Text : Romete10.1-21

Thumasa: Pathian itna bangzah a lian hi in, mi tengteng a hotdamna huang ah pilut sawm mahleh Pathian lampi gelsa tawnlou in a huang ah kuamah lut theilou ahi. Judate Pathian thu theihna ah, Jentelte tung a mi ahi uhi. Pathian Dan leh thupiak neitute ahi uhi. Amau theihna dan ah Pathian a zondan uh leh a dan thu a limsak dan uh huai kan sepding omlou in a thei uhi. Pathian itlou deihlou hilou, amau a hihtheih tawp a pang a Pathian zawng a kichih lai ua, Pathian Hotdamna huang a pan posiah a om thil mulkimhuai ahi. Vei leh awlmoh thu a pianthak ding hileh Paul in a chipih Judate tengteng a veina in Pathian lungtang zou mahmah ding i sak lai in ginlouhna ah a puk ua, Messia a pomlouh ziak un a kiakpih uhi.

I. JUDATE ADIA PAUL THUMNA (1-3):
Paul in a mite awlmohna lungkhamna thupi leh lungkhamna dai theilou a nei chih i sinta uhi. Paul lungtang deihlam leh Judate dia a thumna “hotdam a hihtheih nading uh ahi”, a chi hi. “Huchi in Jesu’n a gingta Judate kiang ah, “Ka thu a na om gige uleh, ka nungzuite na hi taktak ding uhi. Huan thutak na thei ding ua, thutak in a hon suaktasak ding” a chi hi (Jn 8.31-32). Judate’n Pathian thutak omsun Jesu Khrist a gintak louh ziak un Pathian Dan thu a theihte uh a manthat loh uhi. Paul thumna genna thumal, “deesis” a kizang a, huai omzia tuh ngetsak, thuzoh sawm, ngetna khollou a pia chihna ahi. A lungtang un Jesu sang mai le uh Hotdam hiding a chih chiang in lametna toh ngetsak chihna ahi. Mikhial hotdamna ding a thumna ah Pathian kipak mahleh mikhial kisikna a deihdan ahi.

(a) Judate phattuamngaihna diklou (t.2): Paul in a mite adia a thumna ziak Judate Pathian lam a a phatuamngaihna ziak uh ahi. Pathian a it ua, a dante a ngaisang ua, a thupiakte a limsak ua, himahleh theihna in ahikei a chi hi. Paul in amah thiltuah a kipan in a mite dinmun a muchian lua hi. “Ka pipute thusiah tung a ka phatuamngaih khol ziak in Juda sabiak dan lam ah leng ka chite laka ka khanvual tampi ka khengta” a chi hial hi (Gal 1.14). Pathian lamthu ah phatuam a ngai uh chih ka theihpih a, himahleh theihna a hihvak ahikei uh a chi hi. Pathian thu khuak theihna (gnosis) hilou in khalam theihna leh hihvakna (epignosis) gen ahi.2 Sa leh sisan hon theihsak na hikei, ka pa van a om hon theihsak na hi a chih bang in hotdamna ginna tunglam leh sunglam a Khasiangthou tawn a theihna ahi.

(b) Pathian diktatna theihlouhna (t.3): Judate’n Pathian mai a a hihkhelh lianpen uh a diktatna a theihlouh uh ahi. Theihna a hihvak ahihlouh ziak un Jesu Khrist a gingta kei uhi. Kha masa ah, “Israel, diktatna dan delhte’n, diktatna pen a pha zouta kei uh. Bangziak in ahia? Ginna in a delhkei ua, thilhih a muhtheih bang in a delh ziak uh ahi. Pukna suang ah a pukta uhi” chih i sin uhi (Rom 9.31). Israelte’n Pathian a lunggulh ua, a diktatna dante a deih ua, Pathian lungtuahna ding kithoihna, nitan, anngawlna, danzuihna leh mihing muhtheih a kilawmte zui in Pathian diktatna Jesu theilou in a sangkei uhi.

(c) Khrist Pathian Diktatna ahi: (t.4): Judate’n Mosi dante leh zawlneite thugente ban ah pu-pa thugousiahte zui in amau a diktatna lohkhiak, lamkhiak a sawm uhi. Pathian mai a diktat hih a ut ua, muhtheih thilte ah theihtawp a suah uhi. Pathian in diktatna mihing lohkhiak theih ding a koihlou in, Jesu Khrist sihna, vuina leh thohnawnna ah mi tengteng khelhna ngaihdamna leh diktatna a koih hi. Jesu Khrist in Pharisaite diktatna khup in Mosi dante, lungsim ngaihtuahna leh kithoihna dante (moral & ceremonial law) a zuizou hi. Kuapeuh in Jesu a hondampa a a san chiang in Jesu Khrist dikna silhsak a om in khelhna neilou, mohsak ding bei, Pathian mai ah midiktat chi a phuankhiak in a om uhi.

II. JUDATE’N GINNA THEILOU UH: (5-15):
(a) Mosi Dan a ginna: Judate’n Pathian siangthouna leh hotdamna lampi a theihlouh bang un Pathian hotdamna thilgel, ‘ginna’ omzia a theikei uhi. Paul in, “Israel, diktatna dan delhte’n, diktatna pen a pha zouta kei uh. Bangziak in ahia? Ginna in a delhkei ua, thilhih a muhtheih bang in a delh ziak uh ahi. Pukna suang ah a pukta uhi” a chi hi (Rom 9.31-32). Pukna suang a chih Jesu Khrist ahi. Pathian hotdamna Jesu Khrist ginna a kinga hinapi, Mosi dan a diktatna a hotdamna ngah ding a zuih a sawm uhi. “Dan a diktatna zui zaw, huai diktatna ziak in a hing ding” chi in a gelh hi (t.5). Judate’n Jesu Khrist a Pathian Hotdamna a theilou in amau diktatna a lamkhiak a sawm uhi.

(b) Diktatna a Ginna (5-8): Dan in nasep tellou a diktatna om theilou chi a a sinsak lai in ginna a diktatna in, “Ginna a diktatna in bel hichi in a gen: “Na lungsim in, kua ahia van ah kah ding? Hiam, ‘tunglam a kipan Khrist va pisuk ding’ chihna ahi; Kua ahia khukthuk a hohsuk ding? Hiam, ‘huai bel misi lak a kipan Khrist pitou nawn ding’ chihna ahi, chi ken” chi in. Tunglam a pan Khrist pisuk hiam khukthuk a hohsuk ginna toh kisai khalou a chi hi. Ginna bang hita hiam? “Thu in a honnaih hi, na kam leh na lungtang ah a om” chi in, a gen ahi; huai ginna thu ka gen pen uh ahi” a chi hi (t.8). Lungtang a gingta a, kam a gupna “ginna” a chi hi.

(c) Hotdamna Ginna (9- 13): Jesu Khrist ginna ziak a Pathian Hotdamna ngahna ding sinsakna mawlpen hiai ahi, “Na kam a Jesu Toupa ahi chih na gup a, misi lak a kipan Pathian in a kaithou chih na lungtang a na gintak leh hotdam in na om ding. Min lungtang in a gingta ua, diktatna a mu uhi; kam in a gum ua, hotdamna leng a mu nak uh ahi” a chi hi (t.9-10). Mikhial hotdamna ding in khelhna kisik a Jesu Khrist ginna a san ding ahi. Jesu Khrist Pathian tapa ahi chih kam a gup ngamna ginna genkhiakna ahi. Misi lak a kipan Pathian in a kaithou chih ginngamna muanna kingakna ahi. Kam a gupna leh lungtang a ginna Pathian hotdamna thawn piak phuankhiakna ahi (Rom 10.9- 10)

III. JUDATE’N PATHIAN THUGEN THEILOU UH: (14-21):
Judate’n Pathian hotdamna thilgel a theihsiamlouh ziak uh Laisiangthou a theihsiam louh ziak uh ahi. Laisiangthou in, “Kuapeuh a gingta tuh a zahlak kei ding” chi a Jesu Khrist thugenkholh Judate’n theilou in Khrist a gingta kei uhi (Isa 28.16). A ban ah “kuapeuh Toupa minlou tuh hotdam in a om ding” chi in Joel in a genlawk hi (Joel 2.32). Judate’n Jawlnei thugen theisiam hile uh, Jesu Pathian Tapa leh ‘Toupa’ chi a, a lalna leh thuneihna nuai a kipelut a hotdam hi ding uh ahi. Judate’n Laisiangthou thei kisa napi a gen omzia theilou in Jesu Khrist ziak in a pukgawp uhi.

Huaiban ah, “Thil hoih tanchin kipahhuai tunte khe kilawm natel e!” chih gelh bang in (Isa 52.7). Mi tengteng hotdamna thupawtu Jesu Khrist a nialna uh ahi (Jn 3.16). Judate’n zalou uh a diam? Za nake! “A husa uh gamchih ah a thang a, a thu uh kawlmong pha in a thangsuakta” chih ahi, a chi. Mosi in, “Mipi dia gentham louhte k’on haza sak dia; nam pilloute zang in k’on hehsak ding,” a chih leh Isai in, “Kei hondeih ngeiloute zon in ka om; hon zong ngeiloute muhkhiak in ka om: ka min pulou nam kiang ah, “Hon en un, hon en un” ka chi hi. Mi helhatte ading in nitum in ka bante ka zak” chia a gen Jentelte Pathian hotdamna huang a om a Judate posiah a omna ua Judate dinmun genna ahi.4 Pathian thu lakkhelh nam pumpi ading a manthatna ahi. Huai ziak in Pathian thugen theisiam ding a sutsut ding, zonzon ding ahi.

Thukhitna: Judate tampi in Pathian leh a dante ngaina mahmah, a thu leh Biakna, kithoihnate limsak a, tha leh zung sum leh pai tampi sennung a Pathian hotdamna lampi tawn khalou a om uhi.

Jesu Pathian Diktatna, Pathian Hotdamna lampi omsun na neita hiam? Judate’n ginna thilhih toh a kaihmat ziak un Pathian thawnpiak diktatna ah posiah in a om uhi. Kam a Jesu gupna leh misi lak a kipan Pathian in a kaithou chih gintakna hotdamna ahi. “Min lungtang in a gingta ua, diktatna a mu ua, kam in a gum ua hotdamna a mu uh”, Paul in a chi hi. Laisiangthou a Pathian thugen thei ding in sim in, ngaihtuah in, thum in. Simtu it, Pathian hotdamna thawnpiak Jesu Khrist ginna ziak a ngah ding a piak na neita hiam? Suan ding neilou, Jentelte’n Jesu Khrist ziak a Pathian tate chih a i om lamdang nah e! Toupa’n hon vualzawl hen. 