Saptuam in tukum thupi in “PATHIAN POMTAK BIAKNA” chih i zang uh a, manpha mahmah hi. Thugelh tampite, Pulpit thugenna, leh kisinsakna khenkhat hiai thupi pansan a zat ahihnung in bukim mahmah ding bang mahleh khatvei enkhawm lai le chi in hiai thupi ka hon tel hi.
“BIAKNA” THUMAL GEN-CHETNA:
“Biakna” thumal Thukhun Lui ah [Hebru pau in] “shachah” kichi hi. Huai tuh zahtak latsakna a lu ‘kunsuk’ hiam ‘bokkhup’ chihna ahi [Gen. 22:5; Exo.4:31]. Thukhun Thak ah [Grik pau in] “proskuneo” thumal kizang hi. Huai bel zahtakna toh mikhat ma a ‘bokkhup’ hiam ‘a khut/khemuk tawpsak’ chihna ahi [Jn.4:24]. Thukhun Thak laibute ah hiai thumal 59vei kimu hi. Hiai thumal kikimpih bang a Paul in a zat [Grik pau in] ‘leitourgia’ ahi [Rom.12:1]. Huai tuh “midangte nna sepsak” [public service] chihna ahi. Sappau a ‘biakna’ thumal kikimpih ahihleh “worship” chih ahi. Pau-upa ‘weorthscipe’ apan kilakhia ahi a, ‘worth’ leh ‘ship’ kigawm, huai tuh ‘zahtak’ ding leh ‘lauh’ ding a phu genna ahi [Kil.5:12-14]. Hiai thumalte apan i muh theih om tuh kuahiam ‘zahtak huai’ leh ‘lau huai’ sa a mi’n a lu a ‘kunsuk’ hiam a ‘bokkhup’ chiang in huai tuh “biakna” kichi hi. Huaiziak in, “biakna” a kigen chiang in thil nih sukhapah hi. Khatna ah, sunglam a lungsim leh hinna sukha zahtakna, lauhna, leh kiniamkhiakna om ding, leh Nihna ah, huai sunglam a thiltung om tungtawn a polam a muh theih banghiam nna hong kisemkhia om ding, chih ahi. Nasep tellou lungsim sung a zahtakna, lauhna leh kiniamkhiakna kia “biakna” a kichi thei kei ding a, huchi mah bang in, polam thilhih leh nasep kia leng “biakna” kichi thei lou ding hi.
PATHIAN BIAKNA:
Mi’n amah lungsim, hinna leh kha a kiniamkhiakna, zahtakna leh lauhna toh Pathian ma a thilhih/nasep hon neih chiang in huai tuh Pathian biakna ahi. Pathian biakna tuh khalam hinna nasep leng ahi. Sunglam a khalam thiltuah polam a hong kisemkhia ahi [Jak.2:26]. Toupa Jesu’n, “Pathian zaw kha ahi; a bemite’n kha leh thutak a a biak ngeingei ding uh ahi” chi hi [Jn.4:24]. Huai tuh a betu leh biak a om pen kizopna genna ahi.
THUKHUN LUI HUN A PATHIAN BIAKNA:
Thukhun Lui hun in ‘biakna’ in mite hinna zelsuak hi. Puanbuk ah Pathian va kilak zel a, mipite’n puanbuk ah Pathian be zel uhi. Huai puanbuk kim ah Siampute leh Levite om uh a, amau zom in Israel nam tuamtuamte puanbuk kimvel ah teng in khosa uhi. Puanbuk in thil khempeuh ah a lailung luah hi. Sep leh bawl, leh khotang kikepna peuhmah Pathian biakna nasep toh kizom vek hi [Lev. 1-7]. Jerusalem a Temple hong dinkhiak nung in Judate’ Pathian biakna munpi hongsuak hi [Jn.4:20]. Pathian biakna nasep tengteng Temple ah saivek ahi. Huaiziak in, Zawlnei Daniel in mun gamlapi a om himahleh, Jerusalem lam nga in thumna nei gige hi [Dan.6:10]. Himahleh, hun hong paizel a, a biak Pa uh sang in a biakna nasepte uh hon awlmoh zaw uhi. Pathian sang in biakna nasepte’n mun poimoh luahzaw hi [Mikah 6:8; Is.29:13; Mat.15:8,9].
THUKHUN THAK HUN A PATHIAN BIAKNA:
Thukhun Lui hunlai mah bang in Thukhun Thak hun ah leng biakna nasepte’n mite’ lungsim leh hinna luahdim hi. Atangpi’n, Pharisaite’n a kilangkhia thilhih leh dan zuihkimnate biakna dik hi’n a ngai uhi. Himahleh, Jesu’n Samari numei kiang ah “biakna” kichi bangchi bang hi hiam chih kimtak in hilhchian hi [Jn. 4:7-26]. Polam kilatna leh dan zuihkimna kia in biakna diktak pe thei lou hi [Mat.5:20]. Sawltak Paul in Romte 12:1 ah Pathian lungtuak biakna tuh sapum kilatna ahi, chi hi. Huai bel nasep thilhih tengteng a vek sipsip a Pathian adia piakkhiakna genna ahi [John MacArthur]. Pathian lungtuak biakna tuh khatvei thu a zohpah ding thilhih ahi kei a, ni teng leh hun teng a hinkhiakpihna ahi [Kol.3:17; Lk.9:23]. Gingtu masate’n bangkim kikop in, ni teng in, lungsim munkhat in Pathian biakin ah, sawltakte’ sinsak in, kithuahkhawm in, tanghou balkham in, thum in phatuamngaitak in om uhi [Nas.2:42-46]. Pathian a phat ua, mi tengteng kipahlam in a om uh, a chi behlap lai hi [2:47]. Huai tuh gingtu masate ‘biakna’ dan ahi.
TULAI HUN A PATHIAN BIAK DAN TUAMTUAM:
Tulai a Pathian biakdan tuamtuam omte chi 5 in khen theih hi [Perspectives on Christian Worship].
1. Liturgical Worship- thugin toh kituak biakna hun a pai dingdan leh hih ding teng [etsakna- thumna, bible tangtel, thugen, leh a dangdang] gelhkhiaksa zui a biakna genna ahi.
2. Traditional Evangelical Worship- gelhkhiak vek hi sese lou, hilele paidan zuih khat nei a biakna ahi.
3. Contemporary Worship- paidan mumal neilou kichi, hilele pitu paipih bangbang [etsakna- tumging leh thomging ngaihpi toh] zui a biakna genna ahi.
4. Blended Worship- a tung a no.2na leh 3na [traditional & contemporary] gawmkhawm a biakna ahi.
5. Emerging Worship- thil thak khatpeuh kipahpihna leh huchi bang thilte khamitna a ngai biakna genna ahi. Thugin kingakna mumal neilou, mahni lungkimna ding zong a biakna ahi pen mai ding.
PATHIAN ‘POMTAK BIAKNA’:
Pathian ‘pomtak biakna’ bangchi bang biakna hi hiam chih i theihsiam sem na ding in Pathian pomtak louh biakna khenkhat i en masa ding.
1. Theiloupi a biakna (ignorant worship): Pathian hihna tak thei lou, huai tuh, Pathian toh kizom loupi a biakna Pathian in pom thei lou hi [Jn.4:22; Nas.17:23]
2. Lei kia a biakna (tongue worship): Lungtang, hinna leh kha sukha lou biakna tuh lei kia a biakna ahi. Pathian lauhna leh a thumanna tellou biakna tuh Pathian pomtak biakna hilou hi [Mat.15:7-9; Lev.10:1-11].
3. Mahni deihdan a biakna (will worship): Biak a ompen deihdan leh amah lungkim nang hilou a betu lungkimna leh utdan a biakna genna ahi. Huchi bang biakna tuh Pathian pomtak hilou hi [Mat.15:3; Kol.2:23; Kumpi Uzziah- 2Kron.26:16-20; Ananiate nupa- Nas.5:1-8].
4. Lungput diklou toh biakna (worship with wrong attitude): Pathian tak bia hinapi lungput diklou toh biakna Pathian in pomlou hi [Malaki 1:7-10; Amos 5:21; Isa. 1:11-15; Mat.5:22-24; Pharisaite biakna-Mat. 23:1-33].
5. Pathian tak lou biakna (false gods worship): Pathian tak hilou, pathian dangte khatpeuh biakna tuh Pathian in zathadah mahmah hi [Exo.34:14; Job 31:24-28; Hab.1:15-16; Rom.1:21-32].
Tuin, Pathian ‘pomtak biakna’ bangchi bang biakna hi ding hiam chih tomchik in i gen ding.
1. Kha leh thutak a biakna ahi (Jn.4:24): Pathian tuh kha ahi a, a bemite’n kha leh thutak a a biak ngeingei ding uh ahi. Hiai ah Pathian biak dingdan genkhiakna kimu hi. Khatna ah, kha a biak ding chih ahi a, huai bel hinna sukha, lungsim leh pumpi a Pathian zahtakna, lauhna leh kiniamkhiakna tungtawn a biak ding genna ahi. Nihna ah, thutak a biak ding chih ahi. Hiai in biak a om Pa leh a hihna a kawk hi. Jesu Khrist thutak ahi a [Jn.14:6], Khasiangthou thutak kha ahi a [Jn17:17], Laisiangthou Pathian thutak ahi [2Tim.3:16]. Jesu’n amah tawn lou a kuamah Pa kiang tung lou ding ahihdan Jn.14:6 ah gen hi. Huai thutak, Jesu Khrist, tawn a biakna tuh ‘pomtak biakna’ ahi. Kha a biakna leh thutak a biakna a kikhen theilou ahi.
2. Sapum kilatna ahi (Rom.12:1): Sapum kilatna i chih ei lam a bangmah sit nei lou a bangkim piak khiak ding genna ahi [John MacArthur]. Huchi bang biakna tuh ‘khalam biakna’ ahi chi’n Laisiangthou in hon hilhchian hi [12:1b]. Eimah utdan leh nopsakdan tan lel a biakna hilou a i biak Pa’ deihdan zui a biakna tuh ‘pomtak biakna’ ahi. Huchi bang Pathian deihdan biakna bel kithoihna (ritual rites) leh paidan ngeina (tradition) khat sukbuchinna lel ahi kei a, eimah utna tan hiam nopsakna tan hiam lel leng ahi kei. Huai sang in, thumanna hinkhua bang [1 Sam.15:22], sianthouna bang [Lev.19:2; Heb.12:14; 1Pet.1:16], leh diktatna bang ahi zaw hi [Mat.5:20]. Eimah nopsakna ding leh kipahna ding zong a Pathian bia i hi kei a, biaktak Pathian ahihziak a bia i hizaw hi. Huaiziak in, Thukhun Lui hunlai bang a ganhing sisan zang a bia hi lou in, Khrist sisan ziak a, eimah sapum kilatna tuh i biakdan ding him a hong hita. Huai tuh ‘pomtak biakna’ ahi.
3. Mipi Biakkhawmna (Corporate worship): Gingtute’n Pathian i bekhawm zel uhi. Huai tuh Pathian deihdan gingtu masate hun apan kizang tou ahi [Lk.24:52,53; Nas.2:46,47]. Thukhun Lui hun in leng Judate’n Pathian bekhawm zel uhi [2Kron.29:28; Sam 40:9-10;149:1]. Ahi a, huchi bang biakkhawmnate Pathian ‘pomtak biakna’ ahih ngeingei ding ahi [Amos 5:21]. Huai ding a poimoh masa bangzah hiam i taklang ding.
Pathian Thutak genna- Mipi Biakkhawmna a poimoh pen tuh Pathian thutak simna leh genna ahi [2Tim.3:16; Heb.4:12]. Pulpit tuh kuahiam in amah ngaihdan leh gintak thu lel a genna mun ding ahi kei. Kitaina leh kisalhna hiam kipahtaktuahna mun ding leng ahi kei [2Tim.2:15;2Kor.2:17]. Aw gum lua leh kampau kilawm lou (negative words) zat kidek ding ahi. Aw ngaih ziak leh kinak kou ziak hiam, pum hangsan ziak hiam a, mite lungsim zoh ding leng ahi kei. Pathian thu hing thilhihthei in mite lungsim zou a kisikna tun ding ahi zaw hi.
Lasakna- Phatkhawmna leng a kichi. Khalam late, huai tuh Laisiangthou sinsak zui a Kha in a piak bangbang mi’n la a hon gelhkhiakte, sa a Pathian biakna hun ahi [Kol.3:16]. Michih tel theihna ahihman in latel leh a pidan ah pilvan ding ahi.
Thumna- Pathian toh kihouna, nakna, ahihman in pilvangtak a sai ding ahi. Kipahthugenna leh thuphatawina thumna, thumsakna himhim uangbawl ding ahi [Nas.2:42;1 Thes.5:16,17;2Tim.2:1f]. Deih ngetna lel a hi kei a, Pathian biakna nasep ahi.
Thilpiak- Thilpiak in Pathian i muanna leh amah i ginna ensak ahihman in Pathian pomtak biakna ah thilpiak piakna a om ding ahi. Pathian in kipaktak a pemi ahi a it [2Kor.9:7]. Pathian kipahna leng ahi [Phil.4:18] a, muhkikna leng ahi [Lk.6:38]. Thilpiak a diktatlouhna tuh pukna leh sihna ahi [Nas.5:1-12].
Ankuang Siangthou- Hih zel ding a Toupa hon thupiak ankuang siangthou ahi [1Kor.11:24]. Hondampa Khrist thuakna, sihna leh thohnawnna theih gigena leh phuanzakna ankuang ahi. Gingtute kithuahkhawmna siangthou ahi [Nas.2:46] a ngaih poimoh mahmah ding ahi.
THUKHITNA:
Pathian ‘pomtak biakna’ tuh Jesu Khrist sisan ziak a mi’n sit nei lou a bangkim Pathian adia hon piakkhiak uh genna ahi. Huai tuh khalam hinna, sunglam a thiltung polam a nasep leh thilhih a hong kilangkhia, Pathian dan toh kituak ahi. Huaiziak in, kha leh thutak a biakna tel lou, leh sapum kilatna tel lou, biakna tuh Pathian ‘pomtak biakna’ hi thei lou ding hi.
Biakna toh kisai kisinsakna tampitak i neih nung in saptuam mimal malte’n bangchi’n ‘biakna’ hinkhua i zang ua le? Ahih kei leh, bangchi bang in ‘mipi biakna’ programme i bawl ua? Bang chi’n ‘biakna’ vai khatpeuh i sai ua? chihte kidong a Pathian ‘pomtak biakna’ lankhe gige thei ding in Toupa’n simtu tengteng hon vualzawl hen.