Text : Galatiate 4:1-20

Thumapi: Simtu deihtakte, Khrist min toh itna chibai aw... ‘Paul in Galatiate a Awlmohna’ chih thupi a nei in Bible study sunzawm nawn le i chi hi. Hiai changteel sung ah Paul in Galatiate theihsiam ding deihna in houtak in, mihingte khandan ngeina pansan in, naupang (sila) hihna a pan piching (tapate/Pathian gouluahte) hita, Khrist a pichingtak a om dia a deihsakdan, awlmohtak in hon gen hi.

I. Pathian Gouluahte (4:1-7:

Tt.1na – 3na. ‘Gouluahpa tuh bangkim neipa himahleh, naupang ahih lai teng sila toh bangmah ah a kilamdang tuan kei...’ Hiai ah thumal pomoh, ‘naupang’ kichi Grik ah ‘nepios’ (an infant) ahi a, naungek nawi teplai a kichi toh thumal kibang a hi.1 Naupang a pa apa’n mohpuakna ngah nailou genna hi in kilang hi. Judate dan in pasal naupang kum 12 a chin nung sabbatni in a pa’n Sinagok (Synagogue) ah pi in, benediction hiai bang in gen sek hi. “Hiai naupang tung a mohpuakna kei a kipan na hon lakkhiak sak man in Pathian aw, nuamsa ka hi ta hi” chi hi. Tua khit phet in naupang leng hong thum in, ‘Tuni ni thupi leh ni siangthou, naupang a pan piching ka suah niin ka pate Pathian leh kei Pathian aw, kingainiamtak in nanglam kon mitsuan tou a, chihtakna leh thudikna toh tu a kipan in na dan-thupiakte ka zui ding a ka nasepnate leh mohpuaknate nanglam ah a hi ding hi”.2 Hiai teng khit ah dan-thupiak a tapa khat (a son of the law) a simtel, piching hong hita in, a pa tapa hihna leh gouluahtu hihna diktak ngah hita hi. Hiai bang a naupang piching a pom a hong hihma teng ‘sila toh bangmah ah a kilamdang tuan kei hi’ chih ahi.

Tt.4na – 7na. ‘Himahleh a hunbi a hongkim in...’ Hiai ah, thumal poimoh, ‘himahleh’ chih hon zat in sila bang a om himah lehang, Pathian in a Tapa tungtawn a suahtakna hon bawlsak gen nuam lua ahi hi. Tua Pathian thil gelkhawlh hong tangtunna genna in, ‘A hunbi a hong tun in’ chi hi. Hiai ah Pathian, thuneihna tengteng a khut a tawitu ahihna kilang hi. A Tapa, mawk-a hon sawl khe phut hilou in, a hunbi…hoih pen en detdet a a geel bang geih in chihna ahi.

Rome khopi pan high-way te’n leitung kilchih sun — gospel khualzin na’ng…
Nam/pau tuamtuam nam khat bang a koih, Rom citizenship & Grik pau “common language’ – Paul leh adg. ten gospel nasepna ah phattuampih mahmah uh.
Sabiak/a pathiante uah lungkimna leh khamuanna mulou- khalam dangtakna
Judate lak ah Messiah hong pai ding lametna uang san mahmah — Lungmuanna leh kipahna taktak deih a dangtakna uang mahmah. Khovel mipil, misiam — Philosophers (Grik: Socrates/ Plato/Aristotle) ten leng lungmuanna kipahna taktak petheilou uh.
Lungmuanna bukim deih a dangtakna liantak om hun ! Hiai bang hun geih, a poimoh huntak in ahi Pathian in A Tapa hon sawl. Dan thupiak nuai a koltanna apan hon suaktasak in, Khrist ziak a Pathian gouluahtute na hita uhi, hon chi hi. Thupi hina tel e!
II. Sila/Sikha Suahkikna (4:8 – 11)

Tt.8na – 11na. ‘Tuma lam a Pathian na theihlouh lai un, …pathian hiloute sila na hi uhi. Himahleh tu a Pathian na hon theih nung un, hilou, Pathin theih na hong hih nung un...”. Gospel a na zak ma un, ni, kha, aksi leh adg bia in om mahle uh, tua chu Pathian thei te hilou, Pathian theihte hita chih hon gen hi. Hiai ah Pathian theita – ahih keileh Pathian theih chih toh kisai sut detdet kiphamoh om hi. ‘Theih’ kichi Grik ah ‘ginosko’ a kipan a hi a, tua hi potham theihna hilou in, theihna thuktak leh giltak genna ahi. Hiai a Paul in a genchet noptak bel, mihingten Pathian zong’ a thei hi lou in; Pathian in mihingte hon zong a hon theih hi zaw hi.3 Pathian ka thei chih sang in Pathian theih in ka om chi zaw un, a chihna bang ahi. Hiai bang ahih nung a Galatiaten, khalam saltanna hon tuah nawn uh Paul in poisa in lamdang sa mahmah hi. Hiai a tang 10na a kigen, nite, khate, hunbite leh kumte tan thu kigente amau ngeina leh milim biakna toh kisai a nipoimohte genna hi thei hi. Bangtenghileh, Khristian i hih nung ni poimoh leh hunbi poimoh tuamtuam zatdan thu ah pilvanna ding om kha thei - Pathian min a zat chinapi in Pathian thu toh kikalh a thanghuaitak a zat khak theih a na hi hi. Khrist ziak a nutsiatsa lunggulh nawn a a om uhleh, amaute ziak a tha leh zung tamtak a sente a thawn a suah khak ding lau in... ‘Na lak ua ka sepgimna bangmahlou na suah khak ding uh kon lauhpih’ chi hi.

III. Paul leh Galatiate Kikal (4:12-20)

Tt. 12na -15na ‘Unaute aw, ka hon ngen hi, keimah bang in om un; kei leng noumau bang in ka om hi.’ Paul in hiai ah ‘Sanggamte aw’ chi’n hon pan a, a tawplam in ‘ka ta deihthohte’ chi’n hon zou hial hi. Amauten a thusinsakte nusia in sinsakna diklou ah huplut in omsan mahle uh, Paul lungsim Khrist itna in luah dim a tua itna leh hehpihna kammal mah toh thuhilh ngiatngiat hi. ‘Keimah bang in om un; kei leng noumau bang in ka om hi’ a chih toh kisai gendan tuamtuam om mahleh, Paul in a gen nop pen tuh, ‘ken Khrist a ginna nei a zalenna ka ngah bang in nou leng tua bang suahtakna ngah ding in kon deihsak mahmah hi’ a chihna hi ding hi. Galatiate lak a Gospel a va tangkoupih lai a amaute bang bang a va khosak theihna hon gen hi (1 Kor.9:19-23). Amaute leng khalam thil a amah bang ding in ngen ngutngut hi.

T13 a, ‘Na kiang ua Tanchinhoih ka genkhak masakna ziak tuh taksa lam damlouhna ziak ahi’ a chih toh kisai ngaihdan tuamtuam om thei hi. Hiai mun a taam dia kisa lou, damlouhna ziak a taam kha, Galatiaten Tanchinpha zakkhak loh uh hi thei hi. Hiai damlouhna a chih, Grik ah ‘astheneian’ thumal ki zang a, taksa damlouhna mah ahi hi. Khenkhatten, malaria vei kha hiam, Listra khua-a a thuakna gu ( Nas.14:19; 2 Tim.3:11), satung a ling (2 Kor.12:7) ban ah mit lam buaina (4:15; 6:11) jiak ding in gingta uhi.4 Hiai bang te i bulhkhawm chiang kituak sawn sawn mah uhi.

Paul’ chinatna pen Galatiaten simmohna leh nuaisiahna a zanglou in, ‘vansawltak’ bang a ngai sang leh kipahpih mahmah in amah leh Gospel a na sang uhi. Hiai bang a hih lai in, sinsakna diklou a a na puk mawk uh poisa mahmah in, ‘thutak nou konhilh ziak in na melma uh ka hong hita hia leh? (t16) hon chi khe hial hi.

Tt. 17na – 20na ‘Ahoih lam deihna ziak hilou in, lungluttak in nou a hon zol ua; nou kei toh khen a, amau lam a na lunglut zawk uh hon deih man uh ahi. Ka naute aw, Khrist mizia noumaua siama a om masiah, nauvei in kon vei hi.’ Hiai ah Paul in Judaizerte hidden agenda hon phoukhia hi. Huai tuh, Paul leh Galatiate kal a kikhenna a bawl zoh uhleh baihlamtak a amau (Judaizerte) lam a pang-a theihtawp suah ding uh ahi chih mu uhi.

Paul pastor lungput diktak pu ahihna, ‘Ka naute aw, Khrist mizia noumau a siam a a om masiah, nauvei in kon vei hi’ a chihna ah kilang chian mahmah hi. Itna taktak toh awlmohna leh veina nei in, numei in nau a neih dek chiang a a thuakgimna leh haksa a saknate bangbang in, Khrist a a hongpichinna ding uh a gimpih mahmah hi. Thil nih Galatia saptuam te a deihsak mahmah om hi: Khatna — Pianthakna diktak a neih na’ng uh, nihna — amau sung a Khrist mizia a kisiam kim ding ahi.

Khrist a pichinna hon neih ding uh deihsak mahmah ahih lai in, sinsakna diklou lam a pukna hon zak in lungkhamna thupitak guan hi. Tua ahihman in, amau kiang va phak a, a taksapte uh va piak lunggulh mahmah in, tua bang hileh, amau hong kibawlhoih ding ua, tua a aw phawi bang hilou, amaute phatna leh kipahpihna aw suah thei ding chih khawng deihthusam a nei in, nauvei in kon vei hi chi hi.

Thukhitna leh Chiamteh tuakte:

Sila bang a saltanna apan Pathian in a huntak in, A Tapa tungtawn in hon suaktasak a, tapate leh gouluahte hihna hon ngahsak ta. Nidang a Pathian toh kigamlate, tuin inkuan khat i hihtak man un, ‘Abba (Aramaic) ‘Pa aw’ i chi thei ta uhi.

Judaizerte, hoih deih lua bang a kilang in, phatuamngaitak in pang mahle uh, Paul leh Galatia saptuamte kikhensak teitei tup guk a nei a na hi zaw uhi. Ahi, kuahiam khat in na kiang a hoih deih lua bang a heutute hong soisak/gensiat leh, tup hoihlou nei uh hikha thei a hihna ah pilvan huai mahmah hi.

Paul in Galatia saptuamte nau vei a a vei bang a, i insung, i veng sung, i saptuam sung, gamsung, vei taktak a vei ding: heutu, kemtu leh gingtu tamsem hon pethei i Pa Pathian kiang ah kitamkham in ngen ni maw!!

1 Alan Cole, Galatians, An Introduction and Commentary,(London, the Tyndale Press, 1969) p. 112

2 William Barclay, The Daily Study Bible, The Letters to the Galatians;(Theological Publications in India,Bangalore, 1976). P.34

3 Brian Wintle, South Asia Bible Commentary (Udaipur, India, Open Door Publication, 2015) p.1626

4 Ibid