Text : Ephesate 1:1-2

Thumapi: Simtute, kha thak damtak a hon musak i Toupa Jesu Khrist min in chibai. Ephesate kiang a Paul laikhak putlakna khalui in i sinkhawm khinta uhi. Tu kha in Ephesate kiang a laikhak pumpi tomchik a laktom (Summary) leh Sawltak Paul in Saptuamte Chibaibukna (1:1-2) sutkhawm nawn leng chi in kong kisa hi.

Sawltak Paul Rome suangkulh a om, Saptuamten mi sawl in veh zel uhi.1 Paul vehtute lak ah Ephesa saptuam apan Taikika leng telkha hi. Paul in Ephesa khua a gingtute a ding laikhak a gelh Taikika posak ngal hi. Hiai laikhak Paul in saptuam sung a sinsakna diklou hiam, buaina omte hiam apan kivenna ding a a gelh hilou ahi. Paul in Ephesa saptuamte ginna a hatsemsem na ding uh ngimna a amaute hanthawnna dia a gelh hizaw ahi. Hiai laikhak sung ah Paul in Saptuam, Khrist Pumpi, omzia leh latdan a taklat ban ah, gingtute leitung a a nungta Khrist pumpi kilatna hi ding a chouna ahi (he challenges believers to function as the living body of Christ on earth).

Ephesa Laikhak Laktom: Ephesa laikhak a lompi in nih in khentheih hi: (1) Khrist a kipumkhatna (1:1-3:21) leh (2) Khrist pumpi tungtawn a kipumkhatna (4:1-6:24). Paul in chibaibukna (1:1,2) a neih khit in, Saptuam omzia—gingtute tuh Khrist ziak in Pathian chitna a vualzawl a om chih thudik thupi mahmah— Paul in namkip in (1:3-8), thupina hi ding a tel (1:9-12), Khasiangthou a chiamteh (1:13,14), Khasiangthou thilhihtheihna a thop leh sungluah a om (1:15-23), khelhna hamsiatna leh khelhna sal apan suahtaksak a om a (2:1-10), Pathian toh kichimat i hihdan gen hi (2:11-18).

Pathian Inkuan sung a omkha i hihna ah Jawlneite Apostlete, Judate, Jentelte leh Khrist ngei toh kibang in i om uhi (2:19-3:13). Toupa thilhihte phawkkawm a Paul in Ephesate Khrist toh kichimat ding a chou kawm in a daitheilou kipahna hong genkhia hi (3:14-21).

Hiai teng zoh in Paul in Khrist pumpi, Saptuam, sung a omte om dingdan hon gen hi. Gingtuten Khrist a kipiakna tungtawn a kipumkhat neih ding leh kha thilpiak zatna toh kisai hon gen hi (4:1-16). Paul in Khrist a hinna thak neite (4: 17-5:20) leh inkuante (5:21-6:9) om dingdan leh khosak dingdan hon taklang hi. Huchiin Paul in Saptuamte tuh galphual a mial thuneihna toh kidou a om gige i hihziak in i neih khalam galvante i zat ding uh ahi chi hi (6:10-17). A thukhitna leh chibai nanung buk kawm in Paul leh a lawmte tanchin toh kisai Taikika mohpuakna pia in, vualzawlna toh zou hi (6:18-24).

Paul, Pathian deihlam a Khrist Jesu sawltak in, misiangthou Ephesa khua a om Khrist Jesu a mi ginomte kiang ah: Pathian, i Pa leh Toupa Jesu Khrist a kipan hehpihna leh lemna na kiang uah om hen. Ephesate 1:1-2

HILHCHETNA: Ephesa laikhak Sawltak Paul in chibaibukna toh pan hi. Hiai dan Paul hun lai a laithon bulpatna a laikhaktu kiputlak zel chindan a a neih uh ahi.2 Laikhak gelhtu in chibaibukna, phatna, leh thumsakna in zuizel hi. Hiai laikhak ah Paul in phatna pen a laikhak dangte banglou in, a laikhakna mite phatlou in amaute vualzawltu Pathian phat zaw hi (1:3-14). Laikhakna mite adia hoihna leh damna ding kia uh deihsak himailou in thumsakna neihsak hi.

Tang 1: Paul in Sawltak thuneihna toh laikhak gelh ahihziak in sawltak in a kipulak hi.3 Sawltak tuh nna khat sem ding a “sawl a om” chihna ahi. Thukhun thak ah Pathian in a Saptuam’ Ainah phahtu ding a a nna sem ding a a sapte a genna a kizang thumal ahi. Sawltakte tuh Saptuam adia khuampi poimoh mahmah ahih kia uh hilou in, Pathian kilakna ngahtute (receivers), sinsaktute (teachers) leh gelhtute (writers) ahi uhi. A nasep uh leng Pathian tangthupha gen, sinsak leh saptuamte lamtouh ahi.

1a: “Pathian deihlama Khrist Jesu sawltak” Paul in Sawltak ahihna ziak, a pil a siam ziak leh mihing deihna ziak hiam hilou in Pathian leh Jesu Khrist ziak ahi chih gen hi (Gal 1:1, 11-17; 2:7-10).4 Paul in kiletsakna ding san neilou a, midangte sang a kikoih sangna ding leng nei tuanlou ahihdan genna ahi. Hiai a sawltak chi a hong kiputlakna ziak pipen ahihleh hiai mohpuakna sem ding a phulou himahleh Pathian’ sik-le-tang a tangthupha gen ding a thuneihna piak a om genna ahi (1 Tim. 1:13,15).

1b: “misiangthou Ephesa khua a om Khrist5 Jesu a mi ginomte,” Thukhun thak a gingtute tuh “Misiangthoute” chih a sap in om uhi. A gamtat uh leh a omdan a siangthou genna hilou in Pathian’ a ahihna uh genna ahi.6 Hiai a Paul in Misiangthou a chihte tuh, “Jesu ginna ziak a a khelhna uh ngaihdam leh sawpsiang a omte genna ahi” (Rom. 1:7; Phil. 1:1).7 Pathian lam apat et in gingtu kichite tuh aman a hihsiangthoute gen ahia, huaimah tuh Misiangthoute chih omzia ahi. Mihing lam apat et in gingtute tuh muanhuaite, huai tuh Khrist a Lal leh hondampa dia gingta or muangte chihna ahi. Hiai ginomna tuh nasep ziak hiam, thilhih ziak hiam hilou in, Khrist toh kithuahna ziak a a gah ahi zaw hi (SABC 1633). Khristian tengteng misiangthou i hi, aziak tuh Khristiante Khrist diktatna bukim ziak/pansan a khenkhiat leh sianthousak i hi hi (Rom 3:21-22; 1 Kor. 1:30; Phil. 3:9). Mi’n a ginna zang a Khrist sang ding a hong kisak chiang in, Pathian in a Hehpihna tungtawn in Khrist diktatna huai mi kiang ah a pia a, huai theihsiamna neite Amah ading in ginom zel uhi.

Limlang: Tunin Pathian tate leh nasemte chih a i om phu i kisa hia? Pathian ziak a dinmun i neihte kisaktheihpih kha hia? Hon sapna leh hon sampa i theichian taktak hia? Bang ding a hon sam ahia chih i theitel taktak na hia? Paul in Ephesa khua a gingtute misiangthou leh ginom chiin ahihna uh taklang hi. Nang miten bangchiin hon thei ua?

Tang 2a: “Pathian, i Pa leh…Toupa, Jesu Khrist,” hiai ah vualzawlna thuahnih kipatna leh thuneihna thuahnih kipatna Pathian leh Jesu Khrist a kibang hi. A kibanglou leh a kipatna a tuam chihna hilou in, kipatna kibang chih kilatna ahihban ah Toupa Jesu Khrist Pathianna taklatna hizaw hi.

2b: Pathian… Jesu Khrist apan hehpihna leh lemna a kiang a om ding. Paul thumna tuh hiai laikhakna miten Pathian hehpihna leh lemna a neihna ding uh ahi. Hiai thumalte kipatna ahihleh mipi biakkhawmna a paukam kizang apan ahi.8 Hiai Greek mite chibaibukna (Hehpihna) leh Juda mite chibaibukna (Lemna) kigawmkhawm ahi.Saptuam a gingtuten a zat tangpi uh thumal hehpihna leh lemna ahi. Hehpihna “charis” tuh Pathian in mihingte kiang a a thawn a a piak a zahngaihna leh itna ahi. Mihingten Pathian’ hehpihna i phulouh ahi a, nna hoih sep a leng lohkhiak theih hilou ahi. Pathian in a hon itna ziak a hon piak ahi.9 Hiai Pathian hehpihna ziak in, mite Pathian toh kilem phet hilou in mihinpihte toh kilem in hon omsak hi. Huai ziak in Paul in Ephesate kiang a laikhak tuh “hehpihna tungtawn a kilemna”10 laikhak a chih theih hi, hiai mah abul apat a tawptana a laigil ahihziak ahi. Hehpihna tuh min Pathian hoihna phu kei mahleh Pathian Tapa, Jesu Khrist a ginna a koih ziak a amaute lam a Pathian hoihna thupitak genna ahi. Hehpihna na tung uah om hen chi a chibai kibukna in Khrist pumpi leh inkuan sung a kibang a hon koihtu chih i phuankhiakna leh a hehpihna lamdang i dinna i pompihna leng ahi.

Lemna “Eirene” in a gennop thupipen tuh khalam hauhsakna leh bukimna, taksap om hi a theihpen kimna genna ahi. Pathian hehpihna i tan ziak a i neih, mihing ngaihtuahna leh suangtuahna phaklouh, Pathian toh kilemna leh Pathian apan lemna ahi (Phil. 4:7). Sawltak Paul in hiai laikhak sung a a thupuak tuh gingtuten Pathian leh Jesu Khrist apan vualzawlna a hon piakte kimtak a i theihsiam leh i phawk ding deihna ahi.

Limlang: Khristian khat na hihna ah Pathian hehpihna na theisiam taktak hia? A hehpihna na tan ziak in Pathian toh kal ah kilemna bukim a om taktak hia?

Thukhitna: Paul in Sawltak ahihna taklatna in Thuneihna thuahnih kipatna (Pathian leh Jesu Khrist), gingtute hihna thuahnih (misiangthou leh ginom), gingtute tan vualzawlna thuahnih (hehpihna leh lemna), leh vualzawlna thuahnih kipatna (Pathian leh Jesu Khrist) ahihdan kiteltak in taklang hi. I tangtel sung apan in Paul in Amah sampa leh a sapna ziak a theihchet bang in ei gingtuten leng Toupa’ hon sapna theihchet poimoh mahmah hi. Laikhaktun Ephesa a gingtute’ khalam dinmun kiteltaka a theih ettontham ahih bang in, eiten leng i inkuanpihte leh seppihte khalam dinmun i theihpih uh poimoh ahihdan hon musak hi. Pathian hehpihna leh lemna nei nailoute kiang a i mohpuak ahi chih leng hon sinsak hi. Toupan huai hehpihna leh lemna palai hi ding in hon vualzawl hen.

1 Bruce B. Barton. “Ephesians.” NKJV: Life Application Study Bible. Carol Stream, Illinois: Tyndale House Publishers, 2006. 2155
2 Idicheria Ninan. "Ephesians." South Asia Bible Commentary. Ed. Brian Wintle et. al. Udaipur Rajasthan: Open Door Publications, 2015. 1632
3 Idicheria Ninan. "Ephesians." South Asia Bible Commentary, 1632.
4 Thomas Hale and Thorson Stephen. The Applied New Testament Commentary. UK: Kingsway Publications, 1996. 761
5 Paul in Jesu hihna tak taklatna ding in Greek mite theihsiam ding in Messiah chih zanglou in Khrist chih zangzaw hi.
6 Idicheria Ninan. "Ephesians." South Asia Bible Commentary, 1632.
7 Thomas Hale and Thorson Stephen. The Applied New Testament Commentary, 761.
8 F. F Bruce. “The Epistle to the Colossians, to Philemon and to the Ephesians.”Ed. Ned. B. Stonehouse and Gordon D. Fee.Grand Rapids, Michigan: Wm. B. Eerdmans Publishing Co., 1984. NICNT. 251
9 Thomas Hale and Thorson Stephen. The Applied New Testament Commentary, 761.
10 Thomas Hale and Thorson Stephen. The Applied New Testament Commentary, 761.