Text: Ephesate 1:15 – 2:10

Thumasa: Simtute chibai. Khrist a Khalam vualzawlnate leh Khasiangthou a chiamteh a om i hihdan uh i sutkhawm uhi. Tukha in Sawltak Paul in Ephesate a thumsakna ziak leh Pathian’ thilhihtheihna mikhialte a hotdamna ah kimuhdan sutkhawm leng i chi ahi.

PAUL THUMNA (1:15-23):

Tang 15-16: Paul in Ephesa a gingtute apan a muh thilnih hon tak lasng hi. Huai tuh gingtute hinkhua a alou theilou a om ding ginna leh itna a om chih hon gen hi. Hiai in tanchinhoih zakna tungtawn a gah muh ngeingei ding om chih hon sinsak ahi (1 Thes. 1:15). Paul mah inleng saptuamte adia phatuamngaitak a tawplou a thumsak zel ahi.

Tang 17: Bang deihna ziak leh bangtup nei a Paul thum hiam? Hiai ah Paul in Ephesate pilna leh kilakna kha piak a om ding deihna ziak ahi chih i mu hi. Paul thumna thupi tuh Ephesaten Khrist a theihsemna ding uh ahi. Hiai bangdang ziak hilou in Amah a theihchet semsem uh leh Khrist bang semsem ding ahihziak uh ahi. Pilna leh kilakna kha mihing a kipan hilou a Pathian apat ahi chih a theihchet ziak ahi.1

Tang 18-19: Bangziak a Pilna leh Kilakna Kha ngetsak hiam? Paul in Pilna tungtawn a saptuamte theih ding thum: Pathian honsapna lametna (t. 18), a gouluah hauhsaknate (t. 18), leh a thilhihtheihna thupina tehvuallouh (t. 19) hon gen hi. A honsapna lametna i chih khelhna apan zalen ding, Pathian tate hi ding, siangthou leh amah a omdet ding gen ahi. Pathian in gouluah ding a Khasiangthou a khamna hon bawlkhinta chih i thei hi (t. 14). I gouluah ding a omlai teng in van ah honna ngak ahi. Vangam gouluah ding omlaite lak a thupipen leh lamdangpen tuh Pathian leh Khrist toh tangtawn a omkhawm ding chih ahi. Huai kia hilou in Khrist batna nei ding (1 Jn 3:2) leh Amah toh vaihawmkhawm ding (2 Tim. 2:12) i hi uhi. Khristian hinkhua, sap a i omna ah a kipan a, goulouh hauhsaknate i ngahna tuh i Khristian hinkhua tawpna ahi. Hiai nihte kikal ah tehvuallouh Pathian’ thilhihtheihna leh a hatna thupitak ziak in kep in i om uhi.2

Tang 20-21: Pathian hatna leh thilhihtheihna thupidan kilatna – Jesu Khrist sihna apan kaihthoh a omna ah leh, lei leh van a thuneihna tengteng toh vaihawmtu ahihna ah kimu hi. Sihna apan kaihthoh a om, Khrist, Saptuam lungtang leh khovel a thuneihna tengteng neitu ahi hi. Hiai in Setan leh khate tengteng tung leh, tuhun leh hun hongtung ding a vaihawmpa ahihna in Pathian thilhihtheihna taklang hi. Mihing khat in misisa a kaithou thei diam? Kaithou theilou, himahleh Pathian in kaithou thei ahi, Amah adia thilhitheilou omlou ahihziak ahi (Mk. 10:27). Huai Khrist kaithou thei thilhihtheihna ei ading in leng a om hi. Huai thilhihtheihna tungtawn mah in, i tatleknate uh ziak a si i hihlai ua, Khrist a hon hih hing (2:4-5) a, vanmunte a a kiang a hon tusak ahi (2:6).3

Tang 22-23: Khrist in thil tengteng a khenuai a koih ahi. Zawngkhalna, launa leh lunghihmohna in hon tuamkhin bang a i theih chiang in, i phawk ding tuh Khrist in a khenuai a thil tengteng koih ahi chih ahi. Hiai a Paul in a gen Khrist tuh Saptuamte tung a lutang ahihna a genna ahi. Paul in Khrist saptuam lutang chiin sam lel hi. Khrist lutang ahihleh saptuam tuh a pumpi chihna ahi. Saptuam pen Khrist pumpi ahihleh, ei gingtute tuh Amah pumpi hiangte chihna ahi (Rom. 12:4-5; 1 Kor. 12:12, 27). Saptuam tuh Khrist tangchinna ahi. Chingsaktu pen saptuamte hilou in Khrist ahi (t. 23). “Bangkim” in a a gen ahihleh Khrist in saptuamte thilpiak leh vualzawlna a vuk genna ahi. Khrist in a hihbang in Saptuam tuh Khrist hihna tengteng lahkhiakna ahih ding ahi.4

2:1-10: Hotdamna a APathian Thilhihtheihna: Pathian thilhihtheihna Jesu thohnawnna leh tawisanna ah kilang hi. Huai kia hilou in saptuam kipatna apan leh khovel uap a a nasep ah leng kimuthei hi. A kilatna dang khat ahihleh a gingta a a ummite hotdamna ah kimu hi.

2:1-10: Pathian’ Thilhihtheihna: Sihna apan Hinna

Tang 1: Paul in Ephesate kiang ah a khelhna uh leh tatlekna ua sisa chih theihsakthak hi. Hiai a sihna in Khalam sihna, Pathian apan khenkhiak ihihdan uh gen ahi.. I khelhnaten Pathian toh hon kikhensak ziak in mikhial toh a siangthou Pathian kithuahkhawm chih thil hitheilou a hongsuak hi. Piandan a mikhial ihihziak a Pathian apan khenkhiak i.e. khalam a si chihna ahi.

Tang 2: Khrist a gintak ma un, Ephesate tuh gilou leh dinmun setak ah om uhi, ahihna uh leng gilou ahi uh. Amauten khovel dan zui in, amau hoihsak leh deihdan zui in, a thupina ding un nungta uhi. Pathian in miten Amah hoihsak bang a khosa ding a chihlai in, Khovel mi in amah nopsak nading kia in khosa hi. Huaiziak in Pathian thumanglou, Pathian melma i suak uhi. “Huihkhua a thuneihna lal” kichi Paul in Setan a genna ahi. Jesu’n Setan, Khovel Lal chiin sam hi, aziak tuh Setan in hiai khovel dan zui a nungtate hinkhua thunun a, Pathian a nial ziak un Setan in a tung uah thuneihna nei hi.

Tang 3: Paul in “Eite” leng Khrist i gintak ma un, khelhna ah i om uh a chih in Judate leng uap a chihna ahi. Huchi ahih ziak in Judaten leng Pathian’ thangpaihna leh gawtna thuak tak mah i hi chi hi. Pathian siangthou ahia, sianthoulouhna ngaizam theilou ahi. Huchi ahihziakin gitlouhna leh khelhna a kibualte hihsiat ding tum tinten ahi. Hiai apan a i theih tuh khovel mi, Khrist sangnuamloute, dinmun tuh mulkimhuai leh lauhuai lua ahi chih ahi. Khrist sangloute tengteng khalam a si, pumpi si hikei mahleh Pathian apan khenkhiak ahihziak un, khalam a si hi uhi. Tangtawn hinna van ah ngahlou ding uh, aziak tuh hinna neihna ding a thutak thu, gospel zakna (1:13), zak khit a gintak na poimoh ahi. Jesu, Kross a khelh ngaihdamna dia sipa, a ginna ngalouten Pathian lungkimsak theilou ahi (Jn 3:18, 36; 14:6; Nas. 4:12).5

Tang 4-5: Mihingte piandan ah gilou leh sia chih i theita ua, khalam a damlou ahihdan leh khalam a si chih i theita uhi. A sisa panpihthei mi khat kia a om, Pathian ahi. A itna thupitak ziak in a hehpihna leh zahngaihna mikhialte ading a sunbuak ding kiman mahmah hi. A tapa hilhial honsawlna (Jn 3:16) ah sahkhua dangte Pathian toh eite Pathian kibanglou chih i muthei hi.

Tang 6: Pathian in leitung kia a hing ding a hon omsak hilou, Khrist toh van a om ding in hamphatna hongpia hi. Paul in muanmohna om hetlou in gingtuten van ah mun nei i hihdan genchiang ut in thiltungsa bang in hon gen hi. Aman Pathian in van mun khawng ah Khrist toh hon tusak chiin a tukhin bang in hon gen hi. Hamphathuai lua ahi chih phawkthak ni.

Tang 7: Bangziak a Pathian in Khrist toh hon kaithou a Khrist kiang a van a hon tusak hiam? Gen dan dang ah bangziak a Pathian in hon honkhia ahia? Aziak tuh hun hongtung ding a khang hong om dingte kiang a a iitna thupi-a hehpihna hausakna – lakkhiakna ding ahi.

Tang 8: Hiai tang Laisiangthou a poimoh mahmahte lak a khat ahi a, thumal poimoh mahmah nih: Hehpihna leh Ginna i mu hi. Mawlchik a gen in, Hehpihna i chih Pathian in a thawn a Jesu Khrist a honpiak hotdamna ahi a, Ginna i chih huai thilpiak san ngamna ahi. Hiai a ginna tuh thilhih (doing) hilou in sanna (receiving) hizaw ahi.6 Ginna i chih leng Pathian in a thuzakna tungtawn a honpiak ahi (Rom. 10:17). Hiai apan i theihkhiak tuh Hotdamna pen Pathian honpiak liuliau ahi a, lohkhiak zoh ding hilou ahi.

Tang 9: Paul in Hotdamna kichi nasep hiam, ei panlakna ziak hiam a lohkhiak zoh vual hilou chih hon genthak nawn hi. Min ka nasep ziak a vangam lut chi theilou ding chihna ahi. Jesu Khrist ginna tungtawn kia a hotdamna ngahthei hi lel, Khrist kia hon hondamtu ahih ziak in... I khelh thaman pia a, a sihna ziak a hotkhiak i hi uhi (Isa. 53:6).. I sih sik a hong si, nang leh kei sihna mun ding aman hong luahsak ziak hizaw ahi. Jesu Khrist gintakna tungtawn in khelh ngaihdamna i ngah un, Pathian mai ah siamtang i hong hithei uhi (Rom. 3:22-24; 8:1). Jesu tungtawn a sawpsiang leh sianthousak i hihzoh chiang a Pathian in a ta ding a hon pomthei pan chihna ahi.

Tang 10: Hiai ah Pathian in hon hotkhiakna ziak nihna na hoih sem ding chih i mu hi. Pathian in Khristian tengteng adia ana gelkholh tuh na hoih sep ding ahi. Chiamteh dia poimoh mahmah ahihleh i na hoih sep ziak a hotdam hilou in, hotdam i hihziak a na hoih sem ding i hi uhi. Huaiziak in Hehpihna ziak a hotdam ka hi a, huaiziak in na hoih sep ngailou chi theilou i hi.7 Khrist ah hinna thak i nei masa a, huai hinna thak hinkhiak pih a ngai nawn hi (2 Kor. 5:17; Eph. 4:1). Pathian gel leh hon lametna ahi.

Thukhitna: Tutung i Bible study apan kivelna ding leh i phawkthak dingte: Khatna ah Paul in Ephesa gingtute lak ah Pathian ginna leh mihinpihte itna mu hi. Hiai Pandemic lak ah Covid Positive hilel i inveng, Biak Inn i kaipih, leh i khopihten Paul muh bangbang eite apan a mu ding uam? Paul in saptuamte adia tawplou a thumsak bang in i mihinpihte ading a i hihtheihtawp suah a i thumpih ding i mohpuak uh ahi chih phawkthak ni. Nihna ah, Pathian hehpihna ziak lel a hotdam i hih ziak in kisathei ding omlou i hi. i neih-le-lam, sum-le-pai, pilna-le-siamna Toupa leh a gam adia zat ding i bat ahi chih phawkthak ni.

1 Idicheria Ninan. "Ephesians." South Asia Bible Commentary. Ed. Brian Wintle et. al. Udaipur Rajasthan: Open Door Publications, 2015. 1637

2 Bruce B. Barton. “Ephesians.” NKJV: Life Application Study Bible. Carol Stream, Illinois: Tyndale House Publishers, 2006. 2158

3 Thomas Hale and Thorson Stephen. The Applied New Testament Commentary. UK: Kingsway Publications, 1996. 765

4 Bruce B. Barton. “Ephesians.” 2158

5 Thomas Hale and Thorson Stephen. The Applied New Testament Commentary. 765

6 Thomas Hale and Thorson Stephen. The Applied New Testament Commentary. 766

7 Idicheria Ninan. "Ephesians." 1637