Text: Galatiate 5:1 - 12
Thumapi: Kumthak 2021 melmu thei dia zahngaihna khut a hon pitu, i biak Pathian min phat in Amah min mah suang in simtute na vek un Kumthak chibai aw!

Tu kumthak kha masa in, ‘Na Zaleenna uh Kembit un’ chih thupi a nei in Bible study sunzawm nawn le i chi hi. Judaizerte thu sinsak, dan-thupiak zuihna loua, Pathian hehpihna ziak kia a ginna tungtawn a hotdamna om ahihleh, hotdamna ngahsate ut bangbang a omtheih chihna hongsuak ding hi chi uh hileh kilawm hi. Tua ahihman in Paul in, hiai tangte ah Khrist ziak a zalenna toh kisai hon genchian hi.

T.1na. ‘Zaleen hi ding in Khrist in nou a hon suaktasakta a, huai jiak in dingkip unla, sila hihna haakkol ah zaw taang nawn kei un’ Hiai a, ‘zaleen’ kichi Grik ah ‘eleutheria’ ahi a, 3:22 a ‘zaleen numei’ chih toh thumal kibang chihtheih ahi.1 Dan-thupiak a pan suahtaksakna genna mah ahi. Khrist Jesu gingtaten suahtakna ngah ta uhi. ‘Khrist in eite sik a hamsia a hongthuak in, dan hamsiatna apan eite a hong tanta hi’ (Gal.3: 13; 4:4; 31). Huaiziak in ahi Gingtute zaleen (noplen) ahih tak uh. Zaleenna i chih Setan omlouhna gam a omna hilou in, chiklaipeuh a Setan leh a pawlten a sukbuai phak uh, a pilvan kei ualeh sila hihtheihna kol tuamtuama taankhak theihna muna om ahih lai man un Paul in ‘dingkip unla, sila hihna haakkol ah zaw taang nawn kei un’ ana chi hi.

T.2na ‘…zeksumsak a na om uleh, Khrist nou ading in bangmah a phatuam kei ding…’ Hiai a, ‘zeksumsak a na om uleh’ a chih in Judate ngeina dan bang a zeksum omsa pen pumkhalhna hipahlou in, zeksum toh kithuaha Jesu Khrist ginna tungtawn a hotdamna ngah sawmna ompen kalhna ahi zaw hi.2 Jesu Khrist toh a dang khatpeuh gawmkhawmna pen Khrist nawlkhinna leh nialna ahih man in ‘Khrist nou ading in bangmah a phatuam kei ding’ a na chi hi. Hiai a Paul in a ngaihpoimoh mahmah tuh, zeksumna, hotdamna kingakna ding a kiphamoh khat dan a ngaihtuah khakna ahi.

T.3na. ‘Dan thu tengteng zui ding a batnei na hi uh chih zeksum tengteng kiang ah ka hon theisak nawn hi’. Paul hunlai a Judaten zeksum pen Pathian thumanna kilatna masa bang a ngai in, Mosi dan-thupiakte abanban a zui toutou in a tawp a Pathian deihsakna ngah ding in ki ngaihsun uhi. Zeksum ngaipoimoh a, tua ding a kipiakna pen Mosi dan-thupiakte zui ding a kipiakna a hih man in Paul in, ‘dan thu tengteng zui ding a bat nei’ ahihna uh chiangtak in hon taklang hi.

T.4na. ‘Nou dan a siamtan tumte, Khrist toh khen in na omta ua, hehpihna na puksan ta uhi’ Hiai ah thu poimoh mahmah khat hong om tuh: Hotdamna mang nawn thei hi ding a gintakna ahi. Dan-thupiak zuihna toh hotdamna ngah sawmna pen Pathian hehpihna toh kikelki mahmah ahih man in Hehpihna a pan pukmanna, Khrist toh kikhenna leh mikhual suahna suak hi. Grik ah ‘katergethete’ ahi a, Rom.7:2 a nupa hihna a pan khahkhiatna kigen toh thumal kibang ahi.

T5na ‘Himahleh, kou zaw Kha tungtawn in, ginna in diktatna lametna ngaklah tak in ka ngak uhi’ Hiai a a gen chet nop tuh, sinsakna diklou zuite leh sinsakna diktak zuite hihna phoukhiak ahi. Hiai a lametna kilawp tak a kingak tuh Toupa hong pai kikna ahi (1 Kor.1:7; Phil, 3:9, 10, 20). Hiai hun chiang in Khrist a diktansakna pen dinmun thu kia hilouin, a taktaka bukimna hita ding hi. Hiai bang bukim hun ngaklah huai mahmah ahih man in kilawptak in ka ngak uhi chi hi.

T.6na ‘Khrist Jesu ah zeksum hiam, sumlouh hiam bangmah a phatuam kei; itna tungtawn a nasem, ginna bel a phatuam hi’ Hiai a Paul in a hilhchet nop tuh, Khrist toh khalam hinna a kizopna ziak a pumkhat hihna ahi. Tua bang mite a di’n zeksum in bangmah phattuamna pelou a, zeksumlouh in leng bangmah thupina nei tuanlou hi. Ahihhang, a manpha omsun tuh, ‘itna tungtawn a nasem, ginna’ a hi hi. A poimohpen zaw, nasep ziak hihetlou a ginna ziak a hotdamna na i ngah pen ahi hi. Hiai ginna ahi ginna hing tampi a gah suang thei!

T.7na ‘Kitaitehna ah hoihtak in na tai uh; thutak zuih ding kuan hon kham ahia?’ Paul in mun tampi ah kimawlnate pansan in tangthupha gen sek hi (1 Kor.9:24-27; Phil.3:13-14; 2 Tim.4:7). Gal.2:2 ah leng a mawkna a tai ahih khak ding alauh thu ana gen hi. Kitaitehna mun a kihelte taina ding lampi kichiamteh om a, tua sung ah tai uhi. Kitaitehna mun a tai a, diklou tak a lawmte dala taikhial sak a, makhelh tuh dan kalh ahi.3 Tua bang geih in, Galatiate leng bangtan hiam a tai nung un, Judaizerte a hong om ua, amauten a tung a tangthupha thutak kipahpiha zuia a tai lai un sinsakna diklou hong pia in amaute (Galatiate) hong taikhial sak uhi.

T.8na ‘Hichi bang khamna zaw nou honsampa a kipan ahi kei hi’ Judaizerten kamsiamtak leh kilawm tak a Galatia saptuamte pikawi sawm a zol uh hi ding in muhtheih hi. Galatia saptuamte tuah bang tulai in leng, diklou tak a kizolna, belam kiguksakna (sheep stealing) chih a na om zeuhzeuh hi. ‘Kou pawl ah hong lut le uchin hiai, huai bang phattuampih ding om hi’ chi-a kizolna pen amaute sampa, Pathian a pan hilou ahi a chihna ahi.

T.9na ‘Silngou tawmchik in tanghou beupi a zelsuak zou hi’ Diklou tak a kizolna- sinsakna diklou i chihte Pathian a pan hilou, Setan leh a vanzat mihingte a pan hi zaw hi. Ahihhang, a naseptheih dan leh a lauhhuai dan tuh, Silngou tawmchik in tanghou beupi a zelsuak zou hi’ a chihna ah kilang mahmah hi. Silngou in kintak a a sukkhakte a zelhsuah pah theih bang in, sinsakna diklou in leng baihlam tak in mite a zou thei hi.

T.10na ‘Ngaihdan dang na nei tuan kei ding uh chih Toupa ah kon muang hi. Nou hon hihbuai tuh kuapeuh hitaleh, Pathian’ gawt in a-om ngei diing hi’ Hunpaisa a tangthupha dang, ana lunglen khakna te uh tu a diklou ahih dan theichian mahmah ta ding ua koih kawm in, leh Toupa’n muanngamna a piak bang in amaute muanhuai mahmah ta ding un lam en hi. Pathian in, a Saptuam, a sisan a a leisate it mahmah ahih man in, amau susiate tung ah gawtna a tun ngeingei ding chihna ahi. Tu damsung mahmah in leng a gawt thei a, tunung chiang ading in leng a siit thei hi.

T.11na ‘Himahleh unaute aw, ken zeksum poimoh ahi chih gen lailai ka hihleh; bangjiak a sawia omlai ka hia? Hiai a Paul in ‘ken zeksum poimoh ahi chih gen lailai ka hihleh..’ a chih toh kisai hilhchetdan tuamtuam nana om hi. Khenkhat ten, zeksum poimoh ahi chih a na gen ngei chihna hilou in, amah langpangpawlten, atunglai a zeksumthu gen ahi, Timothi mahmah leng zeksumsak ahih man in chi-a a ngohna uh dawnna lel a hi chi uhi. Khenkhat in bel, Paul a pianthak ma a Juda kulmut mahmah ahih man in zeksum a poimoh thu naktaka a na gen kha mah hi ding ahi. Himahleh, tuin bel hiaibang thu gen nawnlou ahih man in Judaten amah mudah a naktaka dou uh ahi. Hiai thugen lai hi leng, ‘bangjiak a sawia omlai ka hia?’ chi hi zaw ahi chi’n hilhchian uhi.

T.12na ‘Nou hon hihbuaite amau leh amau kikhutdot in, kiget vanglak le uh ka ut hi!’ Hiai ah Paul in Pathian thutak leh Pathian saptuamte awlmoh luat jiak in paukam khauh sim mahmah hon zang kha zezen hi. ‘Kiget’ or chilgeh leh atgawp in chisuan a neih theihlouh bang in hiai a buaina bawlte leng a sinsakna diklou uh dalhzaak theilou ding in leh gahsuah lou ding in bawl in om leh, chih deihna ziak a hiaibang a a gen hi ding hi. Phil.3:2 ah leng Paul mah in, ‘uite, na gilou semte, sa atgawpte’ chi in kampau khauhtak ana zang hi. Zeksum in bangmah ah phattuamna neilou kia hilou in taksa suksiatna hi zaw hi.

Thukhitna:
Tutung i thupi, ‘Na Zaleenna uh Kembit un’ chih a pan chiamteh tuak om mahmahte:

1. Khrist ziak a Zaleenna tuh: Dan-thupiak zuih ziak hilou, ginna ziak liauliaua hotdamna ngahsate ut bangbang a omtheih chihna hilou in, mohpuakna thupi tak pua thei ding a pichinna leh Khasiangthou sungluahna ziak a Pathian maia siangthou a om theihna ahi zaw hi.

2. Melma, setan omlouhna gam a om i hikei ua, chiklai peuha setan leh a pawlten a sukbuai phak uh, i pilvan kei ualeh sila hihtheihna kol tuamtuama taankhak theihna mun a om i hih theih gige ding.

3. Nidang a zeksumna, hotdamna kingakna ding a kiphamoh khat dan a ngaihtuah khakna a na om mahbang in, tulai in leng, zeksum toh kisai hi sese lou, nasephoih khatpeuh hotdamna ding a kalbi khat bang a genna om thei. Pilvan poimoh hi.

4. Silngou in kintak a a sukkhakte a zelhsuah pah theih bang in, sinsakna diklou in leng baihlam tak in mite a zou thei hi.

5. Pathian in, a Saptuam, a sisana a leisate, it mahmah ahih man in, amau susiate tung ah gawtna a tun ngei ngei ding hi. Tu damsung mahmah in leng gawt thei gige hi.

I Pa Pathian in i zalenna uh kembit a, melma a pan khemna lam tuamtuam a hongpai theite dou zou ding in A Saptuamte hon ompih tawntung ta hen, Amen!

1 Alan Cole, Galatians, An Introduction and Commentary,(London, the Tyndal Press, 1969) p. 136

2. Guthrie D, New Bible Commentary,(Michigan, Grand Rapids, Inter-varsity Press, 1970) p. 1101

3. Brian Wintle, South Asia Bible Commentary ( Udaipur, India, Open Door Publication, 2015) p.1627