Text : Ephesate 3:14-21
Thumasa: Toupa’ Misiangthoute chibai. Tutung i Bible Study-na uah Ephesa Saptuamte adia Paul thumna sutkhawm ding in i kisa hi. Hiai a Paul thumna tuh Thukhun Thak sung a thumna thupi mahmahte lak a chiamteh ahi.1 Paul in a laikhak simtute ading in thumna, mi malmal ngim deuh in neihsak khin a (1:17-19), tu’n a pawlpi, Saptuam, Pumpi, Inkuan, ngim deuh in thum hi.

Ephesate 3:14-21 Genchetna:

Tang 14-15: Paul in Pathian’ thiltup mihingte vualzawl ding ahihdan leh Pathian’ thiltup toh kisai a gelh laitak in thum utna nei hi. Ephesate adia Paul a thumlai in khukdin sa a thum ahi chih i mu uhi (t. 14). Hiai dan a thum ding chih Pathian in ngiat neikei mahleh Daniel leh Jesu, hun haksatak lak leh launa thupitak kal ah khukdin in thum uhi. Khukdin in i tung a thuneipa kiang a i kipumpiakna ensak ahi chih taklang hi. Paul in Ephesa Saptuamte a itdan leh lainatdan Paul thumna apan muhtheih hi.

Paul kua kiang a thum hiam i chihleh, “Lei leh Van a inkuan chiteng min phuahkhiakna Pa” kiang a thum ahi (t. 15). Hiai a ginna a inkuante, huai tuh Saptuam, Pa Pathian min apan phuahkhiak a om genna ahi. Saptuam kichi Pathian Inkuan ahi a, Amah min apan kilakhia ahi. Saptuam pen Pathian Inkuan ahihziak in, Paul leng Inkuan a pa kiang a thum ahi.2

Hiai a Paul in Pathian pen mi tengteng Pa ahihna leh mihingte Siamtupa akipan i hihdan uh taklang nuam hi. Amah apan in ahi inkuan ahihkeileh mite hong kipatkhiak uh chih ahi. Hiai ah lei leh van a inkuan chiteng hon gen hi. Van a inkuan a chih in vansawltakte, pawl tuamtuam a kikhente, genna ahi. Himahleh hiai a inkuan kichi in a gen tuppen ahihleh tatkhiak Pathian’ inkuante hizaw ahi. Pathian leh i Toupa Jesu Khrist Pa (1:17), thuchiam thak tungtawn in eite Pa leng a hong hi hi. Hiai a Inkuan dinmun piak a omte tuh gospel gingtate kia ahi (1:6).3 Pathian Inkuan in hun paisa, tulel a Amah gingtate leh hun hong tung ding a Amah gingta dingte tengteng uap chi hi. Pa kibang neite i hihziak ua Inkuan khat hi i hi uh chihna ahi.4

Tang 16-19: Hiai sung ah Paul bangziak a thum a, bang ngen a thum hiam chih i muthei hi. Paul thumna ziak ahihleh Pathian in Ephesate Kha ziak a mihing sunglam a thilhihtheihna a hihhat a a omna ding uh (t. 16) leh Khrist ginna ziak a a lungtang ua a ten theihna ding leh zungkai a omna ding (t.17-18), ban ah Amah a tangchinna luah a om ding deihna ziak ahi (t. 19).5 Tomchik a gen in Paul in Pathian hauhsakna thupi apan Saptuamte kiang ah vualzawlna thupi mahmah li piak ahihna ding a thumna ahi:-

Khatna ah, Kha thilhihtheihna a hihhat a om ding (3:16): Paul in hiai a thumna tungtawn a hatna a nget tuh khalam hatna ahi. Hiai hatna pen sunglam, huai tuh mihing lungtang, mihinna sunglam gen ahi a, Pathian’ kha tungtawn kia a hong pai, thilhihtheitak Paul mah inleng a theihpen gen ahi (Eph. 1:19; Phil 4:13).6 Hiai a thilhihtheihna ngen a Paul thumna ahihleh thillamdang hihna ding hiam, a lamdang thil lahkhiakna ding leng hilou in, Khrist in ompih ahi chih sawilin vuallouh theihtelna neihna ding hizaw hi.7

Nihna ah, Khrist toh pumkhatna ding (3:17a): Paul thumna nihna tuh Khrist (i.e. Khrist kha, Khasiangthou) a lungtang ua a ten theihna ding ahi. Khrist i lungtang a ahong ten chiang in nisim in KHRIST kibang semsem theizel ding chihna ahi.8

Paul in mihing sungnungpen Kha in a hihhat ding a lunggulh ziak ahihleh amaute lungtang a Khrist a tendet theihna ding ahi. Paul in a mawkna maimai a Pathian toh kinaihna lel gen hilou in, ngaihtuahna leh utna taktak toh kichimat a om ding genna ahi. A thumna tuh a ginna ua a khanna ding uh, huchia haksatna hangsantak a maituah ngamna ding uh ahi.9

Thumna ah, Khrist a zungkai ding in (3:17b): Mihing lungtang a Khrist a ten chiang in, huai mi tuh itna a zungkai leh lamtouh a om ahi. Singzung in khanna ding a kaikhawm bang in gingtuten leng i khanna ding a Khrist a zungkaih poimoh chih hon sinsak hi. Kha a hihhat a omna in Saptuam, Toupa misiangthoute tengteng, in Khrist leh midangte apan a itna hon chepsak ziak in huai itna lamdang a kipahpih mahmah uhi. Messia itna mihing suangtuahna in banlou himahleh Paul thumna tuh Amah toh saptuamte vualzawl a i om khawm ding uhi ahi.10

Khrist i sung a ahong ten chiang in, eite itna a zungkai leh lamtouh in i om ding uhi. Eite Itna suangphum a nei a Inn kilam toh belhkhawm bangbang i hi uhi. Paul in Ephesaten Khrist itna a zatdan, a saudan, a sandan leh a thukdan a theihchianna ding ua thum ahi.11 Mi tengteng huamtel zou ding in a itna kiningching a, tangtawn daih ding in a itna sau a, mikhial phapen sawkban ding in a itna thuk a, mikhial phapen leng van tan tunzou ding in sang hi. Kros tuh Khrist Itna chiamtehna thupipen ahi. A Kros pheilam in suah leh tum huap a, a Kros kitungtou pen in lei leh van huap kha hi. Munteng a om mi khempeuh ban ding in Khirst itna thupi om hi.12

Lina ah, Pathian tangchinnna a luah a om (3:19): Paul in Ephesaten Khrist itna thupi ahi chih kia a theihsiam ding uh deih hilou in, huai itna a theih ding uh i.e. amau hinkhua a hiai itna a phawk ding uh deih in thum hi. Khrist itna (Pathian’ itna) thupiluat ziak in theihna kheng zou hi. Himahleh hiai itna i lungtang uah i phawkthei chiat uhi. Huchi a i theihtheih chiang un, Pathian tangchinna a hihdim a om ding i hi uhi.13

Hiai a Pathian Tangchinna chitengteng bang a hihdim a om bang chihna ahia? Pathian’ Tangchinna in Vanmun khawng a khalam vualzawlna chiteng (1:3), gouluah thupi hauhsaknate (1:18), a thilhihtheihna thupina tehvuallouh (1:19), Khrist hauhsakna suikhiak vuallouh (3:8), leh a Khasiangthou pansan a i lungtang ua hon sukbuak, a itna thupi (Rom. 5:5) uapvek chihna hi. Khrist i ginna ziak ua i lungtang ua a tenleh Pathian tangchinna atung a i gen tengteng ei a hi ding chi hi.

“Pathian tangchinna chitengteng” Khrist ah a kim sipsip a suklat in om hi (Kol. 2:9, 10). Khrist toh kizopna leh a kha thilhihtheihna tungtawn in eite bukim i suak uhi. Pathian tangchinna tengteng ei ading in om a, huai tuh ginna leh thumna tungtawn a ngahtheih chih ahi. Huaiziak in bukim a i om theihna ding leh hihdim a i omna ding in Khasiangthou panpihna i nget poimoh chih hon musak hi.14 Khrist it bangbang a it kichi mihing lam apan thil hitheilou himahleh Kha ziak leh Amah tungtawn a thilhithei a suak hi. A nungchang uh khek a hong hihtheihna ding Paul thumna ahi a huchi hileh itna, pilna, zahngaihna, hehpihna leh Pathian’ lainatna a tansakna ding ua Paul thumna ahi.15

Tang 20-21: Doxology: Paul in Latom – Pathian Phatna thumna in Ephesa laikhak bawng khatna zou hi. Hiai khenpi khatna sung ah Paul in Thugin toh kisai gen a, khenpi nihna sung ah thutak kigente a taktak gam a hinkhiak dingdan gen in zou hi.16 I nget peuhmah tangtun thei ding a Pathian’ thilhihtheihna thupi ahi. Huai kia leng hilou in, i nget sang a thupizaw tham leng hihthei ahi chih mangngilh kei ni. Huai bangbang Pathian’ thilhihtheihna in ei sung ah nasem in omlel ahi (t. 20). Pathian’ itna mihing theihna khenpek a om ahih bang in Pathian’ thilhihtheihna leng i ngaihtuahna khenpek a om ahi. TAWP NEILOU ITNA; TAWP NEILOU THILHIHTHEIHNA A NEI I TOUPA UH AHI. I Pathian uh thupi lua ahi. Aman tawp neilou phatna a phu hi. Amen.

Thukhitna: Toupa gam nna ka seppih Unaute, tuni a i Bible Study ua kipan in i kivelna ding leh pan i lakthak nading om in ka thei hi. Hiai a Ephesa Saptuamte adia Paul thumna thupi mahmah tuh Itna leh Deihsakna tawpkhawk thumna ahi a, thumsak a omte hampha petmah uh chih i thei hi. Paul in Pathian’ Saptuamte a itna leh awlmohdan thupi i sa a, ettontak mah leng ahi. Himahleh i theih ding ua poimoh mahmah hiai ahi, Paul in Pathian a itna ziak leh Pathian itna a theihchet, muhchet leh a tuahkhak ahihziak ahi chih mangngilhlouh a deihhuai mahmah hi. Tuni’n i kep Pathian’ Saptuam, i Inkuante, i zi-le-tate ading a khalam a hatna ding uh leh Pathian’ thilhihtheihna a tanna ding ua thumsak i mohpuak ahi chih phawkthak chiat ni. Simtute Toupa’n hon vualzawl chiat hen aw.