Thupi : Dan in hon hamsiat a, himahleh ginna in hon hingsak hi (The law curses us, but faith makes us alive)

Thumapi: Hoihbukimna hiam Dan zuihkim sipsipna ziak a a hotdamna ngah ding hileh ngahzoulou ding i hih lai a itna leh lainatna a kidim i Pa Pathian in A Tapa Jesu Khrist tung tawn a tatna hon bawl, baihlamtak a ginna tungtawn a ngah theih dia hon luikhiaksak man in a hon it, hon hehpihtu i Pa Pathian min i phat hi.

Judaizerte’n Galatia Saptuamte naktaka lungbuaisak uh (t.1) ‘…kuan hon bumhai a maizen a...’ a na chih hial a hih man un, hiai buaina hih veng teitei tupna in Dan leh Ginna toh kisai hiai i tangteel sung ah leng hon gen thak nawn hi.

I. Dan Hamsiatna Nuaia Omna. (3:10-14):

T.10na. ‘Dan zuihna a kinga peuhmah zaw hamsiatna nuai ah a-om uhi’

Paul in hiai ah amah douten a thupi ngaih penpen uh, Mosi Dan pansan in amaute nialna hon bawl hi. A tung a t.6na ah Gen.15:6 na a pansan a, t.8na ah Gen.12:3na pansan nawn hi. Judate’n Laisiangthou ngaihsaklou leh zuilou mite tuh hamsia nuai a om ahi uh (Jn.7:49) chih a ngaihdan uh hi bilbel ahih lai in Paul in dan-laibu zuih sawmna in vualzawlna hilou in hamsia tun zaw hi a chi hi. ‘Dan laibu a thu kigelh tengteng zui gigelou peuhmah zaw Pathian’ hamse nuai ah a-om uhi!’ a chi hi. Dan thupiak in hoih bukimna a ngiat ziak ahi (Jak. 2:10,11). Dan thupiak om ma-a khelhna om khin; mikhialsa in dan thupiak zuihkim thak theih hilou hi.

T.11na. Paul in, ‘Mi diktat tuh ginna in a hing ding’ chi’n hotdamna toh kisai Thukhunlui, Habakuk 2:4, pansan in hon hilhchian hi. Rom. 1:17 leh Heb. 10:38 ah leng kilasawn hi. Pathian hamsiatna, hehna leh thangpaihna a pan suahtak theihna lampi omsun tuh Pathian zahngaihna, Khrist Jesu sihna a om, tua Khrist tatna pansan a mi Pathian kiang a pai thei leh thupiak bang a tehna ah diktansak in a om ding hi.

T.12na. ‘Himahleh, dan tuh ginna a kinga ahi kei, ‘Dan in a ngiat hih peuhmah huaite in a hing ding’ chih gelh a hi zaw hi. Hiai a ngaihdan om thei tuh, Paul in Dan-thupiak himhim hoihlou vek chi a hi diam? Hilou hial, Pathian deihsakna ngahna ding in dan thupiak zuih zohna pen ginna tungtawn a Pathian hehpihna neihna lampi toh kibang lou hi a chihna hi zaw hi. Dan-thupiak pen a hoihlou hilouin, hoih mahmah leh siangthou bukim Pathian hihna leh deihna latsakna ahihman in huai a zuikimten bel Pathian deihsakna ngah ding mah a hi uhi (Rom. 7:12; Lev. 18:5). Tuabang hitamahleh, mihingte a khialsa a piang i hihna ah hiai dan-thupiakte zuizoulou i hihman in, hiai dan-thupiak in kuamah hondam theilou hi.1

T.13na. Hiai ah Paul in Khrist nasepna ziak a tatna omthei phet ahihna hon genchian hi, Khrist ei sik a hamsiat in a hong om a, dan hamsia akipan in hon tankheta hi; ‘Sing a khailup peuhmah hamsiat hi hen’ chih gelh bang in. Hiai ah, thumal poimoh mahmah, Tan/Tatna kichi Grik ah ‘exagorazo’ ahi a, saltanna a pan a man pia a suahtaksakna genna ahi. Khrist in Kross tung ah tua man a na piak tak ziak in tatte i hita uhi (1 Pet.1:18,19; Nas.20:28).

Hiai ah dotna om sek tuh: Jesun kua lak a pan tankhia? Kua kiang a aman pia hiam? chih ahi. Setan kiang a pan tankhia ahihleh Setan lian zaw, thupi zaw hilou ding hiam? chih khawng ahi. Hiai a tatna kichi a ki gen chiang in thumal tuamtuam – ‘tatna’ ‘ngaihdamna’ ‘diktansakna’ leh adg.adg. kizang sek hi. Tua omdan bel, Khrist in khelhna man a piakna, dan-thupiak hamsia a pan Khrist in hon tatkhiakna genna ahi.2 Hiai hunlai a ‘sila/sikha’ a kipi leh kizat thang mahmah a, tua sila/sikha tatkhiakna-a kizang kammal Paul in hon zang hi.

T.14na. ‘Abraham tung a vualzawlnate Khrist Jesu ziak a Jentelte tung a hongtun theih a, Kha chiam ginna ziak a i muh theihna ding in.’ Paul in hiai ah, Khrist in dan-thupiak hamsia apan hon tatna ziak tuh Abraham kiang a Pathian in a chiamsa vualzawlnate (Gen.12:2,3), Zentelte kiang a a tun theihna ding ahi chi hi. Hiai om dan tuh Jesu Khrist a hotdamna a khonung lam pek a hong piang tawm himawklou in Mosi dan-thupiak omma tham a pan Pathian thilgel a na omkhin a genna ahi hi.

II. Dan leh Thuchiam. (3:15-18):

T.15na ‘Unaute aw, mihing hihdan gen leng, mihing thukhun lel leng, hihkipsa nung a phelkik kei ua, behlap leng a behlap ngeikei uhi’ Paul in Galatiate a deihsakna leh itna latsakna in kamsuak khauh sim a zat hun om mah leh hun tamzaw ah kamnemtak ‘Unaute aw…’ chih bang zang sek hi (Gal. 3:15; 4:31; 6:1; adg.adg). Hiai ah thumal haksa sim pi ‘thukhun’ Grik ah ‘diatheke,’ hon zang hi. Hiai in gen nih neithei hi.

Khatna, Innsungpa a sih dek kuan chiang a a innsungthu- gou, neih leh lam thu a sih nung chiang a nawngkai lou a zek a hih theihna dia zek didan a genkhiakna ahi.

Nihna, Mi nih/ pawl nih kal a kilemna dan a thu kikhung (convenant, agreement). Abraham hun lai mite’n thukhun bawl chih ngai poimoh mahmah uhi. Hiai bang thukhun a bawl chiang un a hihkipna dan in gan gou in sisan suah in hih zel uhi. Eilawi hihdan toh leng kinaih mahmah leh kilawm hi. Tua a sa-goh uh a kikim a phelkhap in munkhat ah a kikal apaitheihna ding awngsak in a phel lam kingat in a siklam in tung uhi. Thukhun khung dingte tua saphel kikal ah ding kawm in a thukhun uh puangkhia uhi. Gen.15 a Pathian in Abraham kiang a a thukhun uh zong tua bang deuh hi ding hi.

Abraham kiang a thuchiam bel phut omlou a chiam (unconditional promise) ahi. Abraham kiang a thukhun kikheng loua omden ahih bang in Ginna ziak a Diktansakna leng kikheng lou a omden ahi chih a genna ahi.

T.16na ‘Abraham kiang ah leh a chisuan kiang ah thuchiamte piak a na hi… Hiai ah Paul in laimal poimoh ‘chisuan’ chih hon zang a huai bel mi tampi kawk loua mikhat kia kawk, huai tuh Khrist chihna ahi chih hon hilh hi. Ahihhang in hiai ‘chisuan’ Grik ah ‘sperma’ a hi a, mi khat kawk hilou in a ban geiha a suan-le-khak a kawk a, ‘chisuante’ in a nung lama khang sawnsawnte a kawk hi. Paul in hiai thumal, ‘chisuan’ chih mundang a a na zat chiang in leng khang sawnsawnte genna in zang sek hi (Rom.9:6-8). Galatia laibu a i sinna ah bel Paul in ‘chisuan’ chih a zatna ah Jesu Khrist a genna hi a, ‘chisuante’ a hih chiang mi tampite genna dan a zang ahi chih a chiang hi.

T.17na ‘Kum zali leh sawmthum nung a dan hongom in thuchiam bangmahlou suaksak ding in huai dan a-om ma a, Pathian in a namkipsa, thukhun a nulmang thei kei hi.’ Hiai a Paul in kum 430 nung a... chi-a a na gen toh Israelte Aigupta gama a saltan sung uh a hong kibang geih hi (Ex. 12:40). Hiai hun mundang a a kigenna ah a geih genlou in a vel gen in kum 400 kichi hi. (Gen. 15:13; Nas. 7:6). Hiai thuhaksa Bible sut khenkhat in nawlkhin sukmai mahleuh, khenkhatten bel Jacob leh a suanten Palestin gam nusia a Aigupta a lut ua ‘Thuchiam Hun’ bei a, tua thuchiam hun bei nung kum 430 chihna ahi. Huai tuh Aigupta gam a a saltan sung mah uh ahong suak hi chi uhi.3

Dan- thupiak pen Pathian thilgel leh tup a a thupipen hi zaw lou in, thuchiam hun leh a buchin hun, hehpihna hun kikal a thukalzeh pian a om lel ahi zaw hi. Thuchiam hun pen hehpihna hun toh hong kizomtou ahi. Dan-thupiak pen Khrist-a hih bukim leh hih bei a hita hi. Tua ziak in tulai a Khristiante Abraham tate diktak a hi chi uhi.

Pathian in Abraham leh asuante thuchiam tungtawn a a vualzawl leh tua nung a hong piang dan-thupiak in tua thuchiam beisak a bangmahlou suaksak theilou ding hi. Dan-thupiak in Pathian hotdamna lampi gelsa lamdangsak theilou hi.

T.18na ‘Gouluahna tuh dan zuih ziak hileh, thuchiam ziak ahita kei hi; himahleh Pathian in Abraham kiang ah thuchiam in hiai tuh a na peta hi.’ Hiai ah Paul in thumal poimoh mahmah nih a na zang hi. ‘Gouluah’ chih thumal hon zat Grik ah ‘kleronomia’ a hi a, thuseh hihkipna omsa a na om khitman a hiai hamphatna kitang genna ahi. Thumal poimoh nawn mahmah tuh, ‘Pia’/ ‘Peta’ Grik ah ‘kecharistai’ a thawn a piak (given freely) ahi4. A hun thu ah en leng buchingsa (perfect tense) hi a, hotdamna khatveia setden dia thawna piak a om kichetna hoih mahmah ahi hi. Dan thupiak zuihna ah kinga le bel pai toutou a a tawp a ngah theih phet hi ding hi. Abraham in ginna tungtawn a vualzawlna a ngah bang geih in en leng ginna tungtawn mah in thawnpiak vualzawlna i ngah hi.

Thukhitna leh Chiamteh tuakte: Israel nam tungtawn a Pathian kilakna phungpi Abraham hi a, tua Abraham in dan-thupiak zuik ziak hilou in ginna tungtawn in Pathian diktansakna a ngah hi. ‘Dan in mite Hamsiat mahleh, Ginna in mite Hingsak hi.’ Tua banggeih in ahi eiten leng A hehpihna ziak a, ginna tungtawn mah a siamtansakna i ngah tak uh.

Abraham kiang a thuchiam, ngiat omlou a chiam (unconditional promise) hi a, tua thuchiam kikheng lou a omden ahihbang in Ginna ziak a Diktansakna thuchiam leng kikheng lou in omden hi.

Tua ahihman in lungsim hon khamuangsak mahmah, lungsimtawng a kep gige ding leh bah hun a leng hon suhaattu a zat gige ding tuh, i lamet thugin linglou in i pomkip ding uh, thuchiampa lah a muanhuai ngal a, (Heb. 10:23) chih ahi. Ei hihtheihna hilou, thuchiampa muanhuaina a hi i bitna. Amen!

1 Brian Wintle, South Asia Bible Commentary (Udaipur, India, Open Door Publication, 2015) p.1623

2 Guthrie D, New Bible Commentary, (Michigan, Grand Rapids, Inter-varsity Press, 1970) p. 1098

3 Alan Cole, Galatians, An Introduction and Commentary, (London, the Tyndal Press, 1969) p. 102

4 ibid