Text : Ephesate 2:11-22

Thumasa: Simtute chibai. Tutung a i sinkhawm ding un Ephesate 2:11-22 sung kon telkhia hi. Hiai i tangtel sung ah Paul in Jesu Khrist, Kros a a sihna ziak leh a sisan ziak a hamphatna omte sutkawm leng i chi hi.

Khrist sisan ziak a Pathian toh kinai thei (2:11-13):

Tang 11: Paul in a laikhakna mite piandan a Jentel (2:11) ahihdan uh hon taklang masa hi. Pathian in Judate kiang ah pasal naupiang peuhmah ni 8 a zek sumsak ding chih thupiak Abraham tungtawn in pia hi (Gen. 17:9-14). Hiai zeksum pen Pathian namtel Judate adia polam chiamtehna ahi. Paul hun in amaute zeksumte chi a theih ahi ua, amau bangbang a zek sumlouh Jentelte zek sumlouhte chi uhi. Sahkhomi Judaten Jentelte ngeinadan a sianglou in koih uhi. Huchi ahihziak in Jentelte sang in siangzaw leh hoihzaw in kingai uhi. Hiai a Paul in a taklatnop ahihleh Judate leh Jentelte Pathian mai a sianglou, Khrist siansak poimoh uh chih ahi.1

Tang 12: Hiai ah Paul in Ephesate’ hihna masa theisakthak hi. Amauten Khrist thu zakha ngeilou ua, Israel khua-le-tui (Juda nam) apan hilou ua, Pathian in Judate kiang a a thuchiam thukhun ah hamphatna leng neilou uh chih ahi. Thuchiam thupipen Pathian in Judate kiang a a bawl tuh Hondampa sawl ding chih ahi. Hiai thil thumte ziak in Judate’ mitmuh ah Ephesate (Jentelte) tuh lametna neilou leh Pathian neiloute ahi uhi. Pathian dik a theihlouh ziak un, Amah apan gamlapi a om in ngai uhi.

Pathian gingtalou leh sahkhomilou uh chi hizawlou in Judate’ biak hilou pathian dang bia uh chi ahi. Judaten Pathian khat kia om chih leh amaute sa a chiamtehna i.e. zeksum (Gen. 17:9-13) tungtawn a Pathian namtel chih kithei uhi. Zeksumlouh peuhmahte’n Israel khua-le-tui hihna tang theilou ding ua (2:12a), thuchiam thukhun lak ah midang ahihziak un Israelte lamette adiak in chiam a om Messia toh kisai ah tan neilou ding chih genna ahi.2

Tang 13: Hiai ah Paul in tuma a gamlapi a om (Juda hiloute) tu’n Jesu sisan ziak in Pathian leh a mite toh hihnai in om chi hi. Paul laikhak simten gamlapi chih thumal a zak chiang ua Pathian apan gamlapi a sal a puakmang a a omlai uh phawkthak zel uh (Isa. 57:19) chih ahi.3

Jesu Khrist, Juda mi himahleh, Judate ading kia hilou in Jentelte leng honkhe ding a hong pai hizaw hi. Jesu khovel a a hong paina ziak ahihleh mi tengteng, Juda leh Jentel khentuam omlou a tankhe ding ahi. Jesu sisan– khelh kithoihna– ziak in gingtute Amah toh hihnai in i om uh, huai tuh Pathian inkuan a pilut a om chihna ahi. Huchi ahihziak in, Juda hiin Jentel hitaleh Jesu gingta peuhmah khalam inkuan dia zop hi uhi (Gal. 3:24).

Khrist I lemna uh (2:14-18):

Khrist hong pai ma in, Juda leh Jentel khen in om uhi. Judaten Jentelte Pathian hotkhiakna thilhihtheihna in a batphaklouh hi a a ngaih ziak un lametna neiloute in ngai uhi. Khrist in mihingte’ bawl khat-le-khat kikal a kikhenna hihsia chih i mu hi. Huai kikhenna bang (wall) hihsiat ahihziak in kipumkhatna taktak i kibatpihlouhte toh leng kinei theita hi. Hiai tuh kilemkikna diktak ahi. Khrist sihna ziak in eite tengteng khat i hi uhi (2:14). I kimelmakna uh beisak in a omta (2:16), Khasiangthou pansan in Pathian kiang i naihtheita ua (2:18), eite Pathian mai ah zin leh leng hinawnlou in (2:19), eite Khrist a kilam suang poimohpen a zang a kilam Pathian’ temple siangthou i suak uhi.

Tang 14: Khrist lemna kumpipa (Isa. 9:6) i lemna uh ahi.4 Khrist in Juda leh Jentel kikal a kimelmakna banglai a hihchipna tungtawn in kilemna tun hi. Pathian leh mihing kikal mai hilou in mi khat leh mi khat kikal ah leng lemna hon tun hi. Hiai tang ah Paul in Judate leh Jentelte kikal a kimelmakna kia ngaihtuah ahi. Judaten Jentelte sang a thupizaw in kikoih ua, Jentelte sianglou a koih in amaute kithuahpih utlou uhi.

Tang 15: Judaten thupiakte leh zuih ding Dan a kigelh, tampi zui uhi. Amauten Dan zuih tungtawn a hotdamna ngah thei ding in gingta uhi. Judate Dan nih in khentheih hi: khatna, Gamtat-Khoheina Dan (Moral Law) — hiai in Thupiak Sawm toh kisai deuh hi (Exod. 20:1-17), nihna, Kithoihna Dan (Ceremonial Law), hiai in nek-le-dawn leh kithoihna toh kisai a zuih ding uap deuh hi. Hiai Kithoihna Dan pansan a Jentelte sianglou a ngaih ahi ua, huchih ziak in Temple hihnit khak ding venna in a sungnung lut phal hilou uhi. Hiai ziaktak in Judate Dan kimelmakna piangsaktu a hong suak hi (t. 14).

Hiai a Jesu’n Juda leh Jentel kikhensaktu thusehte leh Dan thupiakte ahi a hihmang (2:15). Hiai tang in a hon sinsak noppen ahihleh Dan in kua teng Pathian Inkuan adia chin chih tehna dia zatlouh ding chih ahi. Pathian’ Dante zattheihnawnlouh chih gen hilou ahi chih chiamteh ding ahi. Hiai Dan thupiakten Judate gak ahihman in Jentelte toh kal ah kilemlouhna tun hi. Aziak kuamah huai baang ki- umsung a lut a phallouh ziak in. Judaten Messia in amaute deihsak tuam dia lamen in kimelmakna banglai puahpha ding leh behlap ding a saklai un, Aman hihsia in kilemna tun hi.5

Khrist in Kithoihna Dan a hihbei toh kiton in hon kikhensaktu a hihseta hi.6 Khrist in hon sinsak ahihleh mihing hotdam a i omna ziak tuh dan zuihna ah hilou in Amah ginna ah ahi zaw chih ahi (Gal. 2:15-167). Huchi ahihziak in, Kithoihna Dan ahih bei ziak leh Juda leh Jentelte khentu a hihsiat toh kiton in Khrist in Amah ah thil nih apan mi thak khat a bawlkhia hi. Hiai omdantak tuh Khrist in thil nih (Juda leh Jentel) apan mi thak khat (Gingtute) a siam hi. Khrist gingtate tengteng-Juda hiin Jentel hi taleh — tu’n i vek un Amah ah khat i hi uhi (Gal. 3:28). Khrist lutang a nei, pumpi khat a kahiangte i hi vek uhi (1 Kor. 12:13;27; Eph. 5:23).7

Tang 16: Khrist in Juda leh Jentelte kikal kia a lemna bawl hilou in, amaute toh Pathian kikal a lemna a tun hi (Rom. 1:18-20; 56:1). Khrist, Kros a a sihna tungtawn in gingtute Pathian’ Inkuan i.e. saptuam ah pilut in om uhi. Pathian in a deihpen ahihleh daltu, kihuatna tunthei kikhenna banglai amaute lak ah a om deihlou hi.

Tang 17-18: Pathian apan gamlapi a om (Jentelte) leh naichik a om (Judate) ten a kibang in Pathian’ kiang naihtheita ua, Amah kiang baihlamtak a luttheihna nei uhi. Tang 18 ah Paul in Pathian om ahi chih chetna thum taklang hi. Amah (Khrist) ziak in Kha (Khasiangthou) kibang a Pa (Pathian) kiang luttheihna i nei tuaktuak uhi.

Khrist a Ning a Suang Poimohpen (2:19-22):

Tang 19: Paul in Ephesa khua a Jentelte kiang a a gennop ahihleh amaute tua Pathian’ mite toh khua-le-tui leh Pathian’ Inkuante hita uh chih ahi. Eileng Paul in a gen bang in mikhual leh gamdangmi i hi ua, Khrist i thei kei uhi. Himahleh tu’n ginna tungtawn in Pathian’ inkuante leh a lalgam mite i hita uhi.

Tang 20: Paul in Pathian’ Inkuan (Saptuam) toh kisai poimoh mahmah a gen hi. Saptuam kibulphuhna tuh a suangphum phumtu Jawlneite leh Sawltakte ahihdan taklang hi. Gendan dang ah, Saptuam kilam pen Thukhun Lui leh Thak ah kinga chihna ahi. Mawlchik a gen in, Saptuam kibulphuhna tuh Pathian thutak ahi. Huai thutak pen Sawltakte leh Jawlneiten eite adia a na gelh uh ahi. Huchi bang suangkil pen omlou hileh inlam diklou, hoihlou detlou in kichim ding ahi. Hiai in Jesu hihna leh dinmun chiangtak in gen hi.8

Tang 21: Jerusalem a Judate Temple om nawnlou chih lel hilou in, muh ding leng a om nawn kei hi. Tu’n Saptuam pen Pathian Temple Siangthou ahi. Hiai Temple Khrist toh kizom ahi a, Aman a lenkhawm hi. Khrist pen a kil a suang poimohpen kia hilou in Amah, Saptuam lutang ahi.

Tang 22: Ei gingtute tuh suang, Pathian in a Temple a bawlna dia a zat bangbang i hi uh. Eite building khat, Saptuam khat hi ding a lamkhawm a om i hi uh. Pathian’ Khasiangthou huai Temple a teng, eite a suangte i hi uhi (1 Kor. 3:16; 1 Pet. 2:5). Pathian in a tentheihna (dwell) ding in a temple (Saptuamte) a lam hi.

Thukhitna: Ephesate bang in eileng Pathian apan gamlapi a om i hi uhi. Pathian itna leh hehpihna ziak in Jesu sihna tungtawn in Amah naihtheihna a sisan ziak in hamphatna i nei uhi. Pathian namtel Judate toh hamphatna kibang tang ding in mi thak khat hi ding in a Saptuam ah hon gawm hi. Pathian mah in Amah tenna mite hi ding a hon bawl thupi in lamdang lua hi. Amen.

1 Bruce B. Barton. “Ephesians.” NKJV: Life Application Study Bible. Carol Stream, Illinois: Tyndale House Publishers, 2006. 2160-61

2 Idicheria Ninan. "Ephesians." South Asia Bible Commentary. Ed. Brian Wintle et. al. Udaipur Rajasthan: Open Door Publications, 2015. 1638

3 Idicheria Ninan. "Ephesians." South Asia Bible Commentary. 1638

4 Thomas Hale and Thorson Stephen. The Applied New Testament Commentary. UK: Kingsway Publications, 1996. 767-68

5 Idicheria Ninan. "Ephesians." South Asia Bible Commentary. 1639

6 Jerusalem temple ah Jentelte Temple huang sungnungzaw a luttheihlouhna ding ua daltu bang (wall) a om hi. Tang 15 ah Paul in hiai bang Judate leh Jentelte kigaletna/huatna chiamtehna ahih kia hilou in, Pathian apan gamlapi a om, Amah kiang a hong pai nai theilou uh ahihziak ahi chi hi.

7 Thomas Hale and Thorson Stephen. The Applied New Testament Commentary. 768

8 Thomas Hale and Thorson Stephen. The Applied New Testament Commentary. 769