Thupi : Dan-thupiak leh Pathian Tate (The Law and Children of God)

Thumapi: ‘Dan-thupiak leh Pathian tate’ chih thupi a nei a tukha sinlai sindia i kisakna ah, hiai lungsim a vom kawm in sin leng i chi hi. Hotdamna, Dan-thupiak a kinga hilou in Dan-thupiak omma pek a thuchiam omkhin a kinga hizaw hi. Abraham in dan-thupiak a zuih ziak hilou in ginna tungtawn in Pathian’ diktansakna a ngah hi. 

I. Dan-thupiak in a tup (Purpose of the Law) 3:19-25: 

T.19na. ‘Ahihleh dan thiltup bang ahia le? Dan tuh tatleknate theihsakna dia, thuchiam piak a om, Chisuan hongtun matan daih dia piak beh, palai zang a angelte tungtawn a hihkip a om ahi’ 

Paul’dotna bawl, ‘Ahihleh dan thiltup bang ahia le?’ chih omdan tak tuh, Dan-thupiak in hotdamna tuntheilou ahihleh, Dan-thupiak in bang phattuamna/thiltup nei hiam? chih a hi. Amahmah in, ‘Dan tuh tatleknate theihsakna dia, thuchiam piak a om, Chisuan hongtun matan daih dia piak beh,…’ chi in genchian hi. Khelhna i chih, dan-thupiak a om ma thamtham in a na omkhin ta hi. Himahleh, dan-thupiak a omlouhna ah khelhna pen khelhna ahihlam kitheilou thei hi. (Rom. 4:15; 5:20) Ahi, khelhnate, thukhenna mun ah dan-thupiak in, gitlouhna (offence) a suaksak sek hi. Hiai a ‘Chisuan’ kichi bel Toupa Jesu Khrist chihna hi a, huan a ban a, ‘piakbeh’ chih in a gennop tuh, dan-thupiak a tung a kipia pah hilou in, Abraham nunglam pek a Mosi kiang a Sinai mualvum a kipia chihna ahi. Dan-thupiak a kizang toutou ding hilou in, thuchiam in a gen, Chisuan (Jesu Khrist, dan hih tangtung ding a hongpai) a hong tun mateng a ding ahi (Matt. 5:17) Tua ban ah ‘palai’ kichi leh ‘angelte’ kichi mikhat, Mosi genna a hi a chi pawl om mah le uh, Juda kulmut mahmah ten, Mosi kiang a dan-thupiak a kipiak in, angelte tungtawn mah a kipia ahi chi uhi. Stephen in, ‘Dan, angelte piaksawn, mu masa a zuiloute aw..” (Nas.7:53; Heb.2:2) a na chih in tua thu gen ahi chi uhi. Paul leng Juda kulmut mahmah ahihna ah, hiai bang ginna nei ahi chi uhi.1 

T.20na. ‘Palai tuh mi khat ading kia a palai ahi kei a, himahleh Pathian bel khat ahi’ Hiai a ‘palai’ kichi, Mosi a genna ahi a chi pawl ommahle uh, pomdan tangpi bel huai hilou in ‘Khrist’ a genna ahi zaw kichi hi. Khrist i chih chiang in, Pathian lah hi, mihing lah hi, Pathian leh mihingte kal a palai ahi hi (1Tim.2:5) Pathian in Amah tungtawn a sep pen tangtak a Pathian mahmah in a sep kichi thei hi. Pathian leh Jesu Khrist a tuam hilou in khat ahi. Paul in hiai ah theihkhelh ding a lauh ziak in, ‘Pathian zaw khat ahi’ hon chi thak thak ahi zaw hi. 

T.21na. ‘Ahihleh dan in Pathian’ thuchiamte kalh hia? Kalh lou hial! Hinna pethei dan piak a na om hitaleh, diktatna tuh dan ziak hita ding hi’ Hiai ah, Paul in a dotna dawnna ding in, ‘kalh lou hial!’ chih hon zang hi. Grik ah ‘me genoito’ a hi a, uanggenna kammal, thumal poimoh, a zatmun mahmah khat ahi. (Rom.7:7; Gal.2:17) Chikmah chiang a leng hi ngeingei lou ding achihna ahi.2 Thuchiam hi’n dan-thupiak hitaleh, a nih tuaktuak ua Pathian apan hi ua, kikalh theilou uhi a chihna ahi. Dan-thupiak in mihingte chinlahna theisak a, huaimah in thuchiam manphatna leh poimohna kitelsak a hihman in kikalh lou hi. Huan, dan-thupiak in hinna pe thei ding chih lametna toh kipia hilou in, thuchiam a kinga ginna ziak a diktatna kingah hizaw hi. 

T.22na. ‘Himahleh thuchiam tuh Jesu Khrist a ginna jiak a, a gingtate’ kiang a piak a-om theihna ding in; Laisiangthou in mi tengteng khelhna nuai ah a koihta hi’ Hotdamna toh kisai, mimawl pen in leng a theihsiam theih ding un Paul in hon gen thakthak a, ‘hotdamna pen dan-thupiak a kinga hilou in, thuchiam Jesu Khrist a tangtung ah kinga hi’ chi hi. Tua omdan bel, dan-thupiak in hotdamna hon pethei kei mahleh, mi tengteng khial hihna hon kiphawk saktu ahih man in hotdamna ngahnang in poimoh veve hi. Tomchik a gen in, hotdamna i ngah theihna tuh dan-thupiak a pan khelhna kiphawkna hong om a, thuchiam, Khrist a tangtun sak a om in siamtansakna hon ngahsak hi. 

T.23na ‘Himahleh ginna a hong om ma in, dan in a hon hen a, ginna hihlat a a-om masiah khakkhum in i om hi’ Pathian hehpihna hang a Abraham kiang a thuchiam Jesu Khrist a hih tangtun a om in hehpihna hun hon hong in, tua hun a tunma a dan-thupiak in a nasep tuh mite ‘dan-thupiak nuai a hen’ leh ‘khakkhum’ ahi a chi hi. ‘Hen’ Grik ah ‘pharoures’ hi a, tua bel ‘suangkulh tang’ chihna a hi. ‘Khakkhum’ kichi pen ‘sunkleo’ a kipan kila hi a, t.22na a khelhna nuai a ‘koih’/‘koltang’ chi-a kilet toh thumal kibang ahi hi. Hiai thumal nihte a gen uh kibang in, suangkulh sung a khum a chahbi kalhkhum bang in dan-thupiak in mite khum bichilh mahleh, Khrist a ginna in hon suakta sak hi.

T.24na & 25na ‘Huchiin dan tuh ginna tungtawn a siamtansak a i om theih nadia, Khrist’ kiang a hon piitu dia enkoltu a koih a-om ahi hi. Himahleh ginna a hongtun nung in bel, huai enkoltu nuai ah i om ta kei uhi’ Dan-thupiak...‘Khrist kiang a pitu dia a chih toh kisai gendan tuam zek om hi. Khenkhat in ‘Khrist a hong pai mateng a hon kem/enkol ding in’ chihna dan in khia ua, tua bel t.25na toh ki zawitawn mahmah hi. Adang khenkhatten bel, dan-thupiak a pan mite chinglah ahi uh chih kiphawka, Khrist kiang lam naihna genna dan in khia uhi. Thukhunlui hun a kithoihna tuamtuam omte tungtawn in mite’n Pathain zahngaihna mu ua, tua kithoihnate in Khrist tatna ziak a siamtansakna ensak a hih man un, dan-thupiak in mite Khrist kiang tun hi chi uhi.

Hiai ah enkoltu-hihna/kepna-na Grik ah ‘paidagogos’ ahi. Tua hunlai in mihauten naupang enkoltu/kemtu ding sikha/sila nei ua, amau a etkol sung uh a kul leh vua in sat thei uhi.3 Paul in dan-thupiak nasep pen tua bang a hi chi hi. Enkoltu in a tawntunga naupang tung a thuneihna nei denlou a hih bangin, dan-thupiak in zong hon len den lou hi. Ginna hongtung a chih Jesu Khrist genna hi a, Kross tung a tatna nasep hang in mite’n siamtansakna ngahta uhi.

II. Pathian Tate (Children of God) 3:26 - 29: 

T.26na & 27na ‘Khrist Jesu ginna jiak in Pathian’ tate na hivekta uhi’ Paul in hiai a a genchet nop tuh, nidang a dan-thupiak nuai a saltangte, tuin Khrist tatna ziak a suahtaksak a om in Pathian toh kilem in, nidanglai pek a thuchiam omsa bang in gouluahte a hita uhi chih ahi. Juda hi’n Jentel hitaleh, tuin amaute Khrist Jesu gintakna tungtawn in Pathian tate ahita uhi chi hi. ‘Na lak ua Khrist a baptis a om peuhmahte tuh Khrist in na kithuamta ngal ua’. Hiai t.27na a Paul in baptis chih thumal a zatdan chi nih dan in kilang hi. (a) Sunglam a Khrist toh kizopna – Khrist a pianthakna genna leh (b) Khrist toh Khalam kizopna genkhiatna polam muhtheiha a taktak a tui zang a baptisna ahi. Hiai omdan tuh, kuapeuh Khrist toh hinna kizoma, hihlamdan ahonghih chiang un dinmun thu ah Khrist toh sikhawm, vuikhawm leh thoukik khawm, hinna thaka ahin ding uh chihna a hihi. (Rom.6:3,4; Gal.6:15) Huan, Khasiangthou in Khrist toh a kizopsakte Khrist diktatna puan silh a kithuamte hi ua, Pathian mai a mohpaih a om khak ding lauhna himhim om nawnlou hi.

T.28n & 29na. ’Huai ah tuh Juda hiam, Grik hiam, sila hiam, zaleen hiam leng a-om sam kei a... Khrist Jesu ah na vek un khat na hi uhi’ Hiai ah dotna omthei tuh, mi khristian ahong hih chiang a ahihnate- anam, dinmun, numei hiam pasal hiam ahihnate bei vek a hi diam? chih ahi. Hiai bangte genna hilou in, kizopna thak khat sung a pumkhat hihna hon piangsak in, hiai kideidanna jiak a siatna leh khelhna om peuhmah a beisak chihna a hi zaw hi. Paul hunlai a Khristiante phutkhak nak mahmah thum om hi. (a) Chi-le-kuang thu a kideidanna lian mahmah hi. Judaten Jentelte, mikhial zeksumlouh leh dan-thupiak neilou chiin simmoh mahmah uhi. Amau (Judate) bel, Pathian namtel, Abraham tate, nam siangthoute kichi in kisathei mahmah uhi. (b) Thukhunthak hunlai in Palestine leh a kim gamte ah suak leh sal a kineihna thupi mahmah hi. Suak leh sal tuh mihing bang a ngaih hilou in niam mahmah hi. (c) Paul hunlai in numei niamkoih luatna uang mahmah hi- numei tuh mihing bang a enlou in van/na khat bang in sim lel uh a, atung ah pasal in thuneihkhum lel uhi. Zingsang thumna a a loh khak zel uh tuh: ‘Pathian aw, Jentel, sikha leh numei a non bawllouh man in na tung ah ka kipak mahmah hi’4 chih ahi tel hi. ‘Khrist a na hihtak ulebel, Abraham suan, thuchiam dungjuia gouluahtute na hita uhi’ Hiai omdan bel, Jesu Khrist a ginna ziak a kizopna hoihtak neite thuchiam bang geih a vualzawlna leh gouluahtu hihna neite hita chihna a hi. 

Thukhitna leh Chiamteh tuakte: 

‘Dan-thupiak leh Pathian tate’chih thupi a nei a i kikupna tungtawn ua chiamteh tuak tampi omte lak a poimoh diak nihte tuh: 

Dan-thupiak in mihingte chinlahna theisak a, mi tengteng khial hihna hon kiphawk saktu ahih man in hotdamna ngahnang in poimoh mahmah hi. Tomchik a gen in, hotdamna i ngah theihna tuh dan-thupiak apan khelhna kiphawkna hong om a, thuchiam, Khrist a tangtun sak a om in siamtansakna hon ngahsak hi. 

Siamtansak a om eite tuh, Pathian tate, gouluahtute leh Khrist itna a phankhawm a omte hita i hihman un kihuatna leh kideidanna in eite lak ah mun nei thei nawnlou hi. Kideidanna banglai Khrist Kross thilhihtheihna toh kichimsak ta ni!!

Ahi, Khrist itna ziak a kipumkhatna Kha in, i mimal, i innsung, i veng sung leh gamsung ah A deih bang tak in nna hong sem leh i chi mahmah hi. Amen!

1 William Barclay, The Daily Study Bible, The Letters to the Galatians; (Theological Publications in India, Bangalore, 1976). P.29

2 Alan Cole, Galatians, An Introduction and Commentary, (London, the Tyndal Press, 1969) p. 106

3 Kenneth Barker, The NIV Study Bible, Galatians;( Zondervan Publishing House, Grand Rapids, USA, 1995). P.1785

4 William Barclay, The Daily Study Bible, The Letters to the Galatians; (Theological Publications in India, Bangalore, 1976). P.32