tanchin hoih gen ding dan tuamtuam, hih ding, hihlouh ding, vanzat tuamtuam, gam leh inn ding i buaipih zahzah in Kha Siangthou’ thilhihtheihna a Pathian thutak i gen theihna ding awlmoh in buaipih leng i nasep a gahsuah zaw ding hi.

2. Saptuam neitu leh a tung a thuneihna bukim nei Jesu Khrist kia ahi. Saptuam a pastorte, upate leh makaite Jesu Khrist’ sikha leh saptuam mite nasemtu (servant) lel i hi uh. Huaiziak in Jesu Khrist’ deihlam Laisiangthou a kigente toh kituak a saptuam kem a i makaih ding uh ahi. Pastorte, upate leh makaite’n amau mah saptuam neitu leh a tung a thunei sangpen a kingai a, mahni deih dandan a saptuam mite thuzoh a talkaih teitei ding ahi kei. Khawvel a pawl tuamtuamte leh sum dawng pawlte’ thupi (Profit and Loss) bang a, saptuam mi tamsak ding leh thilpiak tamsem kaihkhawm ding kia awlmoh a neih ding ahi kei. I kep saptuamte Laisiangthou thutak a vak a, Jesu Khrist a siam piching ahih ding uh awlmoh pen leh tup pen a neih ding ahi. Hiai mah ahi, Jesu Khrist in a saptuam a a thil deih leh tup.

3. Khawvel ah niteng in mihing kipahna ding leh nopsakna ding (Entertainment) awlmohna lian deuhdeuh hi. Hiai in saptuam khenkhat thuzohta eive, chih in a om. Saptuam khenkhat in saptuam mite Pathian’ thutak a vak a, Jesu Khrist batna a khan sak ding sang in amaute kipahna leh nopsakna ding a awlmoh zawta uh. Saptuam khenkhat a biakna kikhopte, abiktak in tuailaite biakna kikhopnate ah Pathian’ thutak sinsak chihte om nawn lou in lasak kia leh biakna kikhop hun a om ding dan kikupna leh extempore speech a hun zat bei, chih bang muh ding a omta. Saptuam heutu khenkhat in “Pulpit a thugente’n khelhna thu gengen nawn louh ding ahi, khelhna thu i gen tam leh saptuam mite lunglel sak a, thadah sak a, kikhawm kiam sak i hi. A hoihna thu uh gen tam leng hong kipak ding ua, kikhawm leng tam semsem ding ahi, a chi uh. Hiai ngaihdan Setan apan ahi a, hiai apan saptuam makaite pilvang a kivenbit a poimoh hi. Sawltak Paul in, “Mihing maipha hia ka zon Pathian a? Ahihkeileh mihing ahi maw lungtaisak ka tup? Mihing nana lungtaisak lel hitaleng, Khrist sikha ka hi kei ding” a chi hi (Gal. 1:10). Khelhna i taisan zahzah a i khristian hinkhua siangthou ahi. Khelhna i taisan theihna dia khelhna i kitheihsak ngai a, khelhna i kitheihsakna dia i gen mah poimoh ahi, chih theih ding ahi.

(Aban Sutzop ding)