Jonah Laibu Thukhun Lui a Zawlneineu Laibu sawmlehnihte lak a khat ahi. Hiai laibu ah Jonah tanchin tamtak kigelh hi. Jonah in Pathian thupiak zuilou in lehlam ah taimangsan sawm hi. Huchi in, ngapi gilsung vatung hi. Huai apan Pathian in hunkhia a, Ninevi khopi ah Pathian thupuak va tangkoupih hi. Hiai Laibu in Pathian hehpihna a kidim ahihdan leh michih khentuam neilou a it ahihdan hon hilh hi. Jonah toh kisai ah bel mimal angmasialna leh Pathian thupiak zuihlouhna in buaina leh haksatna tampi tungsak ahi chih hon sinsak hi.

LAIBU GELHTU LEH HUAI HUN A GAMSUNG DINMUN

Hiai Laibu gelhtu kuahiam chih chiangtak a kigelhna muh ding om kei mah leh achil apan Jonah mah hi ding a gintak ahi. Jonah min khiakna bel “vakhu” (Hebru pau in) chih ahi. 2 Kumpipate 14:25 a kigen bang in Jonah tuh Galili mi, Nazareth kiang a khua Gath-Hepher a om Amittai tapa ahi (1:1). Laisiangthou sutmi pawl khat in 1 Kumpipate 17:8-24 sung a kigen meithainu tapa Zawlnei Elijah in sihna apan a kaihthoh pen Jonah hi ding a chi uhi. Hiai tuh theihchet ahi kei.

Jonah Laibu kigelh hun BC 793 apan BC 758 kikal vel hi dia gintak ahi. Jonah in Ninevi a Zawlnei nna asep hunlai in Amos in Israel gam ah Zawlnei nna sem hi. Huai hunlai in Israel leh Judah gamte galmuang in nektak leng kiningching mahmah hi. Israel Kumpi Jeroboam II ahi. Israel leh Judah kim a gamte naktak in keniam uhi. Huaiziak in, Kumpi David leh Kumpi Solomon hunlai a Israel gamgi tan ah Kumpi Jeroboam II in gamgi kekzou hi (2 Kum. 14:23-27). Assuria leh Suria gamte bel Israel melma ana hi den uhi.

Israel leh Judah gam galmuang a omlai in mipite khalam ah naktak in niamkiak uhi. Biakna nasepte ngeina bang lel hi uh a, milim biakna pung in, diktatna in mun neilou hi. Khalam keuna ziak in michih in amau hoihsak bang chiat in a hinkhua uh zang uhi (2 Kum. 14:24; Amos 4:1f; 5:10-13). Hichi bang gitlouhna khawktak ziak in Pathian in Assuriate zang in BC 722 kum in Israel naktak in gawt hi.

ZAWLNEI JONAH THUPUAK

Pathian apan Zawlnei Jonah kiang a thu hong tung pen Israel hiam Judah hiam a ding hilou in Assuria gam a Jentel khopi Ninevi a ding ahi (1:1; 3:2). Jesu hunlai a Pharisaite’n Galili apan Zawlnei kuamah a pawt ngei kei a chih uh hiai ziak ahi ding (Jn. 7:52). Ninevi khua a hoh a a tungthu tangkoupih ding in Jonah sawl in om hi (1:1). Ninevi bel khopi thupitak ahi a, a letdan ni thum lampai ahi (3:3). Huai hunlai a khopi lianpen a chiamteh ahi a, milip nuai khat leh singnih val teng uhi (4:11). Hiai khopi thupitak tuh Noah tusawn Nimrod in a sat ahi a, khopi kumluitak ahi (Gen. 10:6-12). A gitlouhna uh Pathian kiang tungtou ahihman in a lampi diklou uh tangkoupih a Pathian lam a kisikna thu va gen ding Jonah mohpuak ahi. Hiai khopi tuh Zawlnei Nahum genkholh bang in (Nah. 3) Babulon Kumpi Nebukadnezzar in BC 612 in susia hi.

Jonah in Pathian sawlna mang lou in Tarsis zuan ding long ah kihepsan hi. Jonah adi’n Ninevi a hoh tuh thil uthuai loupi ding mah ahi. A ziak bel, Ninevi khopi i chih Israel melma Jentel mite tenna ahi. Huai ban ah, Ninevi mite a gitlouh luat ziak un huai khua a hoh ding tuh thil lauhuai ahi. Himahleh, Pathian in nam tengteng itvek ahihman in Ninevi khopi a kisikna thu gen ding in Jonah sawl teitei hi (3:1-2). Ngapi gilsung a omlai in Jonah hong kisik a Pathian kiang ah ngaihdam ngen hi. Huchi in, Pathian thupuak tangkoupih ding in Samaria apan mel 500 val a gamla Ninevi khua ah Jonah vakuan hi. Jonah thupuak ziak in Ninevi khomite lak ah kisikna thupitak hong tung a khovel khangthu a kisikna leh halhthakna thupi penpen a chiamteh ahi.

LAIBU SUNGTHU LEH A KILEPDAN

A tangpi et in Jonah laibu sehnih in khen theih hi. Bung masa nihte leh Bung nanung nihte. Athu luandan et in bel Bung 1 leh 3 luangkhawm a, huchimah bang in, Bung 2 leh 4 luangkhawm hi. Bung 1 leh 3 ah Jonah sawl a omna thu kimu a, himahleh, a ki batlouhna bel Bung 1 ah Jonah in sawl a omna nial in mun dang ah taimangsan a, Bung 3na ah bel sawl a omna mang in Ninevi ah Pathian thupuak vagen hi. Bung 2na ah Jonah kisikna leh Pathian khut a kipumpiakna thu kimu a, Bung 4na ah Pathian tung a Jonah lungkim louh thu kimu hi. Jonah bel Zawlnei thumang lou leh angmasial ahi. Himahleh, kisik a Pathian thu a zuih chiang in Pathian in a thu vualzawl a huchi in thil thupitak hong tung hi. Pathian thu ziak a Ninevi khopi a kikhekna lamdangtak hong tun lai in Jonah in Pathian ana hehsan leuleu hi.

Jonah Laibu apan itna leh lainatna a kidim Pathian ahihdan bang, thilsiamte tung a thunei sangpen Pathian ahihdan, leh Pathian apan taikhiak thil mulkimhuai ahihdan bang kimu thei hi. Ngapi gilsung a Jonah ni thum leh zan thum a om bang in Jesu Khrist leng leisung (hankhuk) ah ni thum leh zan thum om hi (Matthai 12:38-45). Hiai in Jesu Khrist sihna leh thohnawnna a lim in lak hi.

LAIBU THUTUN

1. PATHIAN THUMANLOUHNA (1:1-17)

1.1. Pathian sapna leh Jonah thumanlouhna (1:1-3)

1.2. Thumanlouhna ziak a haksatna (1:4-16)

1.3. Ngapi zang a Pathian kepna (1:17)

2. NGAPI GILSUNG APAN JONAH THUMNA (2:1-10)

2.1. Jonah thumna (2:1-9)

2.2. Pathian dawnna (2:10)

3. NINEVI A JONAH THUPUAK (3:1-10)

3.1. Pathian sapna leh Ninevi a Jonah thupuak (3:1-4)

3.2. Kumpipa leh Ninevi khomite kisikna (3:5-9)

3.3. Pathian ngaihdamna (3:10)

4. PATHIAN LAINATNA ZIAK A JONAH HEHNA (4:1-11)

4.1. Jonah hehna (4:1-5)

4.2. Pathian in Jonah khotuah (4:6-9)

4.3. Pathian lainatna kiching (4:10-11)

JONAH LAIBU APAN SIN DING

1. Pathian in ei toh kituak i hihtheih ding nna hon piak bangbang kipaktak leh thanuamtak a sepkhiak pahpah ding ahi. Jonah bang a Pathian sapna kitheihmohbawl hiam kiheimangsan ding ahi kei. Buaina leh haksatna i tuah louh ding pi tuah theihna ahi. Gawt kawm a hawidan siam Pathian ahi chih thei ni.

2. Ei mihingte lam ah Pathian itna leh lainatna kiching mahmah hi. Bangchi bang dinmun ah om mahle hang leng Pathian itna leh lainatna in hon huamkha veve hi. Amah kiang naihdan kisin ding ahi.

3. Halhthakna leh kikhekna thupitak hong tun theihna ding in khelh kisikna leh Pathian deihdan zuihna poimoh hi. Anuam leh haksa hun ah leng ginomtak a Khrist nungzuihna in gah manpha piangsak phet ding hi.