Text : Ephesate 1:3-14

Thupi : Khalam Vualzawlnate

1. Thumasa: Simtute Chibai. I tangtel sung ah Khrist ziak a i tan Khalam vualzawlna chi nga (5) i mu hi. Huaite, (i) Pathian in hon telna leh ta a hon sehkholhna (t. 4, 5). (ii) Pathian in a thawn in hehpihna eite honpia a (t. 6), huai pansan a tatkhiakna leh khelhna apan ngaihdamna i ngah uhi (t. 7). (iii) Pathian in a thuguk (Pilna leh theihsiamna) a eite hon theihsak (t. 9), (iv) Gospel-thutak thu hon zaksak (t. 13), leh (v) Khasiangthou a chiamteh, huai tuh gouluahtu ding chih chetna dia khamna ahi (t. 14). Hiaite vanmunte ah khalam vualzawlna Khrist ginna tungtawn a i ngahte saulou in sutkhawm leng i chi hi.

2. PATHIAN APAN VUALZAWLNA (T. 3-6):

Tang 3: Khalam Vualzawlnate Kipatna: Pathian in gingtute Khrist tungtawn in khalam vualzawlna bukim hon pia hi. Pathian in “hon vualzawl ding” chilou in “hon vualzawl khinta” ahihdan Paul in taklang hi.1 “Vanmunte” chih in a gennop tuh hiai vualzawlna kigente tomchik ading hilou in, tangtawn ading chihna ahi. Aziak tuh hiai vualzawlnate khovel a Diana pathiannu, thuneihna mun akipan hilou in Khrist thuneihna a hong kipan ahih ziak ahi (1:20; 2:6; 3:10).2 “Khrist ah” hon vualzawl khinta chih ahihman in Khrist a omte’ tan ding, Amah a omlouten tanglou ding chihna ahi. Gendan dang ah, Jesu lal leh hondampa a sangkhin a, Amah ginna tungtawn a pumkhat suak a, Amah thuneihna nuaia kitulut chihna ahi. Pathian in khalam vualzawlna honpe khinta mahleh, eiten huai i neihna ding a ginna a i san poimoh chih hon sinsak hi.

Tang 4-6: Pathian’ Telna leh Deihna, Kipahna: Pathian in khovel leitung pian ma in “Aman a deih leh tup bangbang in” honna telkhinta hi. Pathian’ tangtawn thiltup ah Khrist gingtate tel a omna chihna ahi. Pathian in a tate hi ding in honna sepkhol a, huai tuh tel a om chih genna ahi.3 Paul gennop ahihleh hotdamna Pathian thuneihna a kinga chih gen uang ut ahi. Aziak tuh eiten phulou himahle hang Pathian in a hehpihna ziak a Amah deih ziak leh tup ahih ziak hizaw chih i thei uhi. Pathian in a khovel omma a hontel ziak in, Amah i telkik theilel uhi (Jn. 15:16). Jesu kithoihna tungtawn in Amah inkuan sung ah hon pilut a, Jesu toh gouluah ding in hon bawl hi (Rom. 8:17). Romete dan ah, min ta a lak leh hamphatna leh dikna, amaute apan a piang tate bang in, nei uhi. Paul in hiai thumal a hon zatna in Pathian toh i kizopna uh a kipdan taklang hi.4

Pathian in a ta ding a hontel in hon “sepkhol khinta” hi. Khrist a om gingtute Pathian tate i hi ua, Amah inkuante i hi uhi (Joh. 1:2; Gal. 3:26; 4:5). Ta i hih ziak in ngaihdamna, hotdamna, van a gouluahtu hihna, leh vualzawlna tampi leng i tang ua, “siangthou leh dembei” om ding mohpuakna thupi mamah i nei uhi (t. 4). Tomchik a gen in, hotkhiakna tuh eimah sepkhiak hilou in Pathian’ nasep ahi.

Hiai ah “sepkhol” chih thumal gendan tuamtuam om hi. Khenkhatten Pathian in a TA/HOTDAM ding mi teltuam nei ahi chih ngaihdan nei uhi. Hiai bang ngaihdan in Laisiangthou hon sinsak, Khelh Kipawkna, Kisikna, Ngaihdamna, leh Ginna chihte kalhkha ahihman in i pomthei kei uhi (Sam 51:5; Rom. 3:9ff; Is. 55:7; Lk. 13:3-5; Is. 44:22; Rom. 5:1ff; Jn. 3:16). Paul in 1 Tim. 2:4 ah Pathian in “…mi tengteng hotdam a om ding…deih hi” chih i mu a Pathian in khentuam leh teltuam neilou ahihdan i theichian sem hi. I theih dia poimoh mahmah tuh min Khrist a gintak leh Pathian’ tel chihna ahi (Rom. 9:14-21).

“Hehpihna thupi” – Paul in Pathian’ hehpihna lamdangtak ziak a Amah ta dia hon bawl a ngaihtuah chiang in a lungtang phatna toh kidim a om ahihdan hon gen hi. Pathian’ hontelna leh a ta dia hon sehkholhna ziak tuh Pathian’ deihsakna thupitak ziak a pahtawina i hihna ding ahihdan i mu hi (t. 6).

3. JESU APAN VUALZAWLNA (T. 7-12):

Tang 7-8: Jesu Sisan ziak a Tatkhiak…Hehpihna ziak a Tatleknate Ngaihdamna: Kum Zabi khatna hunlai in Jesu sihna genna dia paukam kizang “Jesu sisan” ahi. Khristian masate lak ah Sisan chih a kigen leh hilhchet ngaiselou in Jesu Sihna gen chih theisiam vek uhi. A sihna in thudik poimoh mahmah nih a taklat tuh—Tatkhiakna (Redemption) leh Ngaihdamna (Forgiveness) ahi.5 “Amah ah, Khrist ah, It a ompa ah” chih tamveipi zang hi (t. 2-4, 6-8, 10, 11, 13). Khalam vualzawlnate leh thilhihtheihnate teng Khrist ah om vek ahihman in, i hinkhua uh Khrist sung a om ding’ Paul in hon sinsak hi. Pathian in Jesu leitung a a hon sawlna bulpipen tuh Tatkhiak leh Hotdam i hong hihtheihna ding ahi. Leitung bawlkhiakna nasep sang in tatkhiakna nasep thupizaw hi. Pathian in leitung a siamchil in hong paukhia a, mite tatkhiakna ding in Pathian tapa neihsun kithoihna ding a a hong sih a ngai hi. Hiai in tatkhiakna nasep a thupidan hon musak hi. Tatkhiakna: i chih chiang in sikha khat in zalenna a ngahna ding a aman a piak genna ahi (Lev. 25:47-54).6 Huai mah bang in Jesu sihna ziak in khelhna sal apan suahtakna ding aman piakkhit hita hi. Thukhun Lui hun ah Gan sisan (a kithoihna) suahna tungtawn in ngaihdamna ngah theih hi (Lev. 17:11).7 Huchi mah bang in Jesu sisan suahna-dembei leh a tawpna kithoihna sihna, tungtawn in ngaihdam in i om uhi (Rom. 5:9; Eph. 2:13; Kol. 1:20; Heb. 9:22; 1 pet. 1:19). Tatkhiakna chih i chetna tuh Khelhnate ngaihdamna ah ahi.

“Hehpihna” i chih Pathian in a hotkhiakte kiang a a itna ziak a deihsakna ziak a i phulouh a thawn a hon piak genna ahi. Hotdamna pen Pathian’ zahngaihna leh itna apan ahihziak in Sahkhua pansan a pilna hiam, mihing hoihna hiam in a lohkhiak zohlouh ahi. Pathian hehpihna lou a kuamah kihondam theilou i hihziak a Pathian in hon piak ahi.8 Pathian’ hehpihna tungtawn a ngaihdamna ngahna uhi tui tawmchik a taakkhia bangphet in hong pia hilou in, chil hetlou in a hehpihna hauhsakna bangzaw in honpia hi (t. 8).

Tang 9-10: Khrist sinsakte tungtawn in Pathian in “a deihlam thuguk” eite lak a hon theisak hi. Pathian in a deihlam a thilgelte selgu hilou himahleh, sihna apan Khrist a thohnawnma khovel adia a thilgelte a vek a theihchet hilou ding chih i thei hi. Pathian’ tup ahihleh leitung leh van a omte tengteng (Juda leh Jentel) Khrist thuneihna leh lalna nuai a gawmkhawm vek ding chih ahi (1:10; Phil. 2:9-11; Col. 1:15-20). Mi tampiten Pathian plan theisiam kei mahle uh a hunbi hongkim chiang in theisiam ding uhi (Gal. 3:3). Paul suangkulh a khum a om himahleh a mengmuh thupi ahihna kilatna tuh khovel omma apan a tawpdawng a muhbat ahi. Paul salam mit in suangkulh sung kia mu himahleh, a khalam mit in Pathian’ deihlam leh tup muban veve hi. Khalam mit in Pathian’ deihlam thuguk muh theih ahi chih hon sinsak hi. “Thuguk”- Pathian in hotdam i hihtheihna ding leh, Amah ta hi ding a siangthou leh dembei a hon pomna theihna ding a Jesu Khrist khovel a hong piak genna ahi. Mikhial leh hatlouten hichi bang vualzawlna thupi i tankhak thillamdang hi mahmah ahi.9

Tang 11-12: Judate telmasak leh Khrist lamen masate: Hiai tang 2 sung ah Paul in Judate tungtang hon gen hi. Paul in tang 11 ah Judate leng Pathian deihlam leh tup bang in Khrist tungtawn a gouluah ding a sehkholh ahihdan uh hon gen hi.10 Judate leng Khrist thupina pahtawina ding a hing ding a tel chih ahi (t.12). Khrist hunma apan Jawlneite genkholh bang in Judaten Hondamtu ding hongpai ding lamentak in ana ngakta uh hi. Huai ziaktak in Paul in Judate ahi Khrist a lametna nei masa ana chih. Pathian in hun sawtpi apan a tup khovel a hotdamna puak ding chih ahi.

4. KHASIANGTHOU APAN VUALZAWLNA (T. 13-14):

Tang 13-14: Judate bang a Khrist a Jentelte simtel leh chiamteh i hi: Paul in Judate tungtang a genkhitin, Ephesa a gingtute kiang ah nou leng Khrist ah simtel na hi uh chi hi. Khrist ginna tungtawn a hotdamna sang ding a hamphatna-Thutak Thu-piak a om ahih uh Paul in theisak hi. Ephesa a gingtute Khrist a chiamteh ahi ua, huai chiamtehna tuh Khasiangthou chiamsa ahihziak ahi (v. 13).

“Khasiangthou” hiai a Khasiangthou kigen pen Pathian leh Khrist kha genna ahi. Hiai a Pathian Kha bang a kilatna pansan in ahi Pathian in mite lungtang a lut leh hinkhua khektu ahih. Hiai kha tungtawn in ahi vangam i cheplawk theih uh, kha tuh denchiang a a bukim a van i tunchiang ua i tan ding uh khamna ahi. Hiai leitung ah a bukim i ngah kei ua, tunung a a vek a mu ding i hi uh chih theihtheihna honpia hi. Huai khamna tuh – Khasiangthou – i tan uh ahihziak in ginglel hetlou a a bukim a mu ding chih i thei hi (Rom. 8:16-17; 2 Kor. 1:22).

Hiai ah Paul in “gouluah” ding a gen in hon theihsakthak tuh vualzawlna i tansa leh van a i muh lai dingten Pathian’ thupina a latsakna ding uh chih ahi. Paul in Pathian thupina ding (t. 6, 12, 14), Pathian deihlam leh tup, a lunggel bangbang (t. 5, 9, 11) thumvei mahmah zang a a taklat ut ahihleh bangkim Amah deihlam leh hoihsak kipatna leh thil tengteng tawpna tuh Pathian thupina ahi.11 Hiaite tungtawn in i hinsan i muthei hi.

5. Thukhitna: Pathian in Khrist tungtawn in khalam vualzawlnate hon vuk hamphatna thupitak ahi (t. 3-6). Aman khovel siam ma in hontel a, Jesu tungtawn in hon tankhia a (t. 7-12), Khasiangthou a hon chiamteh (t. 13-14) i hihman in lungmuanhuai hi. Hiai bang deihsakna, itna leh vualzawlna ngaihsaklou hiam neilou a omkhak ding pilvanhuai hi. Khasiangthou a chiamteh na hita hia? Kingaihsun in.

1 Thomas Hale and Thorson Stephen. The Applied New Testament Commentary. UK: Kingsway Publications, 1996. 761-64
2 Bruce B. Barton. “Ephesians.” NKJV: Life Application Study Bible. Carol Stream, Illinois: Tyndale House Publishers, 2006. 2157
3 Idicheria Ninan. "Ephesians." South Asia Bible Commentary. Ed. Brian Wintle et. al. Udaipur Rajasthan: Open Door Publications, 2015. 1633-35
4 Bruce, Ephesians 2157.
5 Bruce, Ephesians 2157.
6 Idicheria, Ephesians 1635.
7 Bruce, Ephesians 2157.
8 Bruce, Ephesians 2157.
9 Thomas and Thorson, The Applied New Testament Commentary 763.
10 Idicheria Ninan. "Ephesians." 1635 11Thomas and Thorson, The Applied New Testament Commentary 763-64.
11 Thomas and Thorson, The Applied New Testament Commentary 763-64.