Text : Galatiate 2:11-21

Thumapi: Covid-19 hiipi ziak a patauhna liantak, i khovel in a phutkhak lai a leng A thutak sinkhawm theihna ding hunlem hon piak lai man in i biak Pa Pathian tung ah kipak petmah in thupina tengteng Amah i pia masa uhi.

India gam a Saptuamten leng tuni tan a a na buaipih uh, nam sang leh nam niam kal a kideidanna a na hi ngitnget hi. Khristian kichi vek mah le uh, tuni chiang tan in leng Biakin khat a bekhawm theilou lai uhi. India saptuamte tuah bangbang, Saptuam masa ten zong a na phukha nak mahmah uhi. Juda kulmut Khristiante leh Zentel Khristiante kal kideidanna in Paul leh Peter nasan kitauhtuah sak in, ngaihdan kibatlouhna ziak in, a langtang a kinialna, a deihhuai hetlou hong piang khe hial hi. Hiaihun ah Paul’ thudik gum a a pan ngamna in Saptuamte (Juda-Zentel) sung buaithei ding a om lai, buaina pumpelh in hong om hi. Paul in Peter, a ma sang a senior zawtham a diklouhna, a taihilh ngamna in, Sawltak lian (apostle) ahihna leh thuneihna langkhe sak in, kinamkip semsem hi.

I. Paul leh Peter Kinialna. (2:11-16):

T.11na & 12na. ‘Peter tuh Antiok khua a a hong pai lai in demhuai mahmah a a hong om ziak in a maitang ah ka nial hi’’ Bangchik hun a Antiok a Peter hoh hiam chih a chiang kei. Himahleh Paul, Barnaba leh Titas Jerusalem a pan a kik nung uh, Galatia gam a va phak nung ua thil om hi ding a gintak ahi.1 Barnabas leng Antiok Saptuam heutu a a pan lellel lai hi ding hi.

Peter in Antiok Saptuamte toh hun bangtan hiam zangkhawm, Juda Khristian leh Zentel Khristiante toh ankuang umkhawm zel uhi. (Nas.10:28; 11:3) ‘Ankuang umkhawm/ an nekhawm’ (Grik ah ‘sunesthian’) Khristiante kithuahkhawmna ankuang, itna ankuang (Agape/ Love Feast) umkhawmna hi a, hiai in Toupa Ankuang Siangthou leng huam thei hi.2 Peter in Juda leh Zentelte kikal kideidanna a diklouh dan thei mahmaha bawllem tupna toh Antiok Zentelte lak a ne-a dawn hi ngei ding hi. Hitamahleh, Jerusalem a pan pawl khat hongpai amuh chiang, thutak gum ngamlou in kizuk kik maimah hi. Tua hang in a hi Paul in ‘demhuai/ mohsakhuai’ a chihna. Hiai ah demhuai/mohsakhuai kichi Grik ah ‘Kategnosmenos’ ahi a, kiteltak a diklou/diklou chiang mahmah chihna ahi. Peter in Juda Khristian leh Zentel Khristiante kala kideidanna omlou ahi chih a theihsa, a pomsa hi a, tua bang a Thutak ading kip ngamlou a a omna in Paul lungtang suna mahmah a hih man in Jerusalem saptuam a heutu lianpen himahleh a maitang ah chikhe guap mai hi. Sikha numei kihtak man a Toupa tawpsan pan, hiai ah leng Zeksum pawlte kihtak man in pukse kha nawn hi.

T.13na & 14na. ‘Juda dangte leng a lepchiah chiat sam ua, huchi in Barnaba hilhial leng a lepchiahna uah pimang in a om zou hial hi.’ Hiai a a poi mahmah tuh, Peter nungtolhna in midang tampite a nungtolh sak a hi. Paul in hiai a a muh chiang mahmah tuh, mi toh kituah sawmna ziak a Pathianthu daulak (theological compromise) a lauhhuai dan ahi. Peter in Zeksum pawlte lauhna ziak a a omdan masa langtang tak a, Antiok Saptuam mivantang muh a hiai bang a a omguih pen, vantang lak mah ah a hoihlouh dan hon genkhe phut mai hi. Peter sukzahlak tupna hilou, a sukkhak tampi ompahte, ‘Juda dangte leng a lepchiah chiat sam ua, huchi in Barnaba hilhial leng a lepchiahna uah pimang in a om zou hial hi,’ kintak a bawllem poimoh ahih ziak a hi zaw hi. Antiok Saptuam kipumkhatna hihsiat a om a, nih kisuah theih ahihna mukhawl mahmah in kin tak in pan la pah hi. Mite gensiat leh muhdah ding lauhna ziak hiam, alehlam ah, mite maipha zonna leh phatna lohtak utna ziak a Pathian Thutak kemtu muanhuai i hihna zuak khiak khak ding alauhhuai e!

T.15na & 16na. ‘Eizaw Zentel mikhialte hilou in, Judami him a piang i hi uhi.’ Hiai ah Paul in Zentel Khristiante kiang hilou in Juda Khristiante kiang a a gen ahi. Atangpi in Judaten Zentelte a gen chiang un, Zentel mikhialte a na chi sek uh ahih man in Paul in leng hiai thumal hon zang hi. Pathian thukhun toh kisai a Zentelte Juda nam toh genkak ahih chiang in Zentel mikhialte kichi a, alangkhat ah Judate ahih leh a hamphatna uh, Pathian kilakna tunna, namtel hamphatna tuamtuam ngahte hi uhi. (Rom.3:1-2; 9:4-5).

Tua bang hitamahleh, hiai hamphatnate Pathian mai ah diktanna ding in kiching zou lou hi. Himahleh dan thilhihte ziak in mi siamtang in a omkei hi, Jesu Khrist ginziak kia in siamtang in i om zaw uhi. Hiai a ‘Siamtangsak/Diktangsak’ chih thumal hiai t16 kia ah leng Paul in thumvei tak honzat in, thumal ‘poimoh mahmah, laikhak in a tup pipen kikhaikhawmna’ ahihna langsak hi.3 Grik ah ‘dikaioo’ huai bel ‘moh lou’ chihna, thukhenna mun (court) a kizang kammal kilasawn ahi. Mohlou chi a Pathian in hon phuan theih pen i hoihna (bang hiam thilhoih i sep) ziak hiam hi hetlou in, Pa thil thawnpiak ahi hi. ‘Hehpihna ziak a ginna tungtawn a hotdam na hi uh; huai leng noumau a suak ahi kei a, Pathian thil thawn piak ahi.’ (Ephes.2:8)

T.17na - 19na. ‘Ahihleh Khrist a siamtang a om i sawm lai a, eimah ngei leng mikhialte i na hih ngal uleh; Khrist tuh khelhna nasempa hive maw leh? Hilou hial!’ Hiai a Paul in a genchiang nop mahmah tuh, mihing a dikloupi, a siamloupi mah Pathian in dik a a na sang hi. A dik hetlou mihing pen Pathian in Khrist toh kipumkhat sak a, sunglam kikhekna (transformation) hong piang in, Khrist a thilsiam thak, piangthak hong hi ta hi. Nidang a hindan lui khelhna lak a va lut kik a, ut bangbang a gamtat ding chih pen hithei nawnlou hi. (Jn.3:8; 2 Kor 5:17; Gal 6:15).

Paul in, ‘Thil ka hihsiatsate...’ a na chih omdan tak tuh, Dan-thupiak zuih hang a hotdamna ngah sawm a kulmut tak a a na pan dante, a diklouh dan Khrist kilakna tungtawn a muchiang a, a dik ‘ginna tungtawn a hotdamna’ hon pom zawkna, a ngaihdan lui a na hih siatsa hih nawn thei vual ahihlouh dan (once-for-allness) gen chiang hi.

‘Pathian adia ka hin theih nading in, keizaw… dan lam ah ka sita hi.’ Dan-thu zuih ziak hilou, pum hoihna ziak hi sam lou, Pathian hehpihna ziak a ginna tungtawn a hotdamna om a hihna muchian lua a hih taak man in, hiai ah Paul in a thugin a kip leh muanhuai a hihna taklatna in dan lam ah ka sita chi hi.

T.20na & T21na. A tung a kigensa te poimoh lua mahmah ahihna ah Paul in hiai ah hon genchian thak thak hi. ‘Khrist toh kilhden in ka omta a, ka hing nawn takei hi; himahleh Khrist tuh keimah ah a hing a; tua sa a ka hin bel, kei hon-iit a, kei sik a hong kipia Pathian’ Tapa ginna a hing ka hi hi.’

Paul in, nidang a thupi a kisakna — Mosi dan sinsiam, tua dan adia kulmut tak a pang a zui zou pen khat ahih ziak a thupi a kisakna, hihthei a kisakna, chingzou a kisakna khempeuhten hondam theilou ahihna phawk khia in, tuate kros a Khrist toh kilhkhawm ahihman in sivek ta hi. Tua ahi Khrist toh ‘kilhbelhkhawm ka hi’ a hon chihna. Khrist toh kilhbelh a om a si mang mai hi lou in, Khrist ah hinna thak hon nei in, tua hinna thak bel amah (Paul) deihtelna bang a hinna hinawn talou, Pathian deihna toh kituak a hinna ahi zaw ta hi. Nidang lai lungput, dan-thupiak, hihding, hihlouh ding chihte beita, ‘kei sik a hong kipia Pathian’ Tapa ginna a hing ka hi hi’ chi theita hi.

Thugin poimoh tak i na neih, ‘ginna ziak a diktanna/siamtansakna’ Pa Pathian hehpihna ziak kia a i na tan uh ahih dan, a mah nialkalh pawl (Judaizerte) dawnna dan in hon genchian nawn in, ‘Pathian’ hehpihna tuh bangmahlou in ka bawl kei, dan ziak a diktatna hong om hile bel, Khrist a thawn a si a hi ding,’ chi giap hi. Dan-thupiak zuih ziak a diktatna ngah hileh, hotdamna i chih mihingte sepkhiak, lohkhiak theih chihna hi ding a, Khrist sihna a mawkna suak ding hi.

Thukhitna leh Chiamteh tuakte:

Peter in Juda Khristian leh Zentel Khristiante kal a kideidanna omlou ahi chih a theihsa leh, a pomsa a hih lailai a leng Thutak lepchiah san kha mawk, poimahmah. Mite gensiat leh muhdah ding lauhna ziak hiam, alehlam ah, mite maipha zonna leh phatna lohtak utna ziak a Pathian Thutak kemtu muanhuai i hihna zuak khiak khak ding alauhhuai e! Juda dangte leh Barnaba hilhial leng lepchiahna a pimang a om zou hial bang in heutu khat ginomlouhna in Saptuamte naktak in hihliam sek hi.

Hiai thil deihhuailoute Paul in a muh phet in, ‘awl in Peter kihilh na ve’ chilou in, tamtak suse thei, kangse thei ahihna phawk in, thudik kemtu muanhuai ahihna latsakna in Peter hihkhelhna genkhe miahmiah mai hi. I tulai hun ah leng Paul bang bang Khrist sepaih hangsan leh muanhuai heutu i poimoh ngei mai!

Mohlou chi a Pathian in hon phuan theih pen, thil thawnpiak tengteng lak a lianpen leh manpha pen a na hi mahmah hi. Mihinglui hihna tengteng Khrist toh kros a kilhbelh a omta, Khrist a hinna thak a hingta, tua hinna thak bel mahni deihtelna bang a hinna hi nawn ta lou, Pathian deihna toh kituak a hinna ahi zaw ta hi.

Simtu deihtakte aw, i Toupa deihna bang in ‘Juda - Zentel a kikhentuamnate, namniam namsang, a-zawng a-hau, hiai-pawl huai-pawl’ chi a kikhentuamna tengteng koih mang a, Khrist a thilsiamthakte bang a - dialdial leh diamdiam thei ding in A Khasiangthou pina leh makaihna deihhuai tak eite a hong hi tawntung ta hen, Amen!