Text : Galatiate 5:13-26

Thumapi: Kumthak 2021, a kha nihna ah, ‘Kha A Hinna’ chih thupi a nei in Bible study sunzom nawn le i chi hi. Hiai bung leh tang ah Paul in, Pathian leh mihingte nasem ding a Khrist sisan tungtawn-a zaleenna ngahten, Kha thilhihtheihna tang a Pathian ading a hingtheita leh gilou pianken nusetheita a hihdan uh hon genchian hi.

T.13na -15na. ‘Zaleen ding a sap na hi ngal ua; na zaleenna uh sa adia lemtaang in zang kei unla, itna in akua akua nna kisepsak tuah zaw un’ Zaleenna zatkhelh khak baihlam lua a hihna phawk in hiai a, Paul in hon gen thakthak hi. Amaute Kha Siangthou in khelhna sung apan zaleen ding in samkhia a, himahleh tua zaleenna sa adia lemtang in zang kei un a chihna ahi. Sa adia lemtaang-a zang chih omdan tuh, noptalna dia zang, nopzatna, Grik ah ‘aphorme’ ahi a, galdouna a panmun gennna ahi.1 Sa utna in Kha deihdan a douna a panmun ding in zaleenna zang kei un a chihna ahi. Sa utna sila hi zawlou in ‘itna’ sila hong hi zaw un chi a a vauhilhna ahi.

Nangmah na ki-it bang in na innveng na it ding ahi ... Pianken in mihing ah itna taktak omlou hi. Himahleh, Pathian itna mihing a a hong luanlut chiang in bel, hiai itna taktak pen amah ah om theita hi. Jesu mahmah in leng Lk.10:29-37 a a na genchet bang in, kuapeuhmah panpih ngai leh tasamte innvengte hi ua, tuate it in, itna sila suak zaw un a chihna ahi. Himahleh,… pilvaang un, hiai thumal te’n a gen nop tuh, khristian kiitna toh kilehngat, kigensiatna, kikeihtuahna a om leh poi lua mahmah ding ahih man in pilvaang mahmah un chi nuam ahi hi. Saptuam chidamlouhna leh kibalkhapna a om theihna pen Khristian itna taksap ziak hi mahmah hi.

T.16na-18na. ‘Kha ah om un, huchi in sa’utna na pichin kei ding uhi. Sa in Kha’ deihlouh lam a lunggulh a, Kha in leng sa’ deihlouh lam a lunggulh hi. Saptuam sung a buaina leh haksatna omte beisak theihna’ng leh mimal khalam hinkhuaa a dinkip theihna dia damdoi hoihpen, Kha in a thunun hinkhua ahi. Huai tuh, Kha deihdan a ngaihtuah, genkhiak leh sepkhiak chihna ahi. Gingtu lungtang sung hi sa leh kha kidouna phualpi hi gige ahih theihkhelh louh ding ahi. Pianken/mihinglui khelhna gilou ompen pumpi hihlamdan/thohkikna a om ma teng omden ding ahih na ah niteng a khelhna tung a vualzou hinkhua i neih na’ng in Kha a om gige kiphamoh mahmah hi. Kha a hinna i chih dan thupiak zuihna hilou, ut bangbang a nopleenna hi samlou, ginna leh itnaa hinkhua zat ahi zaw hi.

T.19na-21na. ‘Sa’ thilhihte tuh a kilang chian hi; huaite tuh…’ Hiai a ki taklangte Commentary khenkhat in a bawngbawng a khen in bawng li pha sak uhi. Khatna, Khelhna chi thum, numei-pasal kikala khelhnate. Nihna, Biakna toh kisai a khelhna chi nih. Thumna, Mihing gamtatna, mihing(khawtang) leh mihing kikal toh kisai deuh khelhna tuamtuam giat te leh, Lina, Thilchiin toh kisai khelhna chi nihte hi uhi.2

T.22na -23na. ‘Kha gah tuh itna, kipahna, lemna, thuaktheihna, migitna/hehpihna, hoihna, muanhuaina, nunnemna leh kidektheihna khawng ahi uh;…’ Hiai a kha gah kua (9) kigente Brian Wintle in theihsiam baih ding deihna toh hon thum a a na khente enkhawmle i chi hi.3

Hon masa thumte: A pipen a Pathian toh kisai masa, gingtuten Amah apan I ngahte.

‘Itna’ (agape). Paul in hiai a masapen a hon koih, khalam thilpiakte lak a a thupipen ahihna ziak ahi a, dik mahmah hi. Pathian zaw itna ahi (1 Jn.4:8). Hiai itna hi numei-pasal kal kiitna (eros) bang lel hilou, (philia) lawmta, sanggam kiitna bang lel hi samlou, (agape) melmate i hihlai a A Tapa neihsun a hon zongkhia, i Pa Pathain itna, ei a hong gahkhia ahi hi (Jn,13:35).
‘Kipahna / lungnopna’ (chara). Kipahna sang a thukzaw, lungnopna, Khrist Jesu a omte lungsim tawng a om, Khasiangthou a pan gingtuten i ngah pen genna ahi.
‘Lemna/muanna’ (Eirene), Hebru a ‘Shalom’ chih toh kibang, a khiakna Pathian toh kituak/kilem a omna hang a khalam vualzawlna ngah ding genna a hi a, khristian masate’n chibaibukna a neih chiang un a tung a ‘chara’ toh zangkhawm sek uhi.
Hon nihna thumte: Midang toh kikal thu, khawtang toh kisai kha mahmahte ahi uh.

‘Thuaktheihna (makrothumia). Hiai tuh Lungduaina, haksatna tuah hun a leng phunlou a kuhkaltak a thuaktheihna ahi.
‘Migitna (chrestotes). Hiai hi Pathian chitna (kindness) mihingte tung a hihlat ahih bang a, en leng midangte tung a lahkhiak sawn ding kha gah ahi.
‘Hoihna (agathosune). Hiai hi a tung a migitna i chih kilatkhiakna ahi. Hiai thumte thuaktheihna, migitna, hoihna i chihte khat leh khat kikal a muhtheih dia langkhe sak gige ding a Toupa’n hon lam ette i hi uhi.
Hon thumnaa thumte: Gingtu in amaha a neih, amah toh kisai khawldiak deuhte.

‘Muanhuaina (pistis) Hiai tuh a bik tak in mimal sukha mahmah kha gah a hi. Midangte’n muantham leh kingakna tham ching a hon muh ngeingeina ding ua muhtheih kha gah poimoh mamah ahi.
‘Nunnemna (parautes) Laisiangthou in mi nunnem pen Mosi a na chi hi (Num. 12:3). Pathian thu a kithunun zou, thunuailut zou leh kingainiamtak a om theihna ahi.
‘Kidektheihna (enkrateia). Hiai tuh khemna chiteng-a zol a om hun a leng mahni kithuzoh zou hinkhua ahi. Uthuai mahmah, hon hup mahmah ahih lai a leng zolzohlouh a om theihna ahi.
Dan-thupiakte hoih a, siangthou ahihman in (Rom. 7;12), hiai a tung a kha gah kua kigente’n dan thupiak bangmah in kalh lou hi.

T.24na – 26na. ‘Khrist Jesu’ a-omte’n tuh apianken mihinna uh, a lunggulhte leh a deihte toh a kilhdenta uhi. Kha a hing i hih ngal uleh, Kha makaih mah in i gamta ding uh ahi. Kikoih lian a, kitoutuah leh kihaza tuah chiat in om kei ni hang’

Hiai a Paul in ‘kilhdenta’ chih hon gen omdan tuh, mi kuapeuh in Jesu Khrist a ngaihdamna thilthawnpiak sang a, khelhnate kisik kia hilou, tawpsan, hihnawnlou hinkhua a hinna ahi. Chiamteh dia hoih mahmah tuh, kidouna kizou a, buaipih ding melma omnawn hetlou chihna hilou hi. Jesu Khrist toh kizopna ziak a mihinglui sita, Kha Siangthou nasep, mihing thak kipan ta ahih man in tua Kha deihbang a hin touhtouhna pen vualzou hinkhua hita hi. Kha siangthou in hon thuzoh a, hon pumneihna pen kha a dimna ahi hi. Kha a hinna ah kiletsakna— thupi loupi thupi kisakna, kitoutuahna leh kihazatna in mun neilou hi.

Kha thunun hinkhua neihna in kituahlouhna leh buainate apan hon suakta sak zel ahih man in, Kha pi a om gige poimoh mahmah hi. Hiai a hi Kha a hinna i chih.

Thukhitna:
Kha Siangthou in khelhna sung apan zalen ding in hon samkhia a himahleh tua zaleenna sa adia lemtang a zatkhak baihlam mahmah hi. Sa utna sila hi zawlou in ‘itna’ sila hih zawk ding Toupa hon deihna ahi hi. Khrist’ itna nei in zang chiat leng, khotang, Saptuam leh innsung buaina leh kibalkhapna omlou ding a, kingaihdamna leh kilemna in hon zel suak ding hi.

Gingtu lungtang sung hi sa leh kha kidouna phualpi hi gige ahih man in niteng a khelhna tung a vualzou hinkhua i neih nang in Kha a om gige kiphamoh mahmah hi. Kha a hinna i chih dan thupiak zuihna hilou, ut bangbang a noplenna hi samlou, ginna leh itna a hinkhua zat ahi zaw hi.

Kha a hinna in gah hon suang a, tuate tuh kha gah kuate chi a i na theih, Paul in a na gente ahi uhi. Unau, hiai kha gah kua kichite nang ah a gah khia in na thei hia? Nang theih sang sang a poimohzaw tuh, midangte’n nang ah tua bang gahkhia in a thei uhia chih poimoh mahmah hi.

Simtu deihtakte aw, Kha mahmah in ei a pan kha gah kuate hon gah khesak in midangte ading a vualzawlna hon suak sak leh i chi mahmah hi. Toupa’n hon lamet bang bang a Kha a Hing a, i nam, i gam, khotang, saptuam leh innsungte ah ‘Kingaihdamna’ leh tua in a gahkhiak, Kilemna mu a, hamphatpih chiat ding in i Pa Pathian in A Saptuamte hon ompih in hon makaih tawntungta hen. Amen!