Nahum Laibu ah Assuria khopi Ninevi tung a Pathian thukhenna hong tung ding genkholhna kimu hi. Zawlnei Jonah hun in Ninevi mite’n Pathian ngaihdamna tang uh a, a tung ua gawtna tung dingte kikhelsak in om hi (Jon.3). Himahleh, huai nung kum 100vel hong pai khit in Ninevi mite’n gitlouhna leh hiamgamna chiteng hih in kichapousak tak in hong gamtang uhi (3:1-4). Huchi bang gamtatna in Pathian thangpaisak mahmah ahihman in BC 612 in Ninevi tuh Babulon thuneihna nuai ah puklut hi. Nahum Laibu ahihleh Thukhun Lui a Zawlneineu Laibu sawmlehnihte lak a khat ahi.

LAIBU GELHTU LEH HUAI HUN A GAMSUNG DINMUN

Hiai Laibu gelhtu Zawlnei Nahum ahi a (1:1), Amah min khiakna bel (Hebru pau in) “Khamuanpa” chih ahi. Zawlnei Nahum ahihleh Elkos khomi ahi (1:1). Hiai khua koi mun a om hiam chih theihchet hi kei mahleh Laisiangthou sutmi pawl khat in Galili tuipi gei a om Kapernaum min masa hiding in gingta uhi. Nahum in Zawlnei nna a sep hun BC 663 apan BC 612 kikal vel hidia gintak ahi. Aziak bel, Assuria khut a Aigupta pukna thu (BC 663) hun paisa bang in kigen a (3:8-10), huai ban ah, Babulon khut a Assuria pukna thu (BC 612) hun hong tung ding bang in kigen hi (1:1; 2:8; 3:7). Nahum Laibu ah Kumpi kuamah min genkhak a omlouh ziak in a hunbi chiangtak a gen thil haksapi suak hi.

Zawlnei Jonah thupuak tungtawn a Ninevi mipite’ kisikna leh thumna Pathian in dawng ahi ngei ding a Assuria tuh galhat leh thuneitak a hong hi uhi (Is.37:36-38). Aigupta gamgi tanpha ah thu vanei zou uhi. Gam dangte Assuria douzou ding a thahatna nei omlou uh, kichi hi. A khopi uh Ninevi bitna khopi suahsak sawm in a umna bang feet 100 in sangsak uh a, a kimkot feet 150vel ah tui vungsak uhi. Huchi in, Pathian namtel Israel leh Judah adi’n gimneih huaipi hong suak uhi. Assuria kumpipa Sargon II hun (BC 722-705) in Israel hong dou uh a Samari khopi hong la uhi (2 Kum. 17:2-6). Kumpi Sennacherib hun in Judah hong dou nawn uh a (BC 701), Jerusalem hong la uhi (2Kum. 18-19; Is.36-37). A galmatte uh tampitak Samari leh Galili ah koihkhawm uh a huaite’n BC 670 vel in buaina tuamtuam piangsak zomah uhi (2 Kum.17:24f; Ezra 4:2). A galmatte uh tung ah hiamgamtak in gamtang uh a; naupang a matkhakte uh satnen in, nupi gailaite gil philkeksak uhi (3:10;19). A melma uh kumpi leh sepaih a matkhak chiang un nakpitak in bawl genthei uh a; a lei uh attansak in, a vun uh khokkhia in huaite khopi bang ah belh uhi. Hiai bang lawmlawm a hiamgamna leh mulkimna bei a gamtatna Pathian in koih maimai lou ding hi. Huchi in, a kumpipa uh Ashurbanipal hun (BC 626 vel) apan hong keniam hiaihiai uhi. A tawp in, Pathian thukhenna hong tung a BC 612 in Babulon khut ah baihlamtak in puklut uhi.

ZAWLNEI NAHUM THUPUAK

Zawlnei Nahum thupuak hiai ahi; Ninevi in a melmate hiamgamtak a a bawlsiat ziak in Pathian in nakpitak in thukkik ding hi (1:8; 2:8-13; 3:7-19). Pathian in amah tung a helte leh langpangte phuba la ngeingei ding hi. Assuria in a melmate tung a ahih bangbang amah tung ah hong tung ding a, Pathian in amaute hiamgamtak a vahihlum ding leh a dam sun lam tuamtuam a taizaksaktu ding sawl ding hi (3:18-19). Assuria in a melmate tung a sisan suah leh a misi luang uh kaihkhop a kipahpih bang in Pathian in amau khopi Ninevi sisan khopi suaksak ding a, misi luang tampi kikhamna mun in bawl ding hi (3:1-3). Bangzahta in sepaih thahatna nei in panpihtu ding nei kichi mahleh (3:8; 9), Aigupta mite sal dia a pi bang in Assuria leng gamdang ah sal a pi in om ding hi (3:10). Hiai thupuak Assuria siatna ding himahleh Ninevi melma Israel leh Judah adi’n bel thu kipahhuai ahi (1:15).

LAIBU SUNGTHU LEH A KILEPDAN

Zawlnei Nahum Laibu ah Nahum in Zawlneite pandan ngeina zui in a thupuak chiangtak in a banban in lemsuk hi; Pathian melmate tung a thukhenna hong tung ngeingei ding ahihdan genkhiakna (1:9-11; 2:13; 3:5-7), siatna hon tung ding toh kisai kahtam (3:1-7), Judah a dia suahtakna thu kipahhuai (1:12-15), Pathian galhat tungnunna leh vualzohna thute (1:2-8), leh melma pukna leh siatgawpna thute (2:1-10; 3:2-3). Pathian ngaihdamna leh tundingnate mahni kisaktheihna leh angmasialna nasepna ding lel a neite tung ah Pathian in thukkik ding ahihdan leng chiangtak a taklat in om hi. Huai tuh Ninevi in a tuhgah at ding chihna ahi (2:11-12; 3:8-19). Humpinelkai khosakna mun luhkhiak in om ding a (2:11-13), Pathian deihdan pialsan a kizuak leh angkawm a om Ninevi vuaktanna namte kiang a phoulak ahih ding ban ah zahlaktak a koih in om ding hi (3:4-7). Assuria leh Ninevi gitlouhna thuakkha lou kuamah omlou ahihman in a tung a siatna hong tun chiang in huhtu kuamah omlou ding a mangthang sipsip ding hi (3:19). Thahatna leh thuneihna zatkhelhna tuh siat dimdemna in zui ngeingei ding hi.

LAIBU THUTUN

1. PULAKNA TOM (1:1)

2. NINEVI TUNG A TOUPA HEHNA (1:2-15)

2.1. Tangtawn Pathian Thilhihtheihna leh Vangletna (1:2-10)

2.2. Ninevi Tung a Pathian Thukhenna (1:11-12a)

2.3. Judah Tundingna (1:12b-15)

3. NINEVI PUKNA GENKHOLHNA (2:1-13)

3.1. Ninevi Khopi Buluh a Om Ding (2:1-9)

3.2. Ninevi Mite Adia Lamet Beina (2:10-13)

4. KHELHNA ZIAK A NINEVI SIATGAWPNA (3:1-19)

4.1. Ngohna masa (3:1-3)

4.2. Ngohna nihna (3:4-7)

4.3. Ngohna thumna (3:8-19)

NAHUM LAIBU APAN SIN DING

1. Hiamgamna (violence) leh gitlouh-gamtat himhim Pathian in thukkik ngeingei ding hi. Huaiziak in, kuamah tung ah leh thil khatpeuh tung ah hiamgam lou ding leh gitlouhna nasep semkhe lou ding a Pathian kiang i naih ding ahi. Gitlouhna vanzat ding in Pathian mite i kipephal kei ding uh (Lk.17:1-2). A huntak ah Pathian in hon dousak ding ahihziak in (Rom.12:19).

2. Thuneihna a khengval a zatna (power abuse) peuhmah Pathian in ngaikhok mahmah hi. Huchi bang vaihawm mite’n Pathian vaihawmna thupi sem tuak ding uhi (Jak.3:1). Huaiziak in, thuneihna leh dinmun peuhmah, kuahiam khat siatna ding leh kilangbawlna ding hi lou in, midangte dopsangna ding leh kitundingtuahna ding nasepna dia zat ding ahi.

3. Assuriate thuneihna nuai ah Israel leh Judah kum 80val gentheihna leh simmohna thuak a hong om nung un Pathian in Babulonte zang in amaute suahtakna ding kong honsak hi. Huchi bang mah in, haksatna leh simmohna bangzahta thuak mah leng i kihumbit nang omsun Pathian mah ahi gige hi. Amah kiang i zuan ding uh.