Romete 16.1-27

Thumasa: Paul in Rome laikhak seppihte deihsakna leh Chibaibukna in a zou hi. Saptuam a Pathian nasemte hihna kibanglou mi tuamtuam sepkhawmna ahi. Sir Arthur Sullivan in, “Sepaih pawlpi hat bang Pathian saptuam pai, Unaute paini hang misiangthou paina, kikhen omlou hihang sapum khat i hi, Lamet thugin a khat itna a leng khat” chi in la a phuak hi. Paul in a laikhakna ah seppih hat leh hatloute phawk in Pathian gam nasepna a minloh theih liai teng minloh in Chibai a buk hi. Pathian gam nna eimah tan chiat, eimah mun chiat a i sep chiang un Khrist pumpi khang in itna ah amah leh amah a kilamtou hi (Eph 4.16b). Pathian gam nna seppihte chibaibukna leh itna leh deihsak thukhahte Pathian lungtang a pan kigelh mah ahi hon chisak hi.

I. PAUL SEPPIHTE CHIBAIBUK DIA NGETNA: (1-6):
(a) Phoebe Genna: Laigelhtu khat in, “Rome laikhak a lunglut huai hang in Bung 16na Pastor, makai leh Sinsaktute’n a simpeih kei uh” a chi hi. Pathian gam a seppihte it leh ngainate ading in hiai bung simsim in thahatna honguan hi. Paul in Bung 16.1,2 mimal khat, Phoebe, Kenkria khua a saptuam a ‘sikha nasemtu’ tungtang a genna ahi. Hiai a sikha chih ‘diakonon’ ahi a, ‘deacon’ chihna ahi. Paul in a seppihte deihsak in it hinah e hon chisak tuh Romete kiang ah “Phoebe na kipahpih a, a poimoh leh na huh ding in” a ngetsak hi. Ama’n mi tampi panpih ahi chih a gen hi. A minkhiakna, “vak leh tangpha” chihna ahi.

Seppih Dangte Genhoihna (3-16):
(i) Seppih it leh ngaih Prisca leh Aquila leh a inn ua saptuamte Chibai hon buksak un. Amaute’n Paul hinna humbitsak uh a chi hi
(ii) Epaenetus, ka it, Asia gam buppi a Khrist a piangthak masapen Chibai hon buksak un,
(iii) Mari, nou adia semgim,
(iv) Andronika, Ka chipih leh ka hentakpih,
(v) Ampliata, Toupa a ka deihtak,
(vi) Urbana leh Stakhi, chibai hon buksak un a chi hi.
(vii) Khrist mitak, Apelli, chibai hon buksak unla,
(viii) Aristobula inkuante lak a mite Chibai hon buksak un,
(ix) Herodia, a chipih,
(x) Narkissa inkuante lak a Toupa a ommite Chibai hon buksak un a chi.
(xi) Triphaina leh Triphosa, Toupa a semgimte, Chibai hon buksak un.
(xii) Deihtak, Persi, Toupa a semgim Chibai hon buksak un,
(xiii) Toupa a tel, Rufa leh a nu, kei nu leng Chibai hon buksak un a chi hi.

(b) Alompi a Chibai Bukna (14-16): Tang 14 a kipan in seppih mimalmalte leh a nasep uh genlou in amin uh hon gen hi. Asinkaraita, Phligon, Herma, Patroba, Hermi, a kiang ua om unaute toh Chibai honbuksak un a chi hi. Philologa leh Julia, Neria leh a sanggamnu, Olimpa leh a kiang ua misiangthou om tengteng Chibai hon buksak un. “Tawp Siangthou in Chibai kibuk unla, Khrist saptuam tengteng in Chibai honbuk uhi” a chi hi. Hiai sung ah min theih leh theihlouh tampi a om hi. Paul in a seppihte a itna leh a nasep uh a hoihlam a kipahpihna a gen hi. “Tawp Siangthou” a chih bang genna hiam chih i theikei hi. Seppihte, a sepna mun, a haksatna uh theihpih leh thumna leh thilpiakte a kihuhtuah Pathian nasemte om ding dan ahi chih hon ngaihtuahsak hi.

II. KITHUHILHNA POIMoh (17-20):
(a) Saptuam a pukna siamte: Paul in Rome saptuamte kiang ah, “Thuhilhna tuam, noumau hilhlouh lam a kikhenna leh pukna siamte apan kiveng ding leh kiheisan ding in kon ngen hi” a chi hi. Saptuam phattuampih louh ding leh kikhenna tun theite kiheisan ding ahi. Tita kiang ah leng dotna haihuai, khangthu suina kiselna, dan thu a kilainate nungngat in a chi hi (Tita 3.9). Timothi kiang ah Paul in saptuam ah kiselna haihuai nungngatsan ding in thu a pia hi (2 Tim 2.23). Huchibang mite enzui, ‘mark them’ a chi a, Gk ah ‘Skopeo’ a zang a, hiai apan scope, telescope, microscope, a kizang hi. Pilvangtak a muchian a, kiheisan ding a chi hi. Pathian saptuam liamsak thei, puksak theite a pan kiven ding ahi.

(b) Gilpi Nasemte: Huchibang mite ‘Toupa nasem hilou in gilpi sikhate ahi uh’ a chi hi. Hiai mite dangnal in kamsiam mahle uh a Khrist leh saptuam sang in amau angma a khual zaw uhi. Paul in, kros melmate, a tawpna uh siatna, a Pathian uh a gilpi uh ahi a chihte ahi (Phil 3.18-19b). Hiai mite’n kamsiam in mi mawlte a khemzou nak uhi. “Setan vak sawltak bang a a kibawl bang in heutu, makai, a lem Khrist palai bang a kigente lak ah pilvang un” a chi hi (2 Kor 11.13-15).

(c) Rome Mite Hihna: Rome khua a Pathian saptuamte, heutu leh makai dikloute a kipan a bitna uh “Khrist leh gospel a zuihna ziak uh” ahi. Huaiziak in Paul in, “Amasa in khovel tengteng ah na ginna uh a than ziak in na vek ua tung a ka kipahthu Jesu Khrist ziak in ka Pathian kiang ah ka gen hi” a chi hi (Rom 1.8). Thil hoih lam ah pil ding leh gilou lam ah mawl ding in a hanthawn hi. Huchi in lemna Pathian in a khepek nuai ua Setan sikden sak ding a chi hi. Saptuam in Setan tung ah Khrist zohna sunzom zel ding ahihna a lang hi. Paul in Rome Saptuamte Setan tung a Khrist zohna koppih ding chih a genzoh in “Toupa hehpihna na kiang uah om hen, Amen” chi in a vualzawl hi.

III. CHIBAIBUKNA THU (16.21-24):
(a) Paul Seppihte Chibaibukna: Bung bul ah Rome saptuam in Paul sik leh tang a Chibai buksak dia ngetna i sin uhi. Hiai sung ah Paul seppih, a kiang a omte’n Rome saptuam Chibai a bukna uh ahi. (a) Timothi- Ka naseppih muanhuai, ta in a pa a seppih bang a hon seppih in chibai honbuk a chi hi (Phil 2.22). (b) Lucius- Kurini khomi, zawlnei leh sinsakmi in Chibai a buk hi (Nas 13.1). (c) Jason- Thessalonika khua a piangthak masapen chih a ompa’n Chibai a buk hi.
(d) Sosipater- Min lamtom Sosiper, Bera khomi in Chibai a buk hi (Nas 17.10-12). (e) Tertius- Paul laikhak gelhtu (f) Gaius- Korinth saptuam a a tunnapa uleh saptuam tengteng in Chibai a buk uhi. (f) Erasta-Korinth saptuam sumkempa’n leh unaupa, Kuartus in Chibai hon buk, chi in “Toupa Jesu Khrist hehpihna na vek ua kiang ah om hen, Amen” chi in a vualzawl hi.

(b) Pathian Phatna (Doxology) (25-27):
Rome laikhak doxology lungkhoih tak, a tapa, Jesu Khrist nasepte ziak a Pathian phatna in a tawp hi. Laisiangthou mun tamtak ah Doxology a om hi. Sam laibu phatna himahleh Section nga topna teng ah Doxology a om hi (41.13;72.18- 19; 89.52; 106.48;150.1- 6). Sam 150na chang teng doxology ngen ahi a kichi hi. Paul in Rome laikhak zohna a vualzawlna a gen chituam hi. Pathian a phatna ah laikhak thupite hon gennawn hi. A laigelhpa, Tertius apan pen la in Paul in Tanchinhoih mite phutkiptu, Tanchinhoih Jesu phuangkhetu leh Tanchinhoih Pathian thuguk phoulaktu chi in a gelh hi. (tt.25-26).

(i) Tanchinhoih mite hihhat theipa, mite phutkip thei chih in a om hi. Pathian Tanchinhoih in nam leh gam, inkuan leh mimal hihhat in phutkip leh tungding thei ahihna Paul vualzawlna ah loh masak in a om hi. Hiai a phutkip chihna in sterizo (to establish) a kizang hi. Huai tuh kipsak, khauhsak, hatsak, chihna ahi. Paul in Tanchinhoih a phuhkip ahihna ding un a thumsak hi.

Anihna a, “Jesu Khrist ka tangkoupih uh” (the preaching of Jesus Christ) a chi hi. Mite phutkip thei Jesu Khrist Tanchin hoih ahi chih i genta uhi. Korinthte kiang ah Paul in, “Koumau thu ka genkei ua, Khrist Jesu Toupa thu ka genzaw uhi, koute leng Jesu ziak in sikha ka hih uh leng ka gen zel uhi. Jesu Khrist mel ah Pathian thupidan theihna vak honpe ding in, “Mial akipan vak a vakkhe ding” chipa Pathian in i lungtangte a salvakta ngal hi” a chi hi (2 Kor 4.5-6).

(ii) A thumna ah, Pathian thuguk kiseel, Tanchinhoih in a phuangzakta a chi hi. Paul in, “huai thuguk tanglai sawtpi mahmah sung selguk a na om mahleh, tun bel ginna thumanna piangsak ding in zawlnei laibute zang a nam tengteng kiang a theihsak leh tangtawn Pathian thupiak bang in taklat in a hong omta hi” a chi hi (25c-26). Hiai thuguk- kisel bang ahia? Isai in, “Ka sikha Diktat in a theihna in mi tampi siam a tangsak ding a, a thulimlouhna uh a puaksak ding” a chi hi (Isa 53.11). Ezekiel in, “Lungtang khat ka pe ding a, na sung uah lungsim thak ka koih ding: Huan a sa ua kipan lungtang sak ka lamang ding a, lungtang nem a kiang uah ka pe ding hi” a chi hi (Eze 11.19). La in “Endih Kalvari mual tung ah selguk thugil a puakzak, Pathian hehpihna’n a chinkhawm, a luangzak kiman lawmlawm, Pathian itna leh lainatna, mihing lam ah a luangkhia, Dikna leh itna kituak in khovel mohpuak pomta uh” chi in Pathian thuguk Kros ah hong luangzakta hi.

Thukhitna: Pathian gam nasemte a pilpente hikei mahleh ki-it a sepkhawmna lohchinna ahi. Paul in a seppihte a min ua lou in Chibai buksak ding leh, a seppihte chibai bukna deihsakna toh Rome saptuam ah a khak sawn hi. Hiai ki-itna, ki deihsakna, saptuamte hihna genna ahi. Mun haksa a semte ziak a mun nuam a om thei i hi. Singtang khota a semte ziak a khopi leh Office a sem thei i hi. Pathian nasemte Pathian mai ah poimoh leh manpha chiat i hi uhi. Itna toh i minte uh lou in i kithumpih ding uhi. I omna mun chiat ah i hinna Pathian phatna leh midangte ading a vualzawlna in i zang ding uh. Jesu Khrist Tanchinhoih mite, inkuan, nam leh gam tungdingtu ahi. I tanchinhoih in Pathian thupina ei ah hong tangsawn ding a, Pathian thugukte honlak zel ding ahi. Sa leh kha a Vualzawlna tang ding in Pathian in hon ompih zel hen. Amen.