Text : Romete 14.1-15:33
Thumasa: Khristiante khovel a chi bang a siate bawldik ding leh vak bang a midangte lampi dik kokmuh ding a Pathian seh i hi. Huchih kawm in vaihawmmite thuthu a om ding a sinsak i hi uhi. Vaihawmmi Pathian seh ahih ziak in amaute nial in Pathian nial chih in a om hi. Leiman leh siah tuamtuam lakkhawmte diktat tak a pe ding a sinsak ahi uhi. Huai bang a khosak theihna ding in ki-ittuahna loungal batlouh ding in sinsak i hi. Mitengteng kiang a i bat itna ahi a, mihinpih leh Pathian itte’n dan a zoukim uh a chi hi. Tulai thil omdan in Khrist ni hong naidan a hon sinsak ziak in khalam ihmute khanglou ding, puansilhte khek a, Jesu Khrist a kithuam un a chi hi. Tuni’n gingtu hat leh hatloute ading a vualzawlna hithei ding a Pathian thilgeel i sutkhawm ding uhi.
GINNA HAT LEH HATLOU UNAUTE (1-6):
(a) Hihna chiat kizahtak ding ahi: Rome saptuam ah ginna a hat leh hatlou unaute a om uhi. A hatte’n bangkim nethei ding in a kisep ua, a hatloute’n anteh- louhing kia a ne uhi. Paul in michih amau hihna bang chiat a ki pawmsiam a, ki zahtak ding in sinsak hi. Midang in ni dang tengteng sang in ni khat a ngai thupi zaw a, midang in ni tengteng kibang in a sep hi. Nitan thu ah pawl nih a om nawn uhi. Paul in, “Ni tangpan Toupa pahtawina ding in a tang a bangkim nepan leng Pathian kiang a kipah thugenna in a ne hi. Ni tangpa hi in, tangloupa’n leng Pathian min thupina ding a a hih ua, bangkim nepa leh neloupa’n Pathian min thupina ding a hih ding ahi” chi in a sinsak hi. Hihna kibangloute kipawm a kizahtak ding a chi hi.
(b) Toupa a ding a hin ding ahi (7-9): Rome saptuam leh koimun peuh a Pathian saptuam omna ah ginna hatte leh hatloute Toupa ading a hin ding ahi. A pilna leh a mawlte leng Khrist adia i hin ding uh ahi. Paul in, “Kuamah eimah adia hing i hi kei ua, kuamah eimah adia si leng i hi sam kei hi” a chi hi (t.7). Paul in, “Kei ding in hin Khrist ahi a, huan sihna leng punna ahi” a chi hi (Phil 1.21). “I hin leh Toupa ading in i hing a, i sih leh Toupa a ding in i si ahi ngal a, huaiziak in i hin inleng i sih in leng Toupa a i hi” a chi hi (t.8). Thessalonika saptuamte kiang ah, “I hah inleng i ihmut inleng, amah toh i hinkhawm theihna ding in i sih sik in amah a sita hi” a chi hi. (1 Thes 5.10). “Jesu Khrist sihna leh thohnawnna ziak tuh, mihing leh misi Toupa ahihtheihna ding ahi” a chi hi. Jesu Khrist sihna ziak in misite Toupa ahi a, a thohnawnna ziak in mihingte Toupa ahi. I hah in leh i ihmut inleng amah toh hingkhawm uhi.
(c) Pathian in Vaihawm ding (10-13): Nek leh dawn thu hiam nitan thu hiam, ziak dangdang inleng midangte gensiat louh ding ahi. Midangte gensiat leh simmohna Pathian vaihawmna mai a tut a om ding ahi. Laisiangthou in, Khuk chih ka ma ah a khukdin ding a, lei chih inleng ka kiang ah kichiam in thu a chiam ding chi in kei leh kei kilou in ka kichiamta, thu lah diktatna in ka kam a kipan in a pawtta a, a hongkik nawnta kei ding” a chi hi (Isa 45.23). Pathian mai ah eimah tanchin chiat gen ding i hih man un kigense nawnkei ni. Paul in, “Michih in sapum a thilhihte a sia a pha in, i hih bangbang a i muhchiat theihna ding in, Khrist thukhenna tutphah ma ah hihlat in i omvek ding uhi” a chi hi (2 Kor 5.10). Midang kisuihna leh dalna ding koih louh ding ahi. Pathian in a vaihawmna mai ah thil tengteng lalut ding ahi, “Pathian in thilhih chiteng, thil selguk chiteng, a hoih hia ahihkeileh a hoihlou toh vaihawmna a la lut ding ahi”
(Ekli 12.14).
(d) Nek leh dawn thu kideidan louh ding (14- 23): Toupa Jesu ah sianglou bangmah a omkei mahleh nek leh dawn thu ah kuahiam in sianglou a chih leh amah a ding a sianglou ahimai hi. Na thilnek ziak a unau lungtang a nat leh itna dan zuilou chihna ahi. Pathian gam thu nek leh dawn thu hilou in diktatnate, kituahnate leh Kha siangthou a kipahna ahi. Banghiam nek ziak a midang a puk leh sa neklouh, uain dawn louh thil bangpeuh hihlouh ahoih hi. Korinth saptuam ah kithoihna sane leh nelou kikal ah kideidanna om hi. Kithoihna sanek a siang hia, sianglou chih sang in hiai in midang a bawlhoih hiam chih et ding ahi. Paul in, “Ka sa nek in ka unau a hihpuk sang in, ka unau ka hihpuk louhna ding in kumtawn in sa himhim ka neta kei ding hi” a chi hi (1 Kor 8.13).
II. GINNA A PICHING UNAUTE (15.1-6):
(a) Jesu Khrist etton ding ahi: Pathian Saptuam ah theihna leh dinmun kibanglou gingtu omkhawm ahi. Kikhop taima, thumna a taima, thilpiak a lunglut, vaihawm siam, khalam nasepna a hat deuh, leh hatlou, thadah deuh a om chiat hi. Paul in, a hatte’n hatloute thuakpih kawm in hatloute hihhat ding a chi hi. I thilhihte peuh ah Jesu Khrist etton ding ahi. Jesu’n amah kipahna zonglou in midangte hoihna ding a zong hi. “Laisiangthou a kuhkalna leh khamuanna mu a lametna i neihtheihna ding in thu kigelhte, eite hon hilhna ding a gelh ahi” a chi hi. Gingtute’n midangte kipahna ding leh hatsakna ding in Khrist omdan etton ding ahi. Midang kipahsak theihna ding in, midang ngaihsak, eimah ki mangngilh, Khrist etton, Laisiangthou sim, Pathian hatna a kingak leh Pathian thupina piak ding ahi a chi hi
(b) Juda leh Jentelte lamet Khrist ahi (15.7-13): Paul in saptuamsungamituamtuamte pumkhat a om ding in ngetna bawl a, a hatloute leh a hatte pumkhat a kigawm a, Juda leh Jentelte’n Pathian khat a biakkhawm theihna ding un ngetna bawl hi. “Khrist in Pathian hihthupina ding a nou a hon kipahpih bang in nou leng kipahpih chiat un” a chi hi. Kipahpih genna kammal ‘proslambano’ a zang a, accept, pawm chihna ahi. Kibatlouhna tampite’n Jesu Khrist pumpi ah pumkhat in amah toh hon kankhawm hi. Jesu Khrist nasepsa Juda leh Jentelte ading ahi. Abraham, Isak leh Jakob a Pathian thuchiam tangtunna ding leh hotdamna Judate lak a a tun masakna ding in Judate khat a hongpiang in Juda dan ah khangkhe mahleh Jentelte ngimna a hong pai ahi.
Pathian hotdamna thilgel ah Jentelte dinmun Thukhun lui laibu ah gelh in a om hi. Jentelte’n leng Pathian a phat ding uh ahihdan genna in, “Huaiziak in Jentelte lak ah k’on phat ding a, na min pahtawina ding in la ka sa ding” chih ahi (2 Sam. 22.50; Sam 18.49). Dan laibu ah “Nou Jentel tengteng aw a mite toh kipak un” a chi nawn hi (Diut 32.43). Sam laibu ah, “Aw namchihte aw, Toupa phat unla, michihte aw, amah phat un” a chi nawn hi. Isai in, “Jesse zungzam a hong khang ding a, Jentelte tung a vaihawm dingpa a hong dingkhe ding hi; amah ah Jentelte’n a lametna uh a koih ding uhi” a chih hong tangtung hi (Isa 11.10). Pathian in namte awlmohna ziak in Abraham na tel a, Jentelte lak a theihpihtu ding a sep in “noute ka palaite na hi uh” a chi hi (Isa 43.10).
(c) Paul Jentelte Sawltak ahihna (14-21): Jentelte lak a Sawltak hi ding a a nu gilsung a kipan sehtuam ahihdan Paul in a gen hi (Gal 1.15-16). A tung a kigen bang in Judate lak ah Tanchinhoih a gen masa ua, himahleh a nial ziak un “Jentelte lam ka ngata uh” a chi uhi (Nas 13.46). Paul in Jentelte lak ah “Siampu nna” ka sem a chi hi. Thukhunthak ah siampu nna omkei mahleh Jentel gingtute Kha siangthou hihsiangthou sa, Pathian khut a lat a a nasep a chi hi. Khamangthang man chihna ahi. Nihna ah Jentelte lak a “Thugenpa” ka hi a chi hi. Khrist itna in a sawl teitei ziak in, “Tanchinhoih gen kei leng ka tung gik ding hi” a chi hi (1 Kor 9.16). Tanchinhoih a zasate lak a genlou in a za nailoute kiang ah gen in Jentelte lak a maphutu (pioneer) a hi.
III. PAUL IN ROME PHAK A SAWMNA (22-33):Paul in Rome saptuam a veh theihlouhna Jentelte leh a za ngeiloute kiang a a pai ziak ahi. Saptuam i veh chiang in member tamna, thu zasate masa in i koih hiam kivel ni. Kikhelsak chih thumal ‘hindered’ apan teisawn, Gk ah ‘enkopto’ chih ahi a, lampi tousia, singluang a dal chihna ahi. Thu za ngeiloute awlmohna in dal chihna ahi. Spain gam, Jonah taimangna gam ah hoh a sawm hi (Jon 1.3). Masidonia leh Akhai a gam a Jentel Khristiante thilpiakte Jerusalem a pedia a hoh chiang in Rome tawt a sawm ahi. “Khrist vualzawlna dim in ka hong ding” a chi hi. Paul in Judia gam leh Jerusalem a a bitna ding in thumpih teitei ding in a ngen hi. Huchi a Pathian hoihsak bang halhkhawmna ding a chi hi.
Thukhitna:
Pathian saptuam ah dinmun leh hihna kibangloute, khalam a hat leh hatloute leng i hihna kizahtak chiat a, Jesu Khrist a hin ding ahi. Pathian in thil tengteng vaihawmna a lalut ding ahihman in midangte gensiat louh ding ahi. Nek leh dawn khalam dinmun tehna ahihlouh man in midang toh kideidan louh ding ahi. Thil bangkim ah etton ding Jesu Khrist ahi chih theigige ni. Khrist in a hon ngaihdam bang a kingaihdam chiat ding ahi. Khrist ah Juda- Jentelte gouluahpihte, pumpi hiangte leh thuchiam tanpihte ahih bang un, a zawng a hau, alian-aneu Khrist ah khat i hi uhi. Pathian in Tanchinhoih zangeiloute leh khamangthangte itna leh awlmohna in hon dimsak henla, thu nasemte taksap awng huthei ding leh midangte adia vualzawlna hithei ding in hon ompih chiat hen, Amen.