Text: Romete 13.1-14

Thumasa: Romete laikhak ah Paul in mi tengteng khelhna thu, hotdamna thu, siamtansakna thu, siangthousakna leh mailam thupisakna lametna, thu-up lam a sinsak zoh in Israelte paihkhiakna ziak a Jentelte hotdamna leh tunung a tunding nawn a a omna ding thu uh a gen hi. Huai zoh in niteng hinkhua a zuih dingte a banban in a gen hi. Khalui in pumpi latkhiakna Pathian ngaih in kithoihna hing, Siangthou leh Pathian lungtuak Biakna dan ahih thu i gen uhi. Kha siangthou thilpiakte mite ginna leh a kipiakna bang ua piak ahihdan leh niteng a tua thilpiakte eimah ading, midangte ading leh Saptuam zat ding ahihdan leng i houlim uhi. Gingtute’n vaihawmmite thuman ding thu i sutkhawm ding uhi.

I. VAIHAWMMITE THUMANNA: (1-7):
(a) Vaihawmtu Pathian she ahi: Pathian in Khristiante vaihawmmite thuman ding thupiak ahi.1 A ziak tuh vaihawmmite Pathian seh ahi ua, kuapeuh vaihawmmi sel tuh Pathian sel ahi a chi hial hi. Puksa khovel a i om sung un i Bitna ding, khosa lamlak thei ding in thuneitu kuahiam vaihawmna a poimoh hi. (i) Vaihawmmite’n Pathian leh gamsung dan toh kituak in vai a hawm uhi. (ii) Pathian in vaihawmmite amah sik leh tang a palai vaihawm, thil hoihlou dal a, dan bohsiate gawt ding leh mihoihte a kembit uhi (1 Pet 2.13-17). (iii) Paul in vaihawmmite ahi bang in a hilhchian nung in Pathian deihdan a vaihawm lou pawlpi sang a Pathian lau zawk ding chih a sinsak hi (Nas 5.29; Dan 316-18). (iv) Gingtute tengteng in vaihawmtu leh thuneite ading a thumsak dia thupiak i hi (1 Tim 2.1-10).

(b) Vaihawmmite thuman ding: Paul in gingtute’n, khovel a i omsung vaihawmte thuman ding ahihdan a gen hi. Rome kumpi’n gingtute gawt leh sawisa kawm a vai a hawmlai in Paul in gingtute kiang ah vaihawmmi thuthu a om ding a sinsak hi. Vaihawmmite i thumanna ding ziak hiaite ahi:
(a) Vaihawmte Pathian she ahi uhi,
(b) Vaihawmmi sel tuh Pathian sel ahi,
(c) Vaihawmte selte gawt a om ding ahi,
(d) Vaihawmmite’n gilou doudal ahi uhi,
(e) Vaihawmmite’n thilhoih omsak ua,
(f) Vaihawmmite gilou gawt dia seh ahi uh,
(g) Vaihawmmite sia leh pha theihna ziak a thuman ding chih ahi.

Thilhoih hihte ading in vaihawmmite lauhuai lou a chi hi. A ziak bel vaihawmmite’n khelhna neilou tung a dan zanglou uh a chi. Thilhoih hihte ading in vaihawmmi a laukei uh a chi hi. Vaihawmmite thuman Pathian thuman hithei ahihna ah vaihawmmite thu na zuih ding ahi.

(c) Siah piak ding ahi:
Pathian hehna lauh ziak ban ah sia leh pha theihna ziak in leng vaihawmmi thuthu a om ding a chi hi. Vaihawmmite Pathian sik leh tang a thunei ahihman un siah liau ding ahi. Abik in saptuamte’n pawl dang leh solkal toh kal a diktattak a kizopna a bawl ding ahi. Mi tengteng kiang ah piak dingte pia unla, leiman piakna dingpa kiang ah leiman pia unla, siah liauna dingpa kiang ah siah liau unla, kihtak dingpa kihta unla, zahtak dingpa zahtak un chih ahi.
a) Hill House Tax piak teitei ding ahi;
b) Inmun-Lougam patta neite’n premium sun ding ahi;
c) Meivak fee piak ding ahi a, tulai in prepaid hong kizat leh a hoih sem hi,
d) Tui fee a kha-kha, thuneite’n piak ding a chihdan dan ua piak ding ahi,
e) Telephone leh wireless zatman ahun a piakpah dingte ahi,
f) Computer toh kisai, microsoft office leh wordte genuine zat ding ahi,
g) Gari, peinih, pei li leh a tunglamte leng dan in a ngiat bang Tax sun ding hi, h) Sumbukte register bawl ding, ganvulhte, nekzonna toh tax piak ding ahi,
i) Bible, Labu, Cassette leh mi laigelhsa zatsawnna ding ah phalna lak ding ahi,

II. UNAU KI-ITNA (8-10):
Paul in siah piak ding thu, batlouh ding ahihdan a genzoh in bat gige ding khat a gen kiittuahna ahi. Saptuam masate Pa Origen in, “Itna leibat ei ah a omden a, hon taisan utkei hi. Hiai leibat niteng a piak gige Tangtawn a bat ahi” a chi hi. I Toupa hehpihna hauhna apan hiai bat piakding i neizou gige ua, i piak tam zoh peuhleh piak ut semna leh kipahna hong hi. Jesu’n, Thupiak thak konpia ahi, ki-ittuah un; ken nou k’on it bang in, nou leng ki-ittuah un. Na ki-ittuah uleh mi tengteng in ka nungzuite na hi uh chih hiai ah a thei ding uh” a chi hi” (Jn 13.33-34). “Kingaihniamna, migitna tengteng, thuaktheihna toh, itna a kithuakzou chiat in” i om ding uhi (Eph 4.2).

(a) Itna kizatna: Itna zaw dan zuihkimna ahi chi a a gen zoh in Dan laibu a thupiak poimoh nga hon genkhia hi. A kivolhdan kituak sipsip kei mahleh, amasa lite thupiak sawm a kigen ahi a, a nanung pen Dan ngana pen Levitikas a kipan ahi (Exo 20.13-17;Diut 5.17-21; Lev 19.18). (i) Angkawm ken, (ii) Tualthat ken, (c) Gu ken, (di) Eng ken, chih leh (e) Nangmah na ki-it bang in na vengte na it ding chih in dan thute a khaikhawm vek a chi hi. Itna diktak, Pathian itna a mi khat a khosak chiang in Dan in a ngiat diktatna zou in itna bangkim a khaikhawm vek hi. Jakob in a laikhak ah, “Himahleh Laisiangthou in, “Nangmah na ki-it bang in na vengte na it ding ahi” chih kumpi dan na zop uleh na hih hoih uhi” a chi hi (Jak 2.8).

III. KHRIST NI HONGNAINA:
(11-14): Paul in Pathian itna dan zuihkimna ahi chih a phuankhiak zoh in gingtute Jesu Khrist hong painawnna ding a naih mahmah ziak in amah batna nei a om a poimoh dan hon gen hi. Hun tuamtuam ah Toupa hongpai nawnna ding thu dong koikoi pawl a om uhi. Amau a kiman louh ziak ua hiai dong uh ahithei a, Toupa hongpai nawnna chih omse lou hileh chih a deihna ziak ua dong ahi thei uhi. Himahleh eiten Toupa hongpai nawnna lametna toh Khrist ni hong naita ahi chih thei in khamuang leh tawldam in i om ding uh ahi.

(a) Khanglou un (11-12a):
Paul in Rome khopi a Pathian saptuamte khalam ah ‘khanglou un’ chi in a thuhilh hi. “Huailou in, tu bang hun ahia chih na thei ua, ihmu khanloh a hun mahmahta chih na thei uhi. Tun zaw i gintak tunglai sang in i hotdamna a nai zawta hi” a chi hi. Khanloh hun mahmahta ahihleh khangma, thil kikhel thei a om chihna ahi. Paul in hiai ah salam ihmut thu hilou in khalam ihmutna, lusukna leh khawphoklouhna a gen hi.
Toupa hongpaina ding a naita chih genna in, “Tunzaw i gintak tunglai sang in i hotdamna a naizawta” a chi hi. I hotdamna a chih pianthakna hilou in pumpi tatna bukim ngahna ding, hotdamna bukim, Toupa hongpai chiang a i ngahna ding gen ahi. Huaiziak in khanglou un a chi hi. (b) Paikhia un (12b-13): Ihmu khangma, hun laplou dek in a khanloh toh kiton in a puansilhte hawkkhia a a thohkhiak bang in puansilhte khek in, khelhna tawpsan in, kisikna toh hindan thak in khosa un a chihna ahi. “Zan a bei dekdek ta a, khua a vak dekta hi; huaiziak in mial a thilhihte paikhia in vak thuam in i kithuam ding uh.” Khovak chiang a zanpuan silh a khosa kuamah a omlou bang in na puansilhte uh paikhia un a chi hi. Zu dawnna, Zu khamna, hukna, kingaihna (aselgia) zumna neilou chihna, kilaikisual (eris), leh hazatna, enna (zelos), paikhia un a chi hi. Hiaite a kibual kawm in khovak ah na khosa theikei ding chihna ahi.

(c) Kithuam un (14): Toupa hongpaina ding naita hihman in, khovel vak honglang pah ding ahih ziak in mial thilhihte paikhia in “vak thuam in I kithuam ding uh” a chi hi. “Mial thilhihte paikhia in Toupa Jesu Khrist in ki thuamzaw un” a chi hi. Pathian tate “khalam ah Jesu theihna ah khang in amah a zungkai leh lamtouh in om un” huchi hileh “Khrist itna, diktatna, siangthouna silhsak a om in Jesu Khrist in na kithuam thei ding uh” a chi hi (Kol 2.7). Huan na sa duhgawlna uh pichin ding in “bangmah kibawl kei un” a chi hi. Grik kammal, Pronoia a zang a, huai tuh sa-utna sem ding a lungsim a ngaihtuah khawl, kisakholsa a omlouh ding chihna ahi. Paul in “Na pianken lui uh, na nidanglai hindan uh segawpsa suahkhia unla, Na lungsim Kha uah a thak in hong om unla, Pianken thak, diktatna leh sianthouna a Pathian batpih a siampen silh un” a chi hi (Eph 4.22-24).

Thukhitna: Paul hunlai a Rome kumpi vaihawmte’n saptuam nakpi’n a sawi uhi. Jesu Khrist ginna ziak a gingtute thuakna mulkimhuaite ban ah Paul mahmah Rome kumpi, Nero in a ngawngtan ahi. Himahleh Paul in “michih vaihawmmite thuthu in om uhen, vaihawmmite Pathian seh ahi uh” chi in saptuamte a sinsak hi. Leiman leh siah piak ding ahihdan a gen zoh in, “Itna, dan zohkim na ahih ziak in ki-ittuahna loungal kuamah bangmah ba kei un” a chi hi. “Khrist ni hong naita ahihman in khanglou unla, puansilhte suahkhia in, Jesu Khrist in kithuam unla, na sautna uh hih tangtunna ding gelkholh leh ngaihtuah in nei kei un” a chi. Vaihawmmite thumang ding leh itna a dim a, Khrist tuak ding a mansa a om ding in Toupa’n hon Vualzawl hen.