Mikah Laibu Thukhun Lui a Zawlnei neu Laibu sawmlehnihte lak a khat ahi. Hiai laibu ah Mikah in Judah leh Israel tung a Pathian vaihawmna hong tung ding a gen ban ah Pathian zongte adia lametna om ahihdan gen hi. Khentuam nei a vaihawmna, diktatlouhna, nekgukna leh milim biakna tungtawn a khotang siatna huaisetak hong tun ziak in Pathian in Judah leh Israel tung ah thukhen ding hi. Lampi diklou a mipite pitu kumpi vaihawmte, siampute leh zawlneite nakpitak a dem in om uhi. Amaute ziak in Samaria leh Jerusalem hihsiat in om ding hi.

LAIBU GELHTU LEH HUAI HUN A GAMSUNG DINMUN

Hiai Laibu gelhtu Zawlnei Mikah ahi (1:1). Mikah kichi Mikaiah apan kilatom ahi (Jer.36:11). Mikaiah min khiakna “Nang bang Pathian kua a om a?” chih ahi. Mikah bel Judah gam a Jerusalem simtum lam mel 25 vel a om Gath kiang a Moresheth kichi khomi ahi (1:1;14). A Pa’ min Gemariah ahi (Jer.36:11).

Mikah in Zawlnei nna a sep hun BC 730 apan BC 690 kikal vel a chiamteh ahi a, huai tuh Judah Kumpi Jotham vaihawm hun (BC 750-731), Ahaz (BC 731-715), leh Hezekiah vaihawm hun (BC 715-686) huamkha hi. Huai hun toh kituak vel ding mah in Isai (BC 739-690) in Judah gam ah Zawlnei nna sem a, Amos leh Hosea-te’n mallam gam Israel ah Zawlnei nna sem uhi. Huai hun lai in michih in Pathian deihdan nungngatsan in amau ut dan chiat in om uhi. Pathian deihdan diktatna zui a kipanpihtuah sang in mi zawng leh gentheite neksiatna, huaihamna leh nekgukna ching uhi (2:1-2;3:1-3;9-11;7:3). Sahkhua makai tamtakte’n Pathian thu diktak genkhiak sang in a dinmun uh letkipna ding thugen leh summet bawlna ah lunglut zaw uhi (3:11). Biakna vai ah mi hausate sahkhomi mahmah bang in om mahle uh summet bawlna toh kisai ah poisak neilou in gamtang uhi. Biakna leh sum bawlna khentuam uhi.

Mikah in Samaria (Israel) puksiat ding a genkholh (1:6) tangtunna in Assuria Kumpipa’n BC 722 in Israel hong dou a Samaria khopi hongla hi. Huai zoh BC 701 in Judah hongdou nawn a khua 46 mahmah hongla in Jerusalem khopi leng umchilh hi. Huchihlai in, Judah Kumpi Hezekiah in Aigupta leh Babulon Kumpite’ kiang ah panpihna ngen hi. Huai thu ah Zawlnei Mikah leh Isai-te’n hoihsa lou in Kumpi Hezekiah kiang ah kisik a Pathian kiang a ngaihdam ngen ding in sawl uhi. Huchi in, lamdangtak in Pathian in Jerusalem humbit hi. Zan kal in Pathian Angel in Assuria sepaih mi 1,85,000 vathat a, huchi in Kumpi Sennacherib vuallel in taikik hi (Is.37:36-37; 2Kum.19:35-37). Pathian in Kumpi Hezekiah zang in Judah gamsung ah vaihawmna dik tungdingnawn hi. Amah hinna leng kum 15 sung behlapsak hi (2Kum.20:6).

ZAWLNEI MIKAH THUPUAK

Zawlnei Mikah thupuak hiai ahi; Jakobte kiang a a tatlekna uh theisak ding leh Israelte kiang a a khelhna uh theisak ding (3:8). Gamsung a thukhenna dik om louh ziak in gawtna hong tung ding a, huchi in, gamdang ah sal a pi in om ding uhi (1:16). Huai hun chiang in Pathian in amaute dawng lou ding a (3:6-7), beidongtak in om ding uhi (6:13-16). Himahleh, siatgopna hong tunlai a nutsiat a omte adi’n lametna omlai hi. Pathian in amaute tungding nawn ding ahih ziak in (2:12-13;4:1-5;5:5-9;7:8-10).

Mikah in a thupuak a poimoh dan genkhiakna in “ngai un/za un” chih thumal zang hi (1:2;3:1;6:1). Zawlnei Mikah in Samaria (Israel) puksiat ding thu (1:5-9) leh Jerusalem (Judah) suksiat a om ding thu (1:1-16;3:12) genkhol hi. Hiai genkholhnate tangtun sak in om uhi; Samaria puksiatna BC 722 in hong tung a, Jerusalem suksiatna taktak bel BC 586 in hong tung pan hi. Samaria puksiatna leh Jerusalem khopi umchilh a omna (BC 701) tuh Pathian thukhenna masa ahi. Khotang a kineksiatna, vaihawmna a diktatlouhna leh nekgukna, huaihamna leh hiamgamna ziak in Pathian vaihawmna leh thukhenna hong tung hi. Huaiziak in, Pathian in “hoih” a honphut bang ahia? Diktak a hih leh hehpihna it, leh na Pathian toh tonkhawm ahi (6:8), chi in Mikah in Israel leh Judah vauhilh hi.

Kuapeuh Pathian deihdan zongte adi’n bel lametna kipah huai om hi. Pathian in huchi bang mite tungding nawn ding hi, chih Zawlnei Mikah thupuak ahi (4:1-5). Pathian a thuchiam a muanhuai ahihman in aman a mite taisanden lou ding a, tungding nawn ngeingei ding hi.

LAIBU SUNGTHU LEH A KILEPDAN

Zawlnei Mikah thupuak a kizom in 3 vei kigen tuantuan a huaite “ngai un/za un” chih ngen in kipan hi (1:2; 3:1; 6:1). Hiai thupuak ah gawtna leh thukhenna hong tung ding ahih dan a kigen zoh toh kiton in lametna kipahhuai om ahih dan leng kigen zel hi. Pathian Dan palsat ziak a gawtna leh thukhenna hong tung ding chih ahih bang in a thukhun a Pathian a muanhuai ziak in lametna kipah huai omlai hi (7:20).

A tangpi et in, Mikah Laibu seh thum suah seh khat khelhna leh tatlekna thu ahi a, seh thum suah seh khat dang Pathian thukhenna leh gawtna thu ahi. Huchi bang mah in, seh thum a khen seh khat bel thukhenna zoh a Pathian adia muanhuai mite adia lametna thuchiam ahi. Hiai in Pathian mizia leh hihna taktak taklang hi; khelhna ziak a thukhenna leh thukhun ziak a Pathian muanhuaina. Huaiziak in Pathian in mikhialte tung ah gawtna tungsak taktak ding a, himahleh, kisik a amah kiang zuante bel Pathian in tungding in vualzawl ngeingei ding hi.

LAIBU THUTUN

1. MIKAH KIANG A TOUPA THU HONG TUNNA (1:1)

2. THUPUAK GENKHOLHNA MASA (1:2-2:13)
2.1.Samaria leh Judah tung a thukhenna (1:2-16)
2.2. Genthei nuaisiahtute demna (2:1-11)
2.3. Thukhenna khit a nutsiat a omte adia lametna (2:12-13)

3. THUPUAK GENKHOLHNA NIHNA (3:1-5:15)
3.1. Vaihawmtu diktat lou demna leh Jerusalem pukna (3:1-12)
3.2. Lalgam thak tundingna (4:1-13)
3.3. Bethlehem apan vaihawmtu diktat (Messia) hongpawt ding (5:1-6)
3.4. Israel suksiangna leh Lalgam thak kepbitna (5:7-15)

4. THUPUAK GENKHOLHNA THUMNA (6:1-7:20)
4.1. Toupa’n a mite a demna leh Kithoihna dik (6:1-8)
4.2. Jerusalem tung a demna leh thukhenna (6:9-16)
4.3. Khotang siatna ziak a kahtam (7:1-7)
4.4. Lametna thak (7:8-12)
4.5. Tundingnawnna thupuan (7:13-17)
4.6. Pathian chitna leh hotdamna (7:18-20)

MIKAH LAIBU APAN SIN DING

1. Pathian in kineksiatna- mi’ tansik laksak, vaihawmna diklou- tehna diklou zang a thukhenna, diktatlouhna himhim, leh milim biaknate ngaikhawk mahmah ahihman in huchi bang mite gawt louh in koih maimai lou hial ding hi (6:13-15). Huaiziak in, kuapeuh in Toupa deihdan zong a itna leh lainatna toh diktak a vaihawm ding ahi.

2. Pathian in a minpu kithoihna leh biakna thillat tampi latkhiak sang in “hoih” a honphut om hi. Huai tuh, “diktak a hih, hehpihna it ding, leh kiniamkhiak a Pathian toh ton ding,” ahi. Huaiziak in, Pathian deihdan zui a diktat hinkhua a hing ding, midangte it a hehpih mahmah ding, leh niteng a lungsim kiniamkhiak a Pathian toh ton gige tuh khamitna dik ahi.

Toupa’n Khalam vualzawlna chiteng Jesu Khrist a hon chiam khit ziak in amah kiang zuan leng aman hon tungding nawn ding hi. Amah a thuchiam ah muanhuai hi. Huaiziak in, Nam kilamtouh taktak na ding leh khotang a lemna leh muanna hongtun taktak theihna ding in volunteer hat hiam sum leh pai hauh hiam ahi masa kei ding a, i poimoh penpen tuh Jesu Khrist Lemna Kumpipa ahi. Jesu Khrist lou in damna bukim, bitna, lemna leh muanna, leh khantouhna dik piang thei lou ding hi.