Thumasa: Simtu it, Toupa Jesu Khrist min in Chibai kon buk hi. Heututen Kum Thak 2021 March kha a kipan Laisiangthou i sutkhawm ding un Ephesa laikhak hongtel uhi. Hiai mah tukum sung a EBC in thupi a i neih uh “Ngaihdamna” hong kilakkhiakna laibu ahi. Tukha in Ephesa laikhak toh kisai putlakna in Ephesa khua, Saptuam kipatdan, laikhak gelhtu leh kuate kiang a khak hi hiam chihte enkhawm masa leng ka chi hi. Hiaiteng ban ah, Ephesa laikhak bang hun a kigelh hiam chihleh laikhaktu in bangtup nei a laikhak khak hiam? chihte sutkhawm tou ding i hi.

1. Ephesa Khua: Thukhun Thak hun leh Rome Kumpi vaihawm sung a khopi poimoh mahmah kigente lak ah Ephesa khua simtel in omban hi. BC 1200 hunlai in Anatoli mite ana teng ua, amauten Artemis Temple ah milim pathian bia in om uhi. Hiai Temple, khovel a thillamdang 7 (Sagih) omte lak a telban, leh Etnopsuahna (Theatre) thupitak mi 24000-25000 kikal tuttheihna dia kibawlte a om ziak in Ephesa khua in nakpitak in minthanna ngah hi. Hiai khopi tuh Asia gambup sung a Rome ukna nuai adia munpi (Capital) ahi, tulai a Turkey tumlam a om hi. Ephesa khua tuh sumsinna munpi ahi a, a khokim a gam tuamtuamte apan sumsinmite’ sumsinna leh kimuhkhawmna mun ahi (Nas. 18:19). Paul missionary khualzin hun in Ephesa khopi in mun poimoh mahmah luah kha ahi.

2. Saptuam Kipatdan Tomkim: Nasepte laibu apan in, Ephesa khua a Saptuam tuh Sawltak Paul Missionary khualzin nih veina a nasepna tungtawn a hong kipankhia ahi (Nas. 18:18-28). Greece apan Syria tawn a khualzin, Priscilla leh Akuilla toh kithuah in Ephesa khua va pha hi. Paul in Synagogue a thugenna leh a nasepna tungtawn in gingtu hong om a, huchiin Saptuam hong piangkhia hi. Ephesa a gingtuten Paul tamlai ding in khou mahle uh, hundang a phaknawn a tup thu gen in Jerusalem manoh in a khualzin sunzom hi (Nas. 18:18-21). Ephesa khua ah Priscilla leh Akuillate nusia a, a nung in Apollo in amaute panpih in saptuam kem uhi (18:27, 28).

Sawltak Paul in Ephesa khopi mun poimohtak a om ahihziakin Christian Ginna kiptak phuhkhiak tup in nei hi. Ban ah, Ephesa khua chibing/nambing 230 vel in um kim vel ahihman in Paul in hiai khopi pansan a nna thupitak septheih ahi chih mukhia hi. Huchi ahih ziak in Ephesa khua ah Paul leng Missionary khualzin thum veina hun in AD 53-55 kikal khosa hi (Nas. 19:1, 10). Sumsin ding a Ephesa khua pua apan hongpaiten leng Paul thugen za ua, gingta in, Gospel amau khopi chiat ah puak uhi. Hiai khua pansan in Pathian tangthupha nakpitak in hong dalhzak hi (Nas. 19:8-10).

3. Laikhak Gelhtu: Ephesa laikhak gelhtu toh kisai in hun sawtpi apan in muanmohna om hetlou in Sawltak Paul gelh ahi chih Laisiangthou sutmiten pomchiat uhi. Hiai laikhak Sawltak Paul in Rome a suangkulh a a tanlai a, Phillipi, Kolossa leh Philemon laikhakte a gelhkhit a, Ephesa laikhak a gelh ahi chi uhi. Himahleh kum zabi 18na apan in Laisiangthou sutmi tamloute apan Paul gelh hilou ding ahi chih ngaihdan hong piangkhia hi. Khenkhatten Paul in gelhpan a Taikika in a sutzop ahi chih ngaihdan nei pawl leng om hi. Amauten laikhak gelhtu in a lai khakna mite leh a buaina uh thei ahihlam a kigen louh man in Paul hitheilou ding chi uhi. Paul in kum thum lam a khosakna ahih ziak in a mite leh buaina uh thei mahmah ding chi uhi. A thumal leh a laigelhdan Paul gelhdan hilou chi ua, a thumal leh thuvual za khat phial a zatte a laikhak dangte ah kimulou chih ahi. Paul laikhak dangte leh a bik a Kolossa laikhak apan laksawn a tam ziak in Paul gelh hilou a midang hi ding chih ngaihdan nei uhi.

Laikhaktu Paul hidia Laisiangthou sutmiten a gintakna ziak uh ahihleh a laikhak dangte mah bang in chibaibukna, leh Sawltak hi ding a sam Pathian ahihdan a genna apan theihtheih hi (Eph. 1:1 cf. 2 Cor. 1:1; Gal. 1:1 Col. 1:1). A Pathian thu suidan leh thugin paipih dan Paul gelh ahi chih chiangsak chi ua, Sawltak Paul mah leng Ephesa 3:1 ah hong kipulak in amah gelh hilou chih buaina beisak zou chi uhi. Kum Zabi 2na hun in Paul laikhakte sutkhiak ding a buaipih ua, Laisiangthou sut mi tamzawten Paul gelh ahi chi pomkip chiat uhi.

4. Laikhak Kuate adia Khak: Laikhak gelhtu’n a khakna mite toh kisai in ngaihdan tuamtuam om hi. Aziak tuh Ephesa laikhak akigelh masakna (Manuscript) pen ah “Ephesa ah” chih omlou hi. Huchi ahih ziak in kuate kiang a gelh hi ding hiam chih dotna lianpi hongsuak hi. “Ephesa ah” chih thumal Kum Zabi 2na lai lak vel in a laikhak ah behlap ahi a, John Chrysostom in Ephesa hilhchetna bu ah “Ephesa ah” chih gelh a, huai tuh a kimuh patna leng ahi. Huai ban ah Greek Bible luipenpen I muhtheih uh (Papyrus 46, leh Kumzabi 4na Codices Sinaiticus leh Vaticunus) ah “Ephesate kiang ah” chih muhtheih in om nawn hi. Hiaite kawmkal ah Marcion in hiai laikhak tuh Ephesa hilou in Laodecia Saptuamte adia gelh ahi ana chi leuleu zel hi.

Hiai toh kisai in ngaihdan leh muhdan tuamtuam kigen mahleh Paul in Ephesa khua a gingtute adia gelh masak hi ding in gintakhuaipen hi. “Ephesa ah” chih a kimuhlouh ziak tuh Paul in a laikhak tamzawte ah mimal or Saptuam khat ngim in gelh zel a, hiaipen a tangpi leh za uap deuh dia a gelh ahih ziak chi uhi. Laisiangthou sutmi tamzawten, Ephesa Khopi a nei, Asia gambup a Rome ukna nuai a Pathian’ saptuam omte tengteng adia apai sawnsawn ding laikhak (Circular Letter) ahih ziak a “Ephesa ah” chih kigelhlou ahi chi uhi. Huaiziak in Ephesate laikhak tuh Ephesa khua a gingtute leh Ephesa khokim a gingtu omte adia gelh ahihban ah, ei gingtute tengteng a ding a leng gelh ahi.

5. Laikhak Gelh Hun: Laikhak gelh hun toh kisai in ngaihdan tuamtuam om hi. Tamlouten Paul in Ephesa khua a a gelh hi ding a a gintak ziak un AD 54-57 kikal hi ding chi ua, khenkhatten Kaisaria pansan a a gelh gingta in AD 59-61 hi ding chi uhi. Laisiangthou sutmi tamzawten Sawltak Paul in suangkulh apan a laikhak gelh Philippi, Kolossa, leh Philemon nung, huai tuh AD 60-61 kikal a gelh hi ding chi ua, hiai mah pomhuaipen hi.

6. Laikhak in a Tup: Ephesa laikhak, Kolosate kiang a laikhak banglou in, saptuam sung a sinsakna diklou hiam, buaina omte apan kivenna ding a gelh hilou ahi. Taikika tungtawn a saptuamte hatsakna ding leh hanthawnna ding a Ephesa leh a kim a khua omte adia khak ahi. Paul in saptuam sung a buainate genlou in Pathian in a saptuam tungtawn leh khovel a Toupa lemgel leh ngaihtuahna omte genkhia hi. Paul in a gelhna ziak pipen ahihleh Ephesa a gingtute a Ginna ua a khanna ding uh leh khalam uh hihhatna ding a hanthawnna a gelh ahi. Khristian Ginna a khanlet uh deihna in Saptuam omzia leh Khrist pumpi, Saptuam dinsan hilhchetna tungtawn a Ginna a khanletna ding ngim ahi.

Thukhitna: Ephesa laikhak sinkhawm ding a kisa i hihziak in Ephesa laikhak toh kisai tomkimtak in i enkhawm khin uhi. Hiai a tung a kigente apan in Ephesa khua, laikhak gelh hun in, khopi poimoh mahmah khat ahi chih i sinkhawm uhi. Hiai khua ah Paul Missionary khualzin nihveina a a kalsuanna leh nasepna tungtawn a Saptuam hong piangkhia ahi chih i thei uhi. Paul in a nasepna tungtawn a hong piangkhia saptuamte sinsak, thuhilh, leh taihilh poimohte leng laikhak hiam, kam hiam mah in sinsak, thuhilh leh taihilh zel hi. Ephesa laikhak leng Ephesa leh a khokim a om gingtute hanthawnna ding a Rome suangkulh apan Paul in AD 60-61 kikal a a gelh ahi. Simtute Toupa hon vualzawl chiat hen.

Laibu ette:
01. Barton, Bruce B. “Ephesians.” NKJV: Life Application Study Bible. Carol Stream, Illinios: Tyndale House Publishers, 2006. Print.
02. Barth, Markus. Ephesians 1-3: A New Translation with Introduction and Commentary. Ed. Raymond E. Brown. New York: Doubleday and Co. Inc., 1974. Print. The Anchor Bible.
03. Bruce, F. F. “The Epistle to the Colossians, to Philemon and to the Ephesians.” Ed. Ned. B. Stonehouse and Gordon D. Fee. Grand Rapids, mICHIGAN: Wm. B. Eerdmans Publishing Co., 1984. Print. NICNT.
04. Foulkes, Francis. “Ephesians: An Introduction and Commentary.” Ed. Leon Morris. Tyndale New Testament Commentaries. Downers Grove, Illinois: IVP Academic, 1996. Print.
05. Goodspeed, Edgar J. “The Meaning of Ephesians.” Chicago: University Press, 1993.
06. Hale, Thomas and Thorson Stephen. The Applied New Testament Commentary. United Kingdom: Kingsway Publications, 1996. Print.
07. Klein, William W. “Ephesians.” The Expositor’s Bible Commentary. Ed. David E. Garland et al. Grand Rapids, Michigan: Zondervan Publishing House, 2006. Print.
08. Lincoln, Andrew T. Ephesians. Vol. 42 Ed. David A. Hubbard et. al. Dallas, Texas: Word Books Publisher, 1990. Print. WBC.
09. Mangte, Thangminlun. “Bible Study: Ephesate kiang a Paul laikhak.” EBC Kumsim Khawmpi 69na, Centenary Hall, New Lamka. Print.
10. Ninan, Idicheria. “Ephesians.” South Asia Bible Commentary. Ed. Brian Wintle et. al. Udaipur Rajasthan: Open Door Publications, 2015. Print.
11. O’Brien, Peter T. “The Letter to the Ephesians.” Ed. D. A. Carson. The Pillar New Testament Commentary. Grand Rapids, Michigan: William B Eerdmans Publishing Company, 1999. Print.